إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

: كلام جد

عمرك سألتي نفسك هل انتي كايدة العزال ف حياتك ولا لأ؟.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

حظك اليوم برج الحمل دوت مصر
حظك اليوم برج الحمل دوت مصر

إعرف حظك اليوم برج الحمل بالتفصيل الثلاثاء 14/11/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

الفلوس بالنسبالك مهمة رغم انك بتدعي العكس..كمان اناني جدا ومبتفكرش معظم الوقت غير ف نفسك وبس ودة بيعملك مشاكل كتير كمان بتشتهر بانك المشتبه فيه الاول والاخير ف كل قضايا سرقة الشيكولاتة بتاعة الابراج التانية من التلاجة..

برج الحمل عملياً

( الشغل والمذاكرة والتخطيط لبكرة ):

المود النهاردة فيه معيلة بشكل كبير..من حقك تجيب بلالين والوان وترسم وتنفخ البلالين وترقص وتزقطط وتنبسط وتلعب النهاردة براحتك..دة حقك وإوعى تتكسف منه..

برج الحمل صحياً

( نفسيا وجسمانيا وكل مايخص طاسة المزاج ):

متفتحش الكبوت إلا لميكانيكي شاطر وبس وخد بالك عشان واضح ان في كتاوت عاوزة تتغير عشان النور العالي مش شغال عندك واحتمال تحتاج تغير تيل فرامل برضة بالمرة..

إعرف توافق برج الحمل مع باقي الأبراج النهاردة:

متوافق مع الابراج الحرنكشية والمائية والهوائية..

حظك اليوم برج الثور دوت مصر
حظك اليوم برج الثور دوت مصر

إعرف حظك اليوم برج الثور بالتفصيل الثلاثاء 14/11/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

العند اكبر مشاكلك يليها علاطول احساسك انك مش واخد وضعك ف الحياة او عند الناس ودة دايما بيدفعك للصدام والخناق ولإثبات انك اجمد منهم وبتعرف تاخد حقك ومبتسكتش للظلم ابدا لو قرب منك او من طراطيف نفسيتك..

برج الثور عملياً

( الشغل والمذاكرة والتخطيط لبكرة ):

متفتحش صدرك اوي للدنيا النهاردة عشان انتا من جواك غلبان وطيب وكلنا عارفين كدة كويس وأي محاولة لطمس الحقيقة دي او للتظاهر بعكسها مش هتنجح ومسيرها هتتكشف..

برج الثور صحياً

( نفسيا وجسمانيا وكل مايخص طاسة المزاج ):

صوت الكركبة اللي بتسمعه وانتا ماشي على السرعة العالية دة جاي من الكارونة..واضح ان فيها مشاكل او انك ببساطة محتاج تغير ديسك واسطوانة..كمان متنساش ان صليبة عمود الكردان بتعمل نفس المشكلة دي..شيك عليها بالمرة بقى طالما هتفك وتركب بالمرة واهو يبقى اسمك اتطمنت على ادوات الجر كلها مرة واحدة..

إعرف توافق برج الثور مع باقي الأبراج النهاردة:

متوافق مع الابراج البلاستيكية والحديدية والبرمائية..

حظك اليوم برج الجوزاء دوت مصر
حظك اليوم برج الجوزاء دوت مصر

إعرف حظك اليوم برج الجوزاء بالتفصيل الثلاثاء 14/11/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً

( الكراش والإكس والبوي فريند والجيرل فريند والجوز والزوجة والقرايب ):

متناقض وغامض ومتعب جدا ف التعامل ومن الصعب التكهن بأي رد فعل ليك..محير واوقات خنيق ومش مفهوم وبتحب تطلع صح وخلاص عشان صورتك قدام نفسك متتهزش لاسمح الله..

برج الجوزاء عملياً

( الشغل والمذاكرة والتخطيط لبكرة ):

هتحس ان الناس كلها بتبص عليك وانتا ماشي ف الشارع بالنهار..عادي..متخليش حد يفقدك ثقتك بنفسك..إوعى..

برج الجوزاء صحياً

( نفسيا وجسمانيا وكل مايخص طاسة المزاج ):

حاول تشحن البطارية كويس وترش على كابلاتها مية سخنة الصبح عشان تعرف تدور وتطلع علاطول من غير غلبة كتير..

