إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

المفروض يبقى في بلاك فرايداي على المشاعر.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الجمعة 17/11/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

الشيكولاتة عندك اهم من البشر واساسا بتحلم كتير ببشر معمولة من الشيكولاتة..

برج الحمل عملياً

( الشغل والمذاكرة والتخطيط لبكرة ):

انتا محتاج تفرفش وتكبر دماغك من الدنيا والناس النهاردة.. شوف هتعمل دة ازاي..ياترى هتحتفل ف البيت ولا برة البيت.. ياترى هتعمل كل اللي نفسك فيه برة دماغك ولا جواها ف خيالك كالعادة وبس..وف كدة اللي يريحك وإعمله.

برج الحمل صحياً

( نفسيا وجسمانيا وكل مايخص طاسة المزاج ):

ضهرك بيتعبك عشان انتا مش مصدق تقريبا ان الشتا على الابواب وان الجو بقى سقعة خصوصا بالليل..تقل ف الهدوم وبلاش عند..

إعرف توافق برج الحمل مع باقي الأبراج النهاردة:

متوافق مع الابراج الحديدية والهوائية والمستحية..

إعرف حظك اليوم برج الثور بالتفصيل الجمعة 17/11/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

بتاع مصلحتك وبس..متعرفش غير انك عاوز حاجة ف بتشبط فيها وبتنسى وتتناسى اي حاجة تانية غيرها وبس..

برج الثور عملياً

( الشغل والمذاكرة والتخطيط لبكرة ): 

هتطير بخيالك النهاردة بعيد عن كل الناس وكل حد وهتنبسط حبة من نفسك..ف الاخر دة حقك ف حياتك.. ولا انتا شايف حاجة غير كدة.

برج الثور صحياً 

( نفسيا وجسمانيا وكل مايخص طاسة المزاج ):

صحتك كويسة وزي الفل بس انتا بس محتاج شوية اهتمام عشان تعرف تعيش بشكل تمام..

إعرف توافق برج الثور مع باقي الأبراج النهاردة:

متوافق مع الابراج الحلزونية والبلاستيكية..

إعرف حظك اليوم برج الجوزاء بالتفصيل الجمعة 17/11/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتعرف تحب وممكن تدي دروس ف الحب..بس عامل زي البحر..بتغرق اي حد لمجرد انك تقدر تغرقه..واضح ان شكل الحاجات وهي بتغرق حلو بالنسبالك غالبا ولا حاجة..

برج الجوزاء عملياً 

( الشغل والمذاكرة والتخطيط لبكرة ):

جايز مش طايق العالم ولا العالم طايقك..بس ف الاخر افتكر انكم مهما زعلتم من بعض ف الاخر ملكوش الا بعض.. ف خلص زعلك من الحياة وإرجع تاني اديها بالروصية ف مناخيرها وعاندها وإنبسط..

برج الجوزاء صحياً 

( نفسيا وجسمانيا وكل مايخص طاسة المزاج ):

هتحتاج النهاردة تعمل مساج عشان تفك عضلاتك حبة وهتحتاج تعمل ماسك جبنة بالقوطة وخيار برضة..

تعرف على توافق برج الجوزاء مع باقي الأبراج النهاردة:

متوافق مع الابراج البسبوسية والحلبسية والهوائية..

إعرف حظك اليوم برج السرطان بالتفصيل الجمعة 17/11/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتهري وتنكت ف روحك كتير جدا وعشان كدة دايما ردود افعالك بطيئة وصعب ترد ف نفس الوقت خصوصل لو اتهاجمت..بتحتاج تاخد وتدي مع نفسك وترجع ترد تاني يوم..بعد ما يكون الناس نست اساسا هي قالتلك ايه ولا عملتلك ايه..

برج السرطان عملياً 

( الشغل والمذاكرة والتخطيط لبكرة ):

شوفلك اي جنينة لطيفة نضيفة كدة مفيهاش نمل ولا ناس معاها حلل محشي واركن فيها حبة النهاردة.. نفسيتك محتاجة تشوف لون اخضر كتير جدا النهاردة.

برج السرطان صحياً 

(نفسيا وجسمانيا وكل مايخص طاسة المزاج ):

طول مانتا بعيد عن العصبية كل حاجة هتبقى جميلة وفلة..حاول بس تفرد ضهرك ومتقعدش اكتر من ساعة..اتحرك حبة..واهتم ببشرتك وبلاش اهمال..

