التوقيت الثلاثاء، 19 مارس 2024
التوقيت 01:45 م , بتوقيت القاهرة

حظك اليوم الاثنين 23/10/2017 ..الثور..مناخيرك حلوة وبتلمع

حظك اليوم وتوقعات الأبراج مع عبدالله أحمد الاثنين 23/10/2017
حظك اليوم وتوقعات الأبراج مع عبدالله أحمد الاثنين 23/10/2017

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


طبيعي الناس تحس بالوحدة طول ماكل واحد مستني التاني يكلمه الاول.


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل الاثنين 23/10/2017 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


حالة البحث عن الحب مستمرة رغم الإحباطات المستمرة من الناس ومن الحياة ورغم تقلبات الظروف..كمان واضح انه لسة جواك حتة كبيرة مصدقة ف التفاؤل والأمل ف بكرة بشكل عام.. يابختك بصراحة..حافظ على الحالة دي تحت اي بند وتحت اي ظرف لأنها ميزة كبيرة جدا جدا وكنز ياريت متتخلاش عنه ابدا..


برج الحمل عملياً


( الشغل والمذاكرة والتخطيط لبكرة ):


هانت يامعلم وقريب هتتحين بفلوس ان شاء الله..حاول متوقفش انبساطك عليه بشكل كامل عشان الفلوس مهما كانت كتير مسيرها ف الاخر بتتصرف وتختفي متفهمش ف ايه اليومين دول..


برج الحمل صحياً


( نفسيا وجسمانيا وكل مايخص طاسة المزاج ):


كتر حبة من السوايل والعصاير الفريش ف حياتك النهاردة..وياريت تدلع نفسك ف طبق كشري بالدقة لو محتار تاكل ايه..لو مش محتار ومحدد مسبقا هتاكل ايه برضة تقدر تاكل كشري خصوصا وانه الواحد بيجوع بعد مابياكله بساعة بالظبط..إستمتع


إعرف توافق برج الحمل مع باقي الأبراج النهاردة:


متوافق مع الابراج الهوائية والمعدنية


حظك اليوم برج الثور دوت مصر


إعرف حظك اليوم برج الثور الاثنين 23/10/2017 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


حالة من السعادة الغامرة ممكن تهاجم مشاعرك اليوم بدون سبب واضح..باين عليك عندك حاجة تفرحك ف المستخبي ومداريها من العيون عشان متتحسدش.. كمان خد بالك ان مناخيرك حلوة وبتلمع.


برج الثور عملياً


( الشغل والمذاكرة والتخطيط لبكرة ): 


روق على حالك النهاردة بمزيكا كتير جدا وحاول ترقص حبة مع نفسك كدة وتبتهج عشان في حاجات حلوة كتير هتحصل النهاردة..الشرط الوحيد هو انك لما تقرر تنزل من البيت النهاردة ياريت تنزل مزقطط ومبسوط وبتضحك..مش مكشر ومأريف وناوي ترازي ف العالم ف تفاصيل تفاصيله


برج الثور صحياً 


( نفسيا وجسمانيا وكل مايخص طاسة المزاج ):


كل حاجة ماشي حالها النهاردة على مستوى الصحة والنفسية بس خلي بالك من كلاب الشوارع النهاردة خصوصا بالليل..


إعرف توافق برج الثور مع باقي الأبراج النهاردة:


متوافق مع الابراج الهوائية والحنجورية


حظك اليوم برج الجوزاء دوت مصر


إعرف حظك اليوم برج الجوزاء الاثنين 23/10/2017 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


ابعد عن الضلمة العاطفية والنفسية اللي انتا قاعد فيها اليومين دول واشغل نفسك بمزاجك وبس وحاول تبطل تعيش ف دور الطيب بزيادة..حياتك مليانة تفاصيل محتاجة منك اهتمام شديد وتركيز..اشغل نفسك بيها وبس ومتسمعش لشكوى او لمشاكل وهموم من حد خصوصا وانك معندكش حل واضح لمشاكلك عشان يبقى عندك وقت ودماغ تفكر ف حلول لمشاكل اي حد..


برج الجوزاء عملياً 


( الشغل والمذاكرة والتخطيط لبكرة ):


في حد هيديك حاجة قيمة النهاردة.. حاول تتفهم الموقف وتقدر اهمية الحاجة دي ومتكسفش ايده..جايز تستفيد منها وجايز لأ..ف كل الاحوال حاول متزعلوش


برج الجوزاء صحياً 


( نفسيا وجسمانيا وكل مايخص طاسة المزاج ):


النفسية مستحية النهاردة ومكسوفة من الحياة ومحتاجة تاخد بايدها وتخرها حبة ف النور وتشمس عليها حبة وتعزمها على اي حاجة حلوة برة يمكن ترجع تنبسط من تاني..خد بالك بس من مناخيرك النهاردة..


