إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

أحلى انسان اللي يخش عليك الحلم بطعمية وبتنجان.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأربعاء 13/12/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

اجواء من الدراما بتحوم جواك النهاردة ليه مانتا كنت كويس امبارح..ايه اللي حصل ولا انتا اتحسدت ولا ايه بس؟..

برج الحمل عملياً

( الشغل والمذاكرة والتخطيط لبكرة ):

حاول تكدب اشاعة انك متنكد النهاردة واضحك زي امبارح على قد ماتقدر..اضحك وميهمكش من اي حد

برج الحمل صحياً

( نفسيا وجسمانيا وكل مايخص طاسة المزاج ):

صحتك زي الفل انتا بس محتاج تبطل تقعد تذاكر لأي عيل صغير أو كبير عشان متحرقش دمك ع الفاضي..

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والبربوشية..

إعرف حظك اليوم برج الثور بالتفصيل الأربعاء 13/12/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

من حق قلبك يزعل من عقلك النهاردة خصوصا وانه مش مساعده خالص يتخطى مسألة انه مجروح ومحتاج طبطبة مش تأنيب ووعيد وتهديد..

برج الثور عملياً

( الشغل والمذاكرة والتخطيط لبكرة ): 

حاول متبقاش مادي معنوي النهاردة اوي على الاقل مش بشكل واضح عشان محدش ياخد باله..

برج الثور صحياً 

( نفسيا وجسمانيا وكل مايخص طاسة المزاج ):

من حقك تاخد حقك وتنتقم بس دة ف الاخر هيخليك زيهم وشبههم بدون اي داعي..خليك نفسك الحلوة وبس..

إعرف توافق برج الثور مع باقي الأبراج النهاردة:

متوافق مع الابراج البسكوتية والحربائية والفسفورية..

إعرف حظك اليوم برج الجوزاء بالتفصيل الأربعاء 13/12/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ف اخر النفق نور متألق..ابعد عنه عشان دة نور كشاف ميكروباس سواقه ف الاغلب مجنون ومش منطقي..متركبش معاه..

برج الجوزاء عملياً 

( الشغل والمذاكرة والتخطيط لبكرة ):

عمليا انتا محتاج تركز النهاردة ف القراية والانشطة المنزلية وبس..

برج الجوزاء صحياً 

( نفسيا وجسمانيا وكل مايخص طاسة المزاج ):

صحتك كويسة وتمام ودة غالبا مخليك حاسس انك لازم ترازي نفسك ف مصيبة ما كالعادة..براحتك..

تعرف على توافق برج الجوزاء مع باقي الأبراج النهاردة:

متوافق مع الابراج الحنتوسية والكتكوتية والمائية..

إعرف حظك اليوم برج السرطان بالتفصيل الأربعاء 13/12/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خليك مع نفسك النهاردة ومع المزيكا اللي بتحبها وبتحبك وبس ومتشغلش بالك بكلام حد عليك او ليك او لحد تاني قدامك..كبر دماغك..

برج السرطان عملياً 

( الشغل والمذاكرة والتخطيط لبكرة ):

محتاج تتألق ف الجانب العملي اليومين دول عشان تعرف تقفش فلوس تجيب بيها الحاجات اللي انتا محتاجها..انجز وبطل كسل..

برج السرطان صحياً 

(نفسيا وجسمانيا وكل مايخص طاسة المزاج ):

صحيا انتا كويس ونفسيا انتا برضة كويس..حاول تحافظ على الحالة دي لاطول فترة ممكنة..وفرفش وانبسط براحتك..دة حقك..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والنارية والمائية..

إعرف حظك اليوم برج الأسد بالتفصيل الأربعاء 13/12/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج استرخاء ورخاء وتأمل وهدوء وطاجن عكاوي وكل حاجة ف مشاعرك هتظبط وتبقى زي الفل النهاردة..مش أكتر..

برج الأسد عملياً 

( الشغل والمذاكرة والتخطيط لبكرة ):

عمليا تقدر تطرقع صوابعك عشان اليآس اللي صايب نفسيتك دة اختياري وانتا واخده عن حب ومفيش حاجة تقدر تفرق مابينكم مهما حصل..ف مفيش فايدة..

برج الأسد صحياً 

( نفسيا وجسمانيا وكل مايخص طاسة المزاج ):

صحتك محتاجة تفاؤل وحب للحياة ومبادرة بالخير وحاجات كتير انتا مش هتعملها ف بلاش نتكلم عنها احسن..

تعرف على توافق برج الأسد مع باقي الأبراج النهاردة:

متوافق مع الابراج البطوطية والباراكودية والكتكوتية..

إعرف حظك اليوم برج العذراء بالتفصيل الأربعاء 13/12/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

واضح ان خطتك اتكشفت وكل حاجة بانت وهيبقى في كماشة كبيرة عليك النهاردة..الحل الوحيد انك تهرب وبسرعة..

برج العذراء عملياً 

( الشغل والمذاكرة والتخطيط لبكرة ):

عقلك كشف قلبك خلاص ومفيش مجال غير انك تهرب يا ف الاكل يا ف النوم وبس..

برج العذراء صحياً 

( نفسيا وجسمانيا وكل مايخص طاسة المزاج ):

صحتك كويسة وماشي حالها بس احتياطي ركز ف البصل والتوم عشان تاخد مناعة ضد ميكروبات البرد اللي واضح انها مبتحبش ريحة البصل والتوم..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والبرمائية والترابية..

إعرف حظك اليوم برج الميزان بالتفصيل الأربعاء 13/12/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متألق النهاردة وبتسمع الكلام ومطيع خالص ماشاء الله..واضح انك بتدبر لمصيبة من مصايبك المعهودة المعتادة..براحتك..حياتك وانتا حر فيها..