تعرف على توافق برج الجوزاء مع باقي الأبراج النهاردة:

متوافق مع الابراج البسبوسية والحلبسية والمائية..

حظك اليوم برج السرطان دوت مصر
حظك اليوم برج السرطان دوت مصر

إعرف حظك اليوم برج السرطان بالتفصيل الثلاثاء 14/11/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً

( الكراش والإكس والبوي فريند والجيرل فريند والجوز والزوجة والقرايب ):

حساس بزيادة ياحمادة تجاه كل كلام وتصرفات الناس حتى لو مش انتا المقصود بيها..بتحب تعمل مناحة وتعزم عليها ناس يعيطوا معاك طول الوقت..

برج السرطان عملياً

( الشغل والمذاكرة والتخطيط لبكرة ):

متنصحش حد ف حياته وبلاش فتي..شوف حياتك الاول واعدلها وحل مشاكلها وبعد كدة ابقى اعمل فتك ع الناس..

برج السرطان صحياً

(نفسيا وجسمانيا وكل مايخص طاسة المزاج ):

إهتم بسنانك كويس وبلاش اهمال..السنان اوقات من اهم اجزاء الانسان..اهتم بيها عشان تعرف تبتسم وتضحك براحتك..

تعرف على توافق برج السرطان مع باقي الأبراج النهاردة:

متوافق مع الابراج الشرشوبية والزغلولية والعسلية..

حظك اليوم برج الأسد دوت مصر
حظك اليوم برج الأسد دوت مصر

إعرف حظك اليوم برج الأسد بالتفصيل الثلاثاء 14/11/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً

( الكراش والإكس والبوي فريند والجيرل فريند والجوز والزوجة والقرايب ):

بالنسبالك اوقات كتير جدا مهم تبقى مزعل الناس منك ومصطدم بيهم وخانقهم لا لشيئ الا انك بتحب تشوفهم متكدرين وخلاص من باب التسالي..

برج الأسد عملياً

( الشغل والمذاكرة والتخطيط لبكرة ):

من جواك خايف من مواجهة العالم النهاردة لسبب ما غامض او انتا اللي عارفه وبس..من برة بتمثل انك جامد ومبيهمكش ومش فارقة معاك ف حين ان كل تفصيلة بقت تعلم وتفرق معاك جدا فجأة..مشاعرك واضح انها بتصحصح وانتا بتتغير..مبروك عليك..

برج الأسد صحياً

( نفسيا وجسمانيا وكل مايخص طاسة المزاج ):

صحتك كويسة وماشي حالها بس محتاج تربط العفشة عشان متسمعش شخللة وتخبيط وانتا ماشي..مش اكتر..

تعرف على توافق برج الأسد مع باقي الأبراج النهاردة:

متوافق مع الابراج الحسواكية والسوبيائية..

حظك اليوم برج العذراء دوت مصر
حظك اليوم برج العذراء دوت مصر

إعرف حظك اليوم برج العذراء بالتفصيل الثلاثاء 14/11/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً

( الكراش والإكس والبوي فريند والجيرل فريند والجوز والزوجة والقرايب ):

بتهتم بالتفاصيل على حساب الصورة الكبيرة ودة بيتوهك كتير جدا..كمان مهم بالنسباك تحس طول الوقت انك مترفع عن الصغائر ف حين انك ف البليلة

برج العذراء عملياً

( الشغل والمذاكرة والتخطيط لبكرة ):

هتطير النهاردة ف احلام اليقظة وانتا صاحي وبتتحرك وبتتعامل ..واضح انك حابب تعيش ف خيالك حبة ودة مش حاجة وحشة ابدا..بالعكس دة حقك..بالهنا على دماغك..إستمتع..

برج العذراء صحياً

( نفسيا وجسمانيا وكل مايخص طاسة المزاج ):

راعي قولونك حبة وراعي انك كبرت ومبقتش تقدر تخش شمال ف اي اكل دسم ومعدتك بعدين تبقى تتصرف معاه..الطريقة دي لازم تختفي من حياتك وبسرعة والا هتحتاج عمرة وصيانة والحاجات دي بقت مكلفة اليومين دول خد بالك..

تعرف على توافق برج العذراء مع باقي الأبراج النهاردة:

متوافق مع الابراج المائية والحللولية والبربوشية..