تعرف على توافق برج الجوزاء مع باقي الأبراج النهاردة:


متوافق مع الابراج الفنكوشية والبرمائية


حظك اليوم برج السرطان دوت مصر


إعرف حظك اليوم برج السرطان الاثنين 23/10/2017 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتحس النهاردة ان الدنيا ضدك حبة وبتعاندك.. واجه بشجاعة وميهمكش منها ولا من اي حد..واجه وبقوة.


برج السرطان عملياً 


( الشغل والمذاكرة والتخطيط لبكرة ):


خوفك من التقلبات الجوية والنفسية للمحيطين بيك هو اللي عاملك ازمة ف التعامل مع العالم بشكل عام..حاول تقلل من حساسيتك تجاه النقد..انتا بتحس فجأة ان العالم كله ضدك لما حد بينتقدك ودة ممكن يقلب بعقدة اضطهاد..كمان خد بالك من بشرتك النهاردة واهتم بيها..


برج السرطان صحياً 


(نفسيا وجسمانيا وكل مايخص طاسة المزاج ):


متقلقش..مسيرك تلعب بالفلوس لعب ان شاء الله..صفي نيتك بس واعمل اللي عليك والحياة لو ليها مزاج هتغرقك ف الفلوس لحد ماتزهق منها..روق انتا بس ومتضايقش نفسك وكل حاجة هتبقى فل قريب ان شاء الله..


تعرف على توافق برج السرطان مع باقي الأبراج النهاردة:


متوافق مع الابراج النارية والهوائية والخشبية


حظك اليوم برج الا?سد دوت مصر


إعرف حظك اليوم برج الأسد الاثنين 23/10/2017 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تقلل حبة من نرجسيتك النهاردة ف التعامل مع الاحباء والاقارب وياريت تاخد بالك انه الغرور ممكن يعملك مشاكل كتير جدا خصوصا لو كان ف الاساس ترفع عن المشاركة ف الامور التافهة ف الحياة..التصرف دة بيتفهم من ناس كتير على انه غرور ونرجسية..معلش اعذرهم..معظم الامور اللي تخص البشر اساسا تافهة والناس اتعودت عليها ف مش هياخدوا بالهم من تفاهتها زي مانتا بتعمل..حاول تشارك بشكل بسيط خالص..مش عيب على فكرة..


برج الأسد عملياً 


( الشغل والمذاكرة والتخطيط لبكرة ):


هتعمل حاجة ناجحة جدا النهاردة لو ركزت وصفيت نيتك وفكيتك من الناس وكلامهم وعملت اللي انتا مقتنع بيه وبس..كل ماتكبر دماغك النهاردة كل ماهتستريح..ركز بس ف اللي ف ايدك وملكش دعوة بحد خالص..


برج الأسد صحياً 


( نفسيا وجسمانيا وكل مايخص طاسة المزاج ):


صحتك كويسة وزي الفل..خد بالك بس من تقلبات الجو وتأثيره على مزاجك..كمان ياريت تبتدي تتجه للمأكولات البحرية النهاردة..هتروق وتنبسط


تعرف على توافق برج الأسد مع باقي الأبراج النهاردة:


متوافق مع الابراج السمكية


حظك اليوم برج العذراء دوت مصر


إعرف حظك اليوم برج العذراء الاثنين 23/10/2017 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تبقى هادي النهاردة قدر الإمكان عشان احتمال كبير يبقى في حب من نوع نادر ف طريقك وانتا ماشي..اي عصبية هتفسده واي رد فعل مش محسوب بدقة ممكن يطفشه خالص وهتلاقي نفسك فجأة قاعد من غير حب وهتحتاس ومش هتعرف تتصرف..ف خلي بالك..خلي بالك يامعلم..


برج العذراء عملياً 


( الشغل والمذاكرة والتخطيط لبكرة ):


في حد هيقولك حاجة هو متخيل انها مهمة النهاردة وهتفرق معاك..جايز تكون نصيحة او جايز مجرد ملاحظة..ف كل الاحوال إسمع ومتعلقش.. إسمع وإبتسم وبس..


برج العذراء صحياً 


( نفسيا وجسمانيا وكل مايخص طاسة المزاج ):


بقالك كتير مكلتش مسقعة باللحمة المفرومة..حاول تاكل النهاردة مسقعة خصوصا وانها فال خير النهاردة..بالهنا على قلبك..


تعرف على توافق برج العذراء مع باقي الأبراج النهاردة:


متوافق مع الابراج الطينية والهوائية زي إمبارح


حظك اليوم برج الميزان دوت مصر


إعرف حظك اليوم برج الميزان الاثنين 23/10/2017 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متحيرش نفسك ومتغطسش كتير ف التفكير ف مشاعرك المتقلبة..القلب مالوش قوانين ولا منطق ولا حد يعرف على اي اساس بيحب او بيعجب بحد او حتى بيكره..سيب نفسك للإنبساط النهاردة وحاول متقاومش امواج التغيير..خف تعوم أحسن وأروق..