تعرف على توافق برج السرطان مع باقي الأبراج النهاردة:

متوافق مع الابراج البرية والبحرية..

إعرف حظك اليوم برج الأسد بالتفصيل الجمعة 17/11/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متعالي على ايه..عارف حاجة احنا مش عارفينها مثلا ولا جايب نتيجة الحياة من الكنترول من ورانا ولا ايه حكايتك بالظبط؟..

برج الأسد عملياً 

( الشغل والمذاكرة والتخطيط لبكرة ):

متشحتف دايما على الحاجات الغلط ليه.. ليه دايما كل احلامك مستحيلة كدة..بتتعمد تصعب الحياة على نفسك كدة ليه.

برج الأسد صحياً 

( نفسيا وجسمانيا وكل مايخص طاسة المزاج ):

مهم تلعب رياضة اول ماتصحى من النوم..وطبعا انتا كسول ومش هتلعب ولا حاجة..بالتالي حاول تفرك حبة ف السرير لمدة ربع ساعة ونأمل من الحياة انها تكون طيبة معاك وتقدر المجهود دة وتعتبره رياضة..

تعرف على توافق برج الأسد مع باقي الأبراج النهاردة:

متوافق مع الابراج الحسواكية والسوبيائية زي إمبارح..

إعرف حظك اليوم برج العذراء بالتفصيل الجمعة 17/11/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ماهو ياتتغير وتبطل نكد وشحتفة او ان الدنيا والحياة والناس هيدوك كل يوم اسباب جديدة تتنكد عشانها..حاول تنبسط حبة وبلاش تكشير..

برج العذراء عملياً 

( الشغل والمذاكرة والتخطيط لبكرة ):

خد بالك عشان في عواصف نفسية جاية ف الطريق.. حاول متتخانقش مع حد النهاردة.

برج العذراء صحياً 

( نفسيا وجسمانيا وكل مايخص طاسة المزاج ):

بلاش مجهود كتير ف حاجات ممنهاش رجا..وفر مجهودك عشان هتحتاجه قريب..

تعرف على توافق برج العذراء مع باقي الأبراج النهاردة:

متوافق مع الابراج البربوشية والخضرائية..

إعرف حظك اليوم برج الميزان بالتفصيل الجمعة 17/11/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تثبت على حال ومحتاج تستقر وتختار انتا فعلا محتاج ايه وليه وامتى..الحيرة المفرطة دي هتوديك ورا الشمس لو فضلت ماشي وراها..

برج الميزان عملياً 

( الشغل والمذاكرة والتخطيط لبكرة ):

حالة إنبهار جديدة بحاجة جديدة..حماسة فائقة وأمل وزقططة.. يابختك طبعا بالحالة دي مفيش كلام..انبسط بيها على قد ماتقدر قبل ماتقلب عليها وتمشي.

برج الميزان صحياً 

( نفسيا وجسمانيا وكل مايخص طاسة المزاج ):

محتاج تتفسح وتنبسط حبة..قولنا الكلام دة امبارح وانتا واضح طنشته ومعملتوش..

تعرف على توافق برج الميزان مع باقي الأبراج النهاردة:

متوافق مع الابراج الزلومية والفسيفسائية زي إمبارح..

إعرف حظك اليوم برج العقرب بالتفصيل الجمعة 17/11/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مش محتاج تعمل اي استعراضات للقوة او للمتانة خصوصا وانك ف الاخر نفسيتك سهتانة وكلنا عارفين كدة..

برج العقرب عملياً 

( الشغل والمذاكرة والتخطيط لبكرة ):

متخرجش برة قوقعتك النفسية عشان تهبش ف حد.. ميستاهلوش إهتمامك..ثم خليك ف حالك.

برج العقرب صحياً 

( نفسيا وجسمانيا وكل مايخص طاسة المزاج ):

واضح انك هترجع للدايت تاني ومن نفسك..حاول تركز من تاني ف الاكل الخفيف وبلاش عيش كتير ولا رز ولا مكرونة ولا شوربة كوارع النهاردة..ركز ف السمك احسن..

تعرف على توافق برج العقرب مع باقي الأبراج النهاردة:

متوافق مع الابراج الفهلوية والشرشوبية..

إعرف حظك اليوم برج القوس بالتفصيل الجمعة 17/11/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

تركيزك كله انك تكسب الصراع والمنافسة حتى لو كانت على حاجة انتا مش عاوزها اصلا..مبتحبش حد يغلبك وخلاص..مبتفهمش دة..

برج القوس عملياً 

( الشغل والمذاكرة والتخطيط لبكرة ):

الألوان النهاردة هي الحل الوحيد لكل حاجة.. البهجة البصرية النهاردة هتبقى أهم من اي حاجة تانية فجأة.. إستمتع.

برج القوس صحياً 

( نفسيا وجسمانيا وكل مايخص طاسة المزاج ):

إحترس من الكحة ومن البرد ودفي نفسك واشرب جنزبيل ولمون وقرفة كتير النهاردة..بلاش كاكاو خالص..عشان ممكن يعمل عكوسات ملهاش لازمة..وممكن تشكلك ازمة..

تعرف على توافق برج القوس مع باقي الأبراج النهاردة:

متوافق مع الابراج الكستورية والبللورية..

إعرف حظك اليوم برج الجدي بالتفصيل الجمعة 17/11/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عندك ميل فطري للمغامرة دايما وشجاعة تتحسد عليها..بس دة بينتج عنه دايما مرازية ومشاكل ومصايب لأنك بتتهور وبعدين تتعور وبعدين ترجع تزعل من نفسك وتشتكي..

برج الجدي عملياً 

( الشغل والمذاكرة والتخطيط لبكرة ):

مش من حق حد يقولك تعمل ايه وامتى..انتا كبير كفاية تحدد لنفسك..بس مفيش اي مانع تسمع برضة لوجهات النظر خصوصا لو مش متطفلة ولا بتلزمك بتنفيذ نصايحها..ثق ف نفسك وإسمع وخلاص.

برج الجدي صحياً 

( نفسيا وجسمانيا وكل مايخص طاسة المزاج ):

النهاردة افلام ومسلسلات واغاني ونوم وأكل وشرب وعصير ونوم تاني..نفسيتك محتاجة النعنشة دي بكل تأكيد..

تعرف على توافق برج الجدي مع باقي الأبراج النهاردة:

متوافق مع الابراج الحسواكية والفنكوشية..

إعرف حظك اليوم برج الدلو بالتفصيل الجمعة 17/11/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متفتريش على حد..الحياة مش ناقصاك ولا ناقصة عقدك وكلاكيعك خالص النهاردة..الناس اتخنقت منك ومن حساسيتك الأوفر خلاص..

برج الدلو عملياً 

( الشغل والمذاكرة والتخطيط لبكرة ):

المفروض أقولك إحترس من الكلب بس ف الحقيقة الكلب هو اللي المفروض يحترس منك ومن شرك النهاردة.. واضح انك موجوع وواضح انك ف مود شرس النهاردة.

برج الدلو صحياً 

( نفسيا وجسمانيا وكل مايخص طاسة المزاج ):

خد بالك من نفسك وإهتم انتا معدتش صغير..إهتم حبة من فضلك..

تعرف على توافق برج الدلو مع باقي الأبراج النهاردة:

متوافق مع الابراج الترابية..

إعرف حظك اليوم برج الحوت بالتفصيل الجمعة 17/11/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تبطل تجري ورا صورتك المثالية اللي معذباك ف خيالك دي خصوصا وانها لاتمت بصلة لصورتك ف الواقع..

برج الحوت عملياً 

( الشغل والمذاكرة والتخطيط لبكرة ):

الشيكولاتة هي الحل طبعا..سواء للنقص اللي مقلل مزاجك او لمزاج الناس اللي بتتعمد تقل من مزاجك..هات لنفسك شيكولاتة وهاتلهم برضة شيكولاتة واهي تبقى حاجة يتلهوا فيها حبة عنك برضة وخير بتعمله مسيره يتردلك ف يوم.

برج الحوت صحياً 

( نفسيا وجسمانيا وكل مايخص طاسة المزاج ):

بلاش معسل ع الريق عشان صدرك ميغشلقش منك فجأة وترجع تكح تراب..

تعرف على توافق برج الحوت مع باقي الأبراج النهاردة:

متوافق مع الابراج الفسفورية..