برج الميزان عملياً 

( الشغل والمذاكرة والتخطيط لبكرة ):

اعرف انك صح لوحدك..انتا كبرت خلاص وعارف الصح ف حياتك فين وازاي يتعمل..مش لازم تستلف من حد رأي ف حياتك..بلاش..

برج الميزان صحياً 

( نفسيا وجسمانيا وكل مايخص طاسة المزاج ):

صحتك كويسة وتمام بس انتا اللي بتبوظها وعن عمد وفاكر نفسك بتلعب..قشطة..العب براحتك ف اي حاجة ف الحياة الا الصحة..قلتها بتزعل بجد..خد بالك من نفسك وخليك ذكي..

تعرف على توافق برج الميزان مع باقي الأبراج النهاردة:

متوافق مع الابراج الدرامية والمستحية والترابية..

إعرف حظك اليوم برج العقرب بالتفصيل الأربعاء 13/12/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك النهاردة من قلبك عشان زعلان شوية ومقموص ومحتاج طبطبة ودلع وأكل وفسح وخروج وشكله هيتعبك معاه النهاردة..راضيه بأي حاجة وخلاص..

برج العقرب عملياً 

( الشغل والمذاكرة والتخطيط لبكرة ):

خد بالك النهاردة من الموتوسيكلات واللي راكبين الموتوسيكلات كويس قوي..

برج العقرب صحياً 

( نفسيا وجسمانيا وكل مايخص طاسة المزاج ):

صحتك تمام بس نفسيتك محتاجة تشكيلة مختلفة من انواع الدلع بمقاسات واحجام مختلفة عشان تنبسط..

تعرف على توافق برج العقرب مع باقي الأبراج النهاردة:

متوافق مع الابراج الغجرية والبربرية والفسدقية..

إعرف حظك اليوم برج القوس بالتفصيل الأربعاء 13/12/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تشحن موبايلك النهاردة عشان هتحب ف التليفون واحتمال تتحب واحتمال برضة تتخانقوا..

برج القوس عملياً 

( الشغل والمذاكرة والتخطيط لبكرة ):

حاول تنقي كلامك النهاردة عشان متزعلش حد منك بدون داعي خصوصا اللي بيحبوك..

برج القوس صحياً 

( نفسيا وجسمانيا وكل مايخص طاسة المزاج ):

صحتك تمام بس خد بالك من ضهرك وحاول تقعد بشكل سليم وتفرد جسمك كل ساعة حبة وتقل حبة ف الهدوم ومتعاندش ف الجو.. متنساش عشان متستهواش..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والبربوشية والنارية..

إعرف حظك اليوم برج الجدي بالتفصيل الأربعاء 13/12/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك عشان قلبك النهاردة مخبي لعقلك عصاية فيها مسامير مصدية ناوي يغفله بيها على دماغه..خد بالك ومتسيبهمش النهاردة لوحدهم مع بعض خالص..

برج الجدي عملياً 

( الشغل والمذاكرة والتخطيط لبكرة ):

خد بالك برضة ان انتا النهاردة قيد المراقبة وفي حد مستنيلك على غلطة وبيتلككلك عشان يرازيك..خد بالك من نفسك كويس..

برج الجدي صحياً 

( نفسيا وجسمانيا وكل مايخص طاسة المزاج ):

صحتك بالدنيا..حاول متضحيش بيها ف سبيل حاجات تافهة ملهاش لازمة غير انك تثبت انك احسن واقوى واجمد..مالوش لازمة تثبت لحد حاجة..

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والنباتية..

إعرف حظك اليوم برج الدلو بالتفصيل الأربعاء 13/12/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مزاجك رايق لدرجة ممكن تخليك ترجع تكلم القمر تاني زي زمان..إعمل كدة وهيسمعك وهيفهمك كويس وإحتمال يحدفلك بوسة..

برج الدلو عملياً 

( الشغل والمذاكرة والتخطيط لبكرة ):

في ميل للعنف ف الاجواء لأنك ف الأغلب زهقت من الصبر وزهقت من تكبير الدماغ او السكوت لأي ظلم..حقك بصراحة..كسحهم وعرقبهم ف نفسيتهم..

برج الدلو صحياً 

( نفسيا وجسمانيا وكل مايخص طاسة المزاج ):

صحتك محتاجة تشرب مية كتير ومتكسلش ومتنساش تاخد الدوا تاني..عيب انتا كبرت..عيب اللي بتعمله دة والله..

تعرف على توافق برج الدلو مع باقي الأبراج النهاردة:

متوافق مع الابراج الدخانية والمستحية والفرفورية والباراكودية..

إعرف حظك اليوم برج الحوت بالتفصيل الأربعاء 13/12/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حيرت قلبك وعقلك معاك ومش هيعرفوا يناموا بالليل بسهولة من اللي بتعمله ف نفسك دة..كفاية تناقض انتا سجلت رقم قياسي خلاص..عاوز ايه اكتر من كدة

برج الحوت عملياً 

( الشغل والمذاكرة والتخطيط لبكرة ):

حاول تبطل تناقض مابين كلامك وشعاراتك من جهة ومابين تصرفاتك على ارض الواقع عشان شخصيتك ممكن تتوه منك ف النص وهتحتاجها ومش هتلاقيها وهترجع تزعل وتقول شخصيتي راحت شخصيتي راحت..

برج الحوت صحياً 

( نفسيا وجسمانيا وكل مايخص طاسة المزاج ):

صحتك تمام ودة غالبا السبب اللي مخليك مستقوي وحاسس انك من حقك تخطف كل حاجة معرفتش تاخدها بالتراضي..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفرفورية..