التوقيت الثلاثاء، 19 مارس 2024
التوقيت 02:08 م , بتوقيت القاهرة

حظك اليوم مع عبدالله أحمد الأربعاء 22/11/2017 الحب مالوش علاقة بالعشم

حظك اليوم وتوقعات الأبراج مع عبدالله أحمد الأربعاء 22/11/2017
حظك اليوم وتوقعات الأبراج مع عبدالله أحمد الأربعاء 22/11/2017

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


 إزاي كل واحدة عاوزة العالم يعاملها على انها عالم مستقل بذاته..وف نفس الوقت بتعتبر الرجالة كلهم صنف واحد؟.   


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الأربعاء 22/11/2017 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


بتقضي وقتك ف تثبيت اللي بتحبه اكتر من الوقت اللي بتحبه فيه ماشاء الله ومتخيل ان الوضع ممكن يستمر على كدة ازاي طيب..مينفعش..اللي بيحب حد لازم ميضيعش وقت ويحبه ويخلص..حالة الخوف اللي بتسقي ف شوربتها دي مبتأكلش عيش ولا بتخلي اي حب يكمل اساسا..


برج الحمل عملياً


( الشغل والمذاكرة والتخطيط لبكرة ):


بتبان واثق ف نفسك بس من جواك مليان شكوك..بتضغط على نفسك كتير جا عشان تبقى احسن واحد..روق..مفيش حاجة مستاهلة..


برج الحمل صحياً


( نفسيا وجسمانيا وكل مايخص طاسة المزاج ):


اكل ونوم ف وقت الفراغ وبس..


إعرف توافق برج الحمل مع باقي الأبراج النهاردة:


متوافق مع الابراج الهوائية والترابية والمائية..


حظك اليوم برج الثور دوت مصر


إعرف حظك اليوم برج الثور بالتفصيل الأربعاء 22/11/2017 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


بلاش افترا على اللي بتحبهم النهاردة عشان القدر والكارما بيتلككوا وممكن يبقى ردهم عليك فوري وحاسم وقاسي جدا..خد بالك وخليك النهاردة طيب وحنين وقريب بشكل إستثنائي لحد ما اليوم يعدي ومن بعد اتناشر بالليل تقدر ترجع تاني لطبيعتك براحتك متخافش..


برج الثور عملياً


( الشغل والمذاكرة والتخطيط لبكرة ): 


محدش يقدر ياخد مكانك خصوصا ف قلوب الناس..ف متقلقش وثق ف نفسك وبلاش عدوانية مفرطة بتداري بيها عدم ثقتك ف نفسك عشان الموضوع دة بقى خايب ومفقوس ومالوش اي تلاتين لازمة..


برج الثور صحياً 


( نفسيا وجسمانيا وكل مايخص طاسة المزاج ):


صحتك محتاجة اكل كويس ومحتاجة راحة ونوم ومحتاجة منك برضة تبطل قلق خالص خصوصا من المستقبل..انتا عايش على ضهر زلطة تايهة ف الفضا وممكن اي زلطة تانية أصغر منها تخبط فيها وتخلص على اي حد عايش هنا..مستقبل ايه اللي شاغل دماغك بيه؟..


إعرف توافق برج الثور مع باقي الأبراج النهاردة:


متوافق مع الابراج البسكوتية والبسبوسية والحرنكشية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الأربعاء 22/11/2017 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متخشش ف منافسات عاطفية عبيطة مع اي حد النهاردة..عيب..مش قيمتك خالص..


برج الجوزاء عملياً 


( الشغل والمذاكرة والتخطيط لبكرة ):


حاول تركز النهاردة على قد ماتقدر عشان تخلص اللي وراك ف السريع وتشوف هتعمل ايه ف المصيبة اللي انتا بتخططلها بقالك حبة دي..برضة مسألة عاوزة اهتمام عشان تعرف تخرب بيها الدنيا على نفسك صح..ياللا..ربنا يوفقك..


برج الجوزاء صحياً 


( نفسيا وجسمانيا وكل مايخص طاسة المزاج ):


صحتك ماشي حالها بس ممكن تكون احسن خصوصا لو بطلت تهمل ف اكلك وخصوصا خصوصا وجبة الفطار..بالليل حاول تدلع نفسك ف اناناس ولا يوستفندي ولا اي فاكهة تعجبك..