برج الميزان عملياً 


( الشغل والمذاكرة والتخطيط لبكرة ):


متستخباش من الناس النهاردة.. إظهر وإلمع وخد وضعك وثق ف نفسك كدة ولعلع.. انتا مش هش ولا ضعيف..إجمد ياوحش..إجمد.


برج الميزان صحياً 


( نفسيا وجسمانيا وكل مايخص طاسة المزاج ):


روق على نفسيتك الليلة بالخروج ف مكان يكون جديد عليك ومش مكلف وياحبذا لو تشوف حد يعزمك..مفيهاش اي مشكلة ولا هي حاجة عيب..ثم انتا اكيد عزمت حد قبل كدة ف حتة جديدة برضة..آن الآوان يردهالك خصوصا واحنا اخر الشهر ومفيش لسة كاشات..


تعرف على توافق برج الميزان مع باقي الأبراج النهاردة:


متوافق مع الابراج الحنكوشية المائية والهوائية المستحية


حظك اليوم برج العقرب دوت مصر


إعرف حظك اليوم برج العقرب الاثنين 23/10/2017 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تبقى مرن النهاردة مع الناس حواليك حبة وياريت تاخد بالك من قلبك خصوصا بالليل.


برج العقرب عملياً 


( الشغل والمذاكرة والتخطيط لبكرة ):


محتاج مرونة ف حياتك ف كل حاجة بشكل عاجل..محتاج تتساهل حبة مع الناس وتصبر ومتبقاش متشدد ف طلباتك او ف تعاملاتك بشكل عام..كمان انتا محتاج تخف شوية السلخ على نفسك..تأنيب الضمير المستمر دة مش لطيف ومش مفيد ف حاجة..كل حاجة انتا مريت بيها شكلت طباعك وطورت من شخصيتك..حاول تستوعب المسألة بشكل ناضج يليق بيك..


برج العقرب صحياً 


( نفسيا وجسمانيا وكل مايخص طاسة المزاج ):


تقدر تركز النهاردة مع الخس والجزر والخيار والفاكهة بشكل عام..تجنب الشطة والملح الكتير وحاول تقلل السكر خصوصا ف المشروبات..كمان بلاش عك ف الاكل بالليل..حالة النقنقة اللي بتنتابك بعد المغرب دي ممكن تبوظلك الدايت اللي انتا بتقول انك بتعمله وملتزم بيه..كمان ياريت تاخد بالك من مشاعرك وقلبك خصوصا بالليل عشان في حالة من الهفهفة والرومانسية المفاجئة هتعدي عليك بالليل وممكن تتسبب ف دراما وشحتفة كبيرة بدون لازمة وممكن بعد الشر تعمل ازمة..


تعرف على توافق برج العقرب مع باقي الأبراج النهاردة:


متوافق مع الابراج الكتكوتية والترابية


حظك اليوم برج القوس دوت مصر


إعرف حظك اليوم برج القوس الاثنين 23/10/2017 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متقعدش وشعرك منكوش عشان متعملش لنفسك عكوسات ملهاش لازمة.. كمان انتا محتاج تبقى متفهم مع الناس اكتر من كدة.. ومحتاج تبطل قمصة ولوية بوز خالص عشان متفسدش فرصك ف الحياة النهاردة.


برج القوس عملياً 


( الشغل والمذاكرة والتخطيط لبكرة ):


اجتهادك مسيره ياخد وضعه ف الحياة ويؤتي ثماره قريب جدا..حاول بس متتركنش على شطارتك ومتبطلش سعي وتطور..


برج القوس صحياً 


( نفسيا وجسمانيا وكل مايخص طاسة المزاج ):


نفسيتك محتاجة حاجة جديدة تخش حياتك تفرفشها حبة..احساسك بالملل نابع من الروتين ومن قناعتك انك تستاهل الافضل ف كل حاجة ف الحياة ودة طموح الحياة مع الوقت هتحترمه وهتفسحله المجال يبان ويبرعش ويبقى اخر طعطعة..غذائيا انتا محتاج تركز النهاردة ف الفاكهة اكتر من الطبيخ ومحتاج تدلع روحك ف عشا مميز مع حد بتحبه..إستمتع..


تعرف على توافق برج القوس مع باقي الأبراج النهاردة:


متوافق مع الابراج الحنجورية والهوائية والنارية


حظك اليوم برج الجدي دوت مصر


إعرف حظك اليوم برج الجدي الاثنين 23/10/2017 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول متزعلش اللي بيحبك منك النهاردة عشان متعملش عكوسات لنفسك تبوظ عليك فرص الانبساط اللي جاي ف الطريق..


برج الجدي عملياً 


( الشغل والمذاكرة والتخطيط لبكرة ):


تقدر توصل لكل اللي انتا عاوزه لو نظمت مجهودك صