تعرف على حظك اليوم لبرج الثور مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم سواء اليوم أو كل يوم

حظك اليوم برج الثور عاطفياً

( الكراش والإكس والبوي والجيرل فريند والجوز والزوجة والقرايب ):

كرامتك اهم من الحب طبعا مفش كلام..خليها تنفعك بقى وخليها تونس وحدتك براحتها..إديها فرصتها بس وهي هتتعلم تعمل كدة.

حظك اليوم برج الثور عملياً: 

( الشغل والمذاكرة والتخطيط لبكرة ):

طالما مش عاوز حاجة وبتقول انك مش عاوزها يبقى متجريش وراها من تحت لتحت..المنطق بيقول كدة..

:حظك اليوم برج الثور صحيا

( نفسيا وجسمانيا وكل مايخص طاسة المزاج ):

صحتك زي الفل انتا بس غالبا بتتدلع عشان محتاج شوية اهتمام ودة مش هيحصل خصوصا وانك مبتديش اهتمام لأي حد وفاكر ان دة تكبير دماغ ف حين انه غرور مكلف لانك مسيرك تحتاج نفس الناس دي بعدين ياناصح..

حظك الغذائي:

شاورمة وطحينة وسلطة وتومية وامبسط وزقطط براحتك..ومتنساش الخيار المخلل..

شعارك اليوم:

حكاية من أيام الجدود..عمر القطط ما تعلي علي الأسود..

لونك اليوم:

بينك فاتح..

إعرف توافق برج الثور مع باقي الأبراج النهاردة

متوافق مع الابراج البلاستيكية والحلزونية والكتكوتية..

من مشاهير برج الثور

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.