حظك اليوم برج الميزان دوت مصر
حظك اليوم برج الميزان دوت مصر

إعرف حظك اليوم برج الميزان بالتفصيل الثلاثاء 14/11/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً

( الكراش والإكس والبوي فريند والجيرل فريند والجوز والزوجة والقرايب ):

متقلب لدرجة تخنق اي حد مركز معاك او بيفكر يحبك..كمان لما بتقرر تفتح ف النكد مبتعرفش تقفل الحنفية خالص مهما حصل..

برج الميزان عملياً

( الشغل والمذاكرة والتخطيط لبكرة ):

هتشوف حاجة مبهرة النهاردة وهتعجبك جدا وهتقف حبة قدامها تتفرج عليها مندهش ومتسائل وبعدين هتمشي وتنساها وتنسى خالص انها حصلت اساسا وهتروح تنام.. خد بالك بقى عشان الحاجة دي هتجيلك ف احلامك الليلة..خد بالك كويس..

برج الميزان صحياً

( نفسيا وجسمانيا وكل مايخص طاسة المزاج ):

شاي اخضر كتير بالنهار واسود بالليل..وخد بالك عشان الريادياتير مش شغال كويس ومحتاج يتسلك وينضف عشان دورة المية تبرد الموتور بشكل صحيح..كمان خد بالك ان في اشارة ورا مش شغالة..غالبا في فيوز ضارب ولا حاجة..

تعرف على توافق برج الميزان مع باقي الأبراج النهاردة:

متوافق مع الابراج الزلومية والنارية والترابية..

حظك اليوم برج العقرب دوت مصر
حظك اليوم برج العقرب دوت مصر

إعرف حظك اليوم برج العقرب بالتفصيل الثلاثاء 14/11/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً

( الكراش والإكس والبوي فريند والجيرل فريند والجوز والزوجة والقرايب ):

المهم عندك تبان قدام الناس كويس مش انك تبقى فعلا كويس من جواك وف تفاصيلك وف حياتك..

برج العقرب عملياً

( الشغل والمذاكرة والتخطيط لبكرة ):

متقوقع جوة نفسك النهاردة وحاسس انك محتاج حماية من كيد ومرازية الحياة والناس.. واضح انك تعبت من كتر الخناق..ريح حبة وإهدى كدة على روحك وكل حاجة هترجع زي الفل قريب غن شاء الله..حاول بس متشربش قهوة سادة النهاردة عشان هتعملك عكوسات ملهاش لازمة ف نفسيتك وانتا مش ناقص عكوسات

برج العقرب صحياً

( نفسيا وجسمانيا وكل مايخص طاسة المزاج ):

صحتك كويسة وماشي حالها..اهتم بس حبة صغننة بالدايت عشان مترجعش تندم او تزعل مستقبلا بسبب اي وزن زايد مفاجئ..

تعرف على توافق برج العقرب مع باقي الأبراج النهاردة:

متوافق مع الابراج الهوائية والترابية والفسفورية..

حظك اليوم برج القوس دوت مصر
حظك اليوم برج القوس دوت مصر

إعرف حظك اليوم برج القوس بالتفصيل الثلاثاء 14/11/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً

( الكراش والإكس والبوي فريند والجيرل فريند والجوز والزوجة والقرايب ):

مهتم تبان احسن من الناس طول الوقت وبتتنطط عليهم لمجرد انك نفسك تحس انك برنس ف نفسك وخلاص..طب ماهو ممكن جدا تكون الناس دي كلها بتطبلك وبتاخدك على قد عقلك من باب تكبير الدماغ وخلاص..ثم لما تحتاج حد يقولك حاجة بصراحة عن نفسك هتعمل ايه ساعتها؟..دة سؤال مهم..

برج القوس عملياً

( الشغل والمذاكرة والتخطيط لبكرة ):

خف على نفسك ف المغامرات النهاردة حبة لتتعكش وتتفقس وكل شيئ ينكشف ويبان وساعتها مش هتعرف تتصرف..كمن بلاش اي عنف لفظي النهاردة تجاه اي حد..خليك كيوت وطيب النهاردة..ولو معرفتش يبقى على الاقل حاول تمثل الدور دة على قد ماتقدر عشان اليوم يعدي بس مش اكتر..

برج القوس صحياً

( نفسيا وجسمانيا وكل مايخص طاسة المزاج ):

صحتك كويسة بس هتحتاج سمكرة عاطفية قريب خلي بالك وحط ف دماغك تاخد اليوم دة اجازة عشان الخبطات اللي عندك صعب تترد ع البارد وهتاخد وقت ومجهود..

تعرف على توافق برج القوس مع باقي الأبراج النهاردة:

متوافق مع الابراج الفسيفسائية والنارية..

حظك اليوم برج الجدي دوت مصر
حظك اليوم برج الجدي دوت مصر

إعرف حظك اليوم برج الجدي بالتفصيل الثلاثاء 14/11/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول متبقاش نصاب على الناس اللي بتحبك وبطل تستغلهم لمصلحتك وبعد كدة ترميهم وتجري ولا كأنك كنت تعرفهم..بلاش ندالة..عيب..

برج الجدي عملياً

( الشغل والمذاكرة والتخطيط لبكرة ):

هترجع لذكريات حلوة النهاردة وهتنبسط..كمان مهم تعمل الليلة اي حاجة ابداعية فنية بايديك..دة مهم لطاسة مزاجك جدا جدا..

برج الجدي صحياً

( نفسيا وجسمانيا وكل مايخص طاسة المزاج ):

قدامك سفر ومحتاج تاخد كل احتياطاتك الممكنة واللي مش ممكنة عشان تتسلى ف الطريق..مجلدات ميكي وعصير وسندوتشات ومزيكا كتير بقى..

تعرف على توافق برج الجدي مع باقي الأبراج النهاردة:

متوافق مع الابراج الفسفورية والمائية..

حظك اليوم برج الدلو دوت مصر
حظك اليوم برج الدلو دوت مصر

إعرف حظك اليوم برج الدلو بالتفصيل الثلاثاء 14/11/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً

( الكراش والإكس والبوي فريند والجيرل فريند والجوز والزوجة والقرايب ):

ابعد عن الرغي الكتير وانتا تبقى كويس وزي الفل وتجنب انك تقول كلام لحد ميستاهلوش..بلاش نظرية الخير اللي بترميه ف البحر دة لتغرق..بلاش سذاجة..

برج الدلو عملياً

( الشغل والمذاكرة والتخطيط لبكرة ):

سوق مشاعرك كويس وخلي بالك من المطبات العاطفية اللي هتقابلك النهاردة ف الطريق..وأهم حاجة تآمن نفسك ف إير باج كويسة وحنينة عشان تبقى ماشي وانتا متطمن..

برج الدلو صحياً

( نفسيا وجسمانيا وكل مايخص طاسة المزاج ):

محتاج تهتم بالسباكة وتشرب مية كتير جدا ومحتاج برضة تهتم بصدرك عشان متضطرش تاخد ادوية من تاني..إهتم بنفسك وبلاش إهمال ف صحتك..انتا كبير..عيب اللي بتعمله دة..

تعرف على توافق برج الدلو مع باقي الأبراج النهاردة:

متوافق مع الابراج الترابية والفنكوشية

حظك اليوم برج الحوت دوت مصر
حظك اليوم برج الحوت دوت مصر

إعرف حظك اليوم برج الحوت بالتفصيل الثلاثاء 14/11/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً

( الكراش والإكس والبوي فريند والجيرل فريند والجوز والزوجة والقرايب ):

بتقول طول الوقت كلام وبتعمل عكسه ليه يا برج الحوت ؟..هل مش واخد بالك ان الناس حواليك مركزين وواخدين بالهم من تصرفاتك ولا مش فارق معاك التناقض دة؟..امرك عجيب والله..

برج الحوت عملياً

( الشغل والمذاكرة والتخطيط لبكرة ):

خد بالك ان الكراش او الإكس بتاعك غالبا هيخطب أو هيتجوز النهاردة..ألف مبروك يامعلم..

برج الحوت صحياً

( نفسيا وجسمانيا وكل مايخص طاسة المزاج ):

عندك مشاكل ف العفشة ممكن تتظبط بشوية تشحيم ومساج عاجل.. حاول تهتم عشان متضطرش مستقبلا تغير جلب ومقصات..إهتم بضهرك حبة واقعد بشكل صحيح ومتشيلش حاجة تقيلة.. بلاش عفتقة انتا مش ناقص..

تعرف على توافق برج الحوت مع باقي الأبراج النهاردة:

متوافق مع الابراج المائية والبرمائية..