تعرف على حظك اليوم ل برج الجوزاء مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

حظك اليوم برج الجوزاء عاطفياً

( الكراش والإكس والبوي والجيرل فريند والجوز والزوجة والقرايب ):

إبعد عن الناس حبة وخليك مع نفسك النهاردة.. ركز ف المزيكا والاكل الحلو ودلع روحك.. مجهودك تجاه الناس ممنوش فايدة النهاردة.. اللي عاوز ينبسط ينبسط واللي مش عاوز عنه ما انبسط.. متوجعش دماغك بحد.

حظك اليوم برج الجوزاء عملياً

(الشغل والمذاكرة والتخطيط لبكرة ):

وراك تفاصيل وانشطة بسيطة جدا بس مهمة جدا ولطيفة جدا خصوصا لو ركزت انك تعملها بإستمتاع وحماسة..

حظك اليوم برج الجوزاء صحياً 

( نفسيا وجسمانيا وكل مايخص طاسة المزاج ):

صحتك محتاجة انك تحاول تخرج وتقعد حبة ف الشمس وتتفاءل وتفكر ف الحاجات الحلوة وتفكك من النكد خالص لانه ممنوش رجا ولا فايدة..

حظك الغذائي:

ابتدي اليوم بشكشوكة بيض وطماطم وفلفل وحتة جبنة بسيطة مبشورة وعيش مفقع وكراوية وانتا تنبسط وتزقطط جدا ان شاء الله..

شعارك اليوم:

دنيا كلها تمثيل وصعب تلاقى حد أصيل..

لونك اليوم:

الأخضر بكل درجاته..

إعرف توافق برج الجوزاء مع باقي الأبراج النهاردة

متوافق مع الابراج الكهربائية والخشبية والاخطبوطية والهوائية..

من مشاهير برج الجوزاء

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.