التوقيت الجمعة، 29 مارس 2024
التوقيت 02:12 ص , بتوقيت القاهرة

حظك اليوم مع عبدالله أحمد الثلاثاء 12/12/2017 فرفشة للحمل وتثبيت للجدي

حظك اليوم وتوقعات الأبراج مع عبدالله أحمد الثلاثاء 12/12/2017
حظك اليوم وتوقعات الأبراج مع عبدالله أحمد الثلاثاء 12/12/2017

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


حيطة مكتوب عليها"طول ما الحلو مقتنع انه مش حلو.. هيفضل الوحش..واخد مكان كل حلو".


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الثلاثاء 12/12/2017 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


فرفشة وزقططة وإنبساط وإحتفال ورغي ف التليفون ولكاعة وتضييع وقت وكلام كتير وضحك ف النص اكتر وهدوء ونوم وأحلام عبيطة مضحكة وبس النهاردة..


برج الحمل عملياً


( الشغل والمذاكرة والتخطيط لبكرة ):


متقلقش..محدش بيفكر ياخد حقك ف حاجة خصوصا وإنك متوحش ومجنون وكلنا عارفين الموضوع دة كويس..


برج الحمل صحياً


( نفسيا وجسمانيا وكل مايخص طاسة المزاج ):


صحتك كويسة ماشاء الله وسنانك بيضا وبتلمع..حاول تضحك كتير النهاردة وتكيد الناس ببياض سنانك..


إعرف توافق برج الحمل مع باقي الأبراج النهاردة:


متوافق مع الابراج البسبوسية والمرمرية والهوائية..


حظك اليوم برج الثور دوت مصر


إعرف حظك اليوم برج الثور بالتفصيل الثلاثاء 12/12/2017 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


داري على وجع قلبك وخليك حنين معاه وبلاش تفضحه وتعرف الدنيا كلها انه مجروح ومكسور ومتصاب..عامله حلو عشان هتحتاجه قريب..


برج الثور عملياً


( الشغل والمذاكرة والتخطيط لبكرة ): 


امورك ماشية وفي تألق ونجاح النهاردة..استمتع باليوم وحاول تفرفش وتبتهج ومتفكرش ف اي نكد من اي نوع ياريت..


برج الثور صحياً 


( نفسيا وجسمانيا وكل مايخص طاسة المزاج ):


صحتك كويسة بس انتا اللي محتاج تفرفش عشان تعرف تستمتع بالصحة المفرطة دي..


إعرف توافق برج الثور مع باقي الأبراج النهاردة:


متوافق مع الابراج البسكوتية والحربائية والبرمائية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الثلاثاء 12/12/2017 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


كل حاجة ماشي حالها خصوصا وانك بتريح اليومين دول وواخد اجازة من التفكير ف المشاعر ف الاغلب..خير ماعملت..تصرف اكيد هيصب ف مصلحتك على المدى الطويل..


برج الجوزاء عملياً 


( الشغل والمذاكرة والتخطيط لبكرة ):


خد بالك بالنهار من اي حد لابس ابيض وتجنبه وبالليل ياريت تاخد بالك وانتا سايق نفسيتك عشان الاوفر ثينكينج مستنيك بكباب وكفتة عشان تتعشوا مع بعض الليلة..


برج الجوزاء صحياً 


( نفسيا وجسمانيا وكل مايخص طاسة المزاج ):


صحتك تمام ومناعتك شغالة ماشاء الله ودة ممكن يوهمك انك تقدر تتخانق وترازي ف المخاليق وتشتبك معاهم بس ياريت متعملش كدة عشان محدش فاضيلك اصلا لا انتا ولا خناقاتك..


تعرف على توافق برج الجوزاء مع باقي الأبراج النهاردة:


متوافق مع الابراج الحنتوسية والكتكوتية والكرنبية..


حظك اليوم برج السرطان دوت مصر


إعرف حظك اليوم برج السرطان بالتفصيل الثلاثاء 12/12/2017 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


مسيرها تروق وتحلى وتنبسط وتبسطك معاها متقلقش..مسير الدنيا تضحكلك وتفرفش معاك..اتقل بس واستنى دورك ومتستعجلش..


برج السرطان عملياً 


( الشغل والمذاكرة والتخطيط لبكرة ):


مهم تاكل فول وطعمية وبتنجان النهاردة لمزاجك الشخصي مش عشان جعان..


برج السرطان صحياً 


(نفسيا وجسمانيا وكل مايخص طاسة المزاج ):


صحتك محتاجة منك تتفاءل حبة ومتاخدش تفاصيل الحياة على صدرك وتثق ف انك صح ف حياتك وبس..انتا المسئول عن اختياراتك مش حد تاني..


تعرف على توافق برج السرطان مع باقي الأبراج النهاردة:


متوافق مع الابراج الحلبسية والنارية والترابية..


حظك اليوم برج الا?سد دوت مصر


إعرف حظك اليوم برج الأسد بالتفصيل الثلاثاء 12/12/2017 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


يوم مثالي تقدر تكمل فيه سعيك الحثيث نحو الكمال المستحيل ف كل حاجة..هو جنن طبعا انك تعمل كدة بس جنان من حقك وبراحتك..


برج الأسد عملياً 


( الشغل والمذاكرة والتخطيط لبكرة ):


طالما مبسوط يبقى كل حاجة فل وجميلة وحلوة..اما لو مش مبسوط ف حاول تنبسط عشان محدش هيهتم يبسطك النهاردة..


برج الأسد صحياً 


( نفسيا وجسمانيا وكل مايخص طاسة المزاج ):


صحتك كويسة بس خد بالك من البرد والعكوسات عشان في ميكروبات رشح وكحة ماشية ف الهوا النهاردة..


تعرف على توافق برج الأسد مع باقي الأبراج النهاردة:


متوافق مع الابراج البطوطية والباراكودية والفسفسائية..


حظك اليوم برج العذراء دوت مصر


إعرف حظك اليوم برج العذراء بالتفصيل الثلاثاء 12/12/2017 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


احاسيسك وعواطفك النهاردة من حقها تتدلع حبة بس ياريت ميبقاش دلع بزيادة بس عشان متبوظش كل حاجة..وحاول تقلل حبة من طاقة الكراش اللي عندك تجاه اللي بتكراش عليه ف السر عشان متتفقسش وتبقى حوسة..


برج العذراء عملياً 


( الشغل والمذاكرة والتخطيط لبكرة ):


اتدلع براحتك بس ياريت الدلع دة ميجيش على إدراكك ويوقعه ف بحر البليلة وميبقاش عقلك عارف ياخد اي قرار بسبب البليلة العاطفية دي..حاول تبقى عاقل وانتا بتفرفش..


برج العذراء صحياً 


( نفسيا وجسمانيا وكل مايخص طاسة المزاج ):


الصحة كويسة بس انتا محسس نفسك بالذنب ف كل مرة بتاكل فيها عشان بتفكر ف الدايت طول الوقت وغاوي تنكد على نفسك..الجو برد ومحتاج اكل عشان تعرف تدفى..خلص الكلام..


تعرف على توافق برج العذراء مع باقي الأبراج النهاردة:


متوافق مع الابراج البرطمانية والبرمائية والهوائية..


حظك اليوم برج الميزان دوت مصر


إعرف حظك اليوم برج الميزان بالتفصيلالثلاثاء 12/12/2017 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


خليك أوريچنال دايما..خليك نفسك وبس..خليك مع نفسك ومتقلدش حد..انتا أكبر من كدة بمراحل..سيب اللي يلزق يلزق براحته..ف الاخر هيفضل هو كوبي وانتا هتفضل أصلي


برج الميزان عملياً 


( الشغل والمذاكرة والتخطيط لبكرة ):


طبيعي تتعب طول مانتا بتتصرف صح..الصح صعب دايما..بس نتيجته أكيد تستاهل المجهود..


برج الميزان صحياً 


( نفسيا وجسمانيا وكل مايخص طاسة المزاج ):


الصحة تمام وزي الفل بس انتا محتاج تاخد بالك من نفسك ومن الصداع والعطش ومتديهمش فرصة يضايقوك او يعكروا مزاجك او يعترضوا طريق صحتك..


تعرف على توافق برج الميزان مع باقي الأبراج النهاردة:


متوافق مع الابراج الدرامية والمستحية والمائية..


حظك اليوم برج العقرب دوت مصر


إعرف حظك اليوم برج العقرب بالتفصيل الثلاثاء 12/12/2017 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


محتاج شوية تشجيع قبل الاكل وبعد الاكل النهاردة عشان كيرف عواطفك عالي والشحتفة زايدة حبتين وكمان ممكن تبقى حاسس انك رقيق النهاردة بزيادة..معلش..حالة بسيطة عابرة وتعدي متقلقش..


برج العقرب عملياً 


( الشغل والمذاكرة والتخطيط لبكرة ):


محتاج تجدد إكتشاف مصادر إلهامك ف الحياة عن طريق الفن والمزيكا والافلام والحاجات والناس الحلوة اللي بتحب تسمع تشجيعها ليك لما تعمل اي حاجة حلوة..


برج العقرب صحياً 


( نفسيا وجسمانيا وكل مايخص طاسة المزاج ):


صحتك الجسمانية تمام الحمدلله وشعرك ناعم النهاردة وجميل..نفسيتك هي اللي محتاجة ف الاغلب اهتمام كبير خصوصا ف فترة المساء والسهرة..