تعرف على توافق برج الجوزاء مع باقي الأبراج النهاردة:


متوافق مع الابراج الخشبية والاخطبوطية والعنكبوتية والترابية..


حظك اليوم برج السرطان دوت مصر


إعرف حظك اليوم برج السرطان بالتفصيل الأربعاء 22/11/2017 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


المفروض انك حساس وبزيادة يعني..ليه بقى بتحدف حبايبك بكلام زي الدبش خصوصا لما تبقى متعصب..هل انتا مش مدرك ان الكلام دة مبيتنسيش مثلا ولا حابب تخلى الطرف الاخر هو كمان يتعمل الخصلة دي ويبتدي يخش معاك ف معارك كلامية وتقضوا الوقت كله بتفكروا هتوجعوا بعض بالكلام ازاي عشان كل واحد عاوز ينتصر ف المعركة الكلامية الدايرة؟..معقول دة كدة يبقى حب..طب ازاي..يبقى كل واحد فيكم بيعامل العالم كله حلو وبيعامل اللي بيحبه وحش عشان متعشم فيه بزيادة..دة كلام بذمتك يعني؟..عموما انتا حر..


برج السرطان عملياً 


( الشغل والمذاكرة والتخطيط لبكرة ):


ابعد عن اي حاجة مقلمة او مخططة ف الهدوم النهاردة عشان متحصلكش اي عكوسات وحاول تختار الوقت اللي تنزل فيه كويس عشان الزحمة الاوفر النهاردة هتعملك مشاكل وارهاق مالوش اي داعي..حاول تتجنبها على قد ماتقدر..


برج السرطان صحياً 


(نفسيا وجسمانيا وكل مايخص طاسة المزاج ):


صحتك زي الفل بس انتا محتاج بس تتدفى بشكل احسن بالليل ومحتاج برضة تعمل مساج خفيف خصوصا لرقبتك واكتافك..


تعرف على توافق برج السرطان مع باقي الأبراج النهاردة:


متوافق مع الابراج البرمائية والمائية والهوائية..


حظك اليوم برج الا?سد دوت مصر


إعرف حظك اليوم برج الأسد بالتفصيل الأربعاء 22/11/2017 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


مش لازم تتخانقوا ف التليفون..ومش لازم تطلع صح ف كل حاجة وخلاص..حاول تستوعب الموقف وتخليك انتا الكبير وتسمع وتشغل دماغك ف انك تمتص غضب اللي بتكلمه لأنك بتحبه ويستاهل..كمان مش لازم تقفل ف وش حد السكة لمجرد انه معجبكش كلامه..كدة هتقعد لوحدك ف الاخر خلي بالك..عموما انتا حر..


برج الأسد عملياً 


( الشغل والمذاكرة والتخطيط لبكرة ):


بلاش متابعة لأي أخبار النهاردة عشان متكتئبش..تقوقع ف مكانك مع مزيكتك اللي بتحبها وشوفلك اي افلام لطيفة مؤجلة متفرجتش عليها قبل كدة مع حبة مزيكا وعشا لطيف وخلاص..دة يبقى افضل وأروق من اي حاجة تانية..


برج الأسد صحياً 


( نفسيا وجسمانيا وكل مايخص طاسة المزاج ):


صحتك تمام بس انتا بقيت تشك ف اي حد بيكح او بيعطس جنبك انه عنده برد وهيعديك..حاول تثق ف صحتك وف ميكروباتك اكتر من كدة عشان متزعلش منك..


تعرف على توافق برج الأسد مع باقي الأبراج النهاردة:


متوافق مع الابراج الكتكوتية والترابية والمعدنية..


حظك اليوم برج العذراء دوت مصر


إعرف حظك اليوم برج العذراء بالتفصيل الأربعاء 22/11/2017 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متفرحش بقدرتك على التدمير..بلاش..ابني احسن او اقعد متعملش اي حاجة..مش لازم تبوظ كل حاجة لمجرد انه جتلك الفرصة او لمجرد انك حسيت فجأة انك تقدر تعمل كدة..جايز الموضوع مسلي دلوقتي بس هترجع تندم بعدين..دة مؤكد يامعلم..


برج العذراء عملياً 


( الشغل والمذاكرة والتخطيط لبكرة ):


محتاج تبذل مجهود مضاعف ف الحاجة اللي بتعملها النهاردة مهما كانت بسيطة عشان تطلع من تحت ايدك ف الاتجاه الصح وبرفكت وبالتالي تتجنب ان اي حد يعلق على مجهودك او ينتقد قلته او نقصانه..حاول تتألق حبة..دة حقك..


برج العذراء صحياً 


( نفسيا وجسمانيا وكل مايخص طاسة المزاج ):


صحتك تمام بس قولونك ف الاغلب بيلاعبك بالذات بالليل ف اوقات الراحة..حاول تهتم شوية بنوعية اكلك وتتحرك بعد ماتاكل..بلاش الركنة اللي بتركنها بعد ما تخلص اكل دي..بلاش..


تعرف على توافق برج العذراء مع باقي الأبراج النهاردة:


متوافق مع الابراج النارية والعنترية..


حظك اليوم برج الميزان دوت مصر


إعرف حظك اليوم برج الميزان بالتفصيل الأربعاء 22/11/2017 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تدلع حبيبك النهاردة ف اي مكالمة حلوة بالليل او بالنهار..الدلع مطلوب النهاردة وطبيعي لما تدلع اللي بتحبه هيدلعك بالتالي هتبقى كويس ومش قلقان انك تقعد من غير دلع باقي اليوم..عموما اتدلع براحتك..حقك برضة..


برج الميزان عملياً 


( الشغل والمذاكرة والتخطيط لبكرة ):


الخوف من الفشل هو اللي بيجيب الفشل من بنطلونه..حاول تثق ف نفسك وبلاش تشك ف نفسك ف كل حاجة بتعملها او بتقولها النهاردة..انتا جميل وهتفضل جميل ومحبوب..ثق ف نفسك بس عشان تعرف تنجح وتاخد وضعك ف الحياة..مش أكتر..


برج الميزان صحياً 


( نفسيا وجسمانيا وكل مايخص طاسة المزاج ):


الصحة تمام بس محتاج تشرب جنزبيل على قرفة الصبح قبل ما تنزل وياريت تدفي نفسك بالليل عشان الجو ممكن يقلب بسقعة وتلج ف اي لحظة..


تعرف على توافق برج الميزان مع باقي الأبراج النهاردة:


متوافق مع الابراج الحربائية والفنكوشية والترابية..


حظك اليوم برج العقرب دوت مصر


إعرف حظك اليوم برج العقرب بالتفصيل الأربعاء 22/11/2017 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متنكرش فضل الناس على دماغك ولا على قلبك مهما حصل..مش قيمتك دي خالص..كمان افتكر كويس انك مش ضحية لحد الا نفسك واختياراتك وتصرفاتك..ف لو هتلعب النهاردة لعبة اللوم..ياريت تلعبها مع نفسك وبس..


برج العقرب عملياً 


( الشغل والمذاكرة والتخطيط لبكرة ):


خليك أليف النهاردة على قد ماتقدر عشان احتمال تحصلك صدفة حلوة النهاردة..خليك مستعد..


برج العقرب صحياً 


( نفسيا وجسمانيا وكل مايخص طاسة المزاج ):


صحتك تمام بس عقلك بيشتغلك كتير جدا ودة مأثر على نفسيتك بالسالب طول الوقت..حاول تروق دماغك وترشها وتدلعها احسن بدل مانتا قاعد بتندب حظك كل يوم..


تعرف على توافق برج العقرب مع باقي الأبراج النهاردة:


متوافق مع الابراج الكهربائية والنارية..


حظك اليوم برج القوس دوت مصر


إعرف حظك اليوم برج القوس بالتفصيل الأربعاء 22/11/2017 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


إحترس من المشاوير الطويلة النهاردة خصوصا بالنهار..سواء جوة نفسك أو براها..حاول متسرحش ورا الافكار اللي مش كويسة..بلاش..


برج القوس عملياً 


( الشغل والمذاكرة والتخطيط لبكرة ):


ابعد عن الزحمة النهاردة وحاول تتواجد ف المناطق المفتوحة الواسعة لانها هتبقى افضل لنفسيتك..بلاش كتمة وبلاش خنقة..


برج القوس صحياً 


( نفسيا وجسمانيا وكل مايخص طاسة المزاج ):


صحتك تمام بس محتاج تنعنش حبة نفسيا بمزيكا او افلام او شوية رياضة او رقص..اهتم كدة وانبسط


تعرف على توافق برج القوس مع باقي الأبراج النهاردة:


متوافق مع الابراج النارية والهوائية والدخانية..


حظك اليوم برج الجدي دوت مصر


إعرف حظك اليوم برج الجدي بالتفصيل الأربعاء 22/11/2017 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


محتاج تفضي نفسك حبة وتروق مع حالك كدة وتفك من التفكير ف المشاكل واللي حصل واللي إتكسر وتهدى على روحك كدة حبة وتستمتع بالحياة..او على الاقل تحاول تستمتع حبة..الحياة مش كلها مشاوير وجري وحركة وخلاص..مهم تريح حبة..


برج الجدي عملياً 


( الشغل والمذاكرة والتخطيط لبكرة ):


إرجع لاحضان الطبيعة الام ف كل حاجة..


برج الجدي صحياً 


( نفسيا وجسمانيا وكل مايخص طاسة المزاج ):


صحتك كويسة بس انتا محتاج تاكل بشكل افضل ومتنساش الخضار والسلطة بشكل عام..


تعرف على توافق برج الجدي مع باقي الأبراج النهاردة:


متوافق مع الابراج الفرفورية والهوائية والترابية..


حظك اليوم برج الدلو دوت مصر


إعرف حظك اليوم برج الدلو بالتفصيل الأربعاء 22/11/2017 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


في حد بيكراش عليك ف السر خد بالك..حاول تعمل نفسك مش واخد بالك وطنش الموضوع تماما لحد مايختفي لوحده..


برج الدلو عملياً 


( الشغل والمذاكرة والتخطيط لبكرة ):


إبعد عن اللون الأصفر ف كل حاجة النهاردة وياريت لو تقلل من انتقادك للأخرين عشان كلامك بيوجع خصوصا وان معظمه حقيقي..مش لازم تقول لكل واحد بتكرهه انك بتكرهه..بلاش..


برج الدلو صحياً 


( نفسيا وجسمانيا وكل مايخص طاسة المزاج ):


صحتك تمام وف تحسن الحمدلله..واضح انك مهتم وواضح ان نفسيتك حالتها بتتحسن ودة ف حد ذاته إنجاز ف الظروف اللي بيمر بيها العالم دلوقتي..حاول تحافظ على الحالة المستقرة دي..


تعرف على توافق برج الدلو مع باقي الأبراج النهاردة:


متوافق مع الابراج السرسوبية والغازية والبركانية..


حظك اليوم برج الحوت دوت مصر


إعرف حظك اليوم برج الحوت بالتفصيل الأربعاء 22/11/2017 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تركز النهاردة ف انك تحب نفسك وبعد كدة ابقى حب الناس براحة راحتك..النهاردة انتا أهم منهم حبة وتستاهل تدي نفسك الاهتمام دة..حاول متتخانقش معاها بس


برج الحوت عملياً 


( الشغل والمذاكرة والتخطيط لبكرة ):


حاول النهاردة تتعامل مع الناس بصدر رحب وبإبتسامة لطيفة وبلاش تصدر ف وشهم عقدك وكلاكيعك لمجرد انك بتشك ف نفسك..كمان حاول تبطل تواضع وخد حقك ف التمركز بأريحية ف الصدارة طالما "تستاهلها"..مش لمجرد ان فاكر نفسك ومتخيل انك تستاهلها..


برج الحوت صحياً 


( نفسيا وجسمانيا وكل مايخص طاسة المزاج ):


صحتك تمام وف حالة جهوزية تامة للحب وللحياة..حاول بس تاخد بالك من جيوبك الانفية خصوصا بالنهار عشان مترجعش تشتكي من الصداع بالليل بدون داعي..


تعرف على توافق برج الحوت مع باقي الأبراج النهاردة:


متوافق مع الابراج الهوائية والبرمائية..



اعلان حظك اليوم دوت مصر