تعرف على توافق برج العقرب مع باقي الأبراج النهاردة:


متوافق مع الابراج الغجرية والبربرية والهوائية..


حظك اليوم برج القوس دوت مصر


إعرف حظك اليوم برج القوس بالتفصيل الثلاثاء 12/12/2017 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


طاقتك ف المرازية كيرفها عالي النهاردة واحتمال ترازي ف الناس وف نفسك وف العالم ككل..واضح ان الحب مديك ثقة أوفر او قلة الحب مجنناك..مسير كل حاجة تبان ونعرف كل حاجة..


برج القوس عملياً 


( الشغل والمذاكرة والتخطيط لبكرة ):


انتا انسان عادي مش سوبر هيرو بالتالي متشغلش بالك بالصح والغلط ف العالم واشغل نفسك بحياتك وبس..بلاش اندفاع ومبالغة عشان مترجعش تندم..


برج القوس صحياً 


( نفسيا وجسمانيا وكل مايخص طاسة المزاج ):


صحتك كويسة ودة غالبا اللي مشجعك ترازي ف الناس النهاردة بقلب جامد وبثقة نادرة..


تعرف على توافق برج القوس مع باقي الأبراج النهاردة:


متوافق مع الابراج الفركتوزية والبربوشية والترابية..


حظك اليوم برج الجدي دوت مصر


إعرف حظك اليوم برج الجدي بالتفصيل الثلاثاء 12/12/2017 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


بتحب حد بعدي عنك بس انتا مش شايف دي مشكلة طول مانتا مثبته بالكلام..قشطة وماله..خد بالك بس ليزهق من كتر التثبيت والكلام ويقولك سلام..


برج الجدي عملياً 


( الشغل والمذاكرة والتخطيط لبكرة ):


ابعد عن الضلمة النهاردة ف كل حاجة وخليك ف النور والشمس احسن..كمان حاول تنجز ف امورك وتخلص اللي وراك من سكات..


برج الجدي صحياً 


( نفسيا وجسمانيا وكل مايخص طاسة المزاج ):


متعملش الحاجة اللي انتا بتخطط تعملها بالليل..بلاش..اليوم مش مناسب وفي عكوسات كتير..بلاش..خليها يوم تاني معلش..


تعرف على توافق برج الجدي مع باقي الأبراج النهاردة:


متوافق مع الابراج المرمرية والحنكوشية والهوائية..


حظك اليوم برج الدلو دوت مصر


إعرف حظك اليوم برج الدلو بالتفصيل الثلاثاء 12/12/2017 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متاخدش الامور على صدرك النهاردة عشان تعرف تعدي اليوم لو سمحت وحاول تعتبرها حاجات عادية بتحصل لكل الناس مش انتا بس..متاخدش حياتك بشكل شخصي النهاردة عشان متتنكدش..


برج الدلو عملياً 


( الشغل والمذاكرة والتخطيط لبكرة ):


مهم تبقى مبتسم بثقة النهاردة ف وش العالم المحيط بكل تفاصيله..مهم تاخد الكوكب دة على قد عقله النهاردة عشان اليوم يعدي بشكل لطيف وبدون مشاكل..


برج الدلو صحياً 


( نفسيا وجسمانيا وكل مايخص طاسة المزاج ):


حل مشاكل نفسك الاول وبعد كدة ابقى افتي للناس بحلول لمشاكلهم..المنطق بيقول كدة..


تعرف على توافق برج الدلو مع باقي الأبراج النهاردة:


متوافق مع الابراج الدخانية والمستحية والفرفورية والترابية..


حظك اليوم برج الحوت دوت مصر


إعرف حظك اليوم برج الحوت بالتفصيل الثلاثاء 12/12/2017 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


محتاج تهدى حبة على قلبك عشان ميتعبش منك بزيادة وتصحى ف يوم تلاقيه لم هدومه من على منشر الغسيل وخد الاطباق اللي ف النيش وهرب..بلاش..عامله كويس عشان يحبك..


برج الحوت عملياً 


( الشغل والمذاكرة والتخطيط لبكرة ):


دور على القمر بالنهار النهاردة..دور على القمر على الارض مش ف السما..


برج الحوت صحياً 


( نفسيا وجسمانيا وكل مايخص طاسة المزاج ):


صحتك تمام ودة اللي مشجعك ع النكد غالبا..حاول تستغل صحتك الكويسة دي ف الضحك والفرفشة وادي النكد على قفاه لو عدى من قدامك صدفة..


تعرف على توافق برج الحوت مع باقي الأبراج النهاردة:


متوافق مع الابراج البسبوسية واللولبية والنارية..



اعلان حظك اليوم دوت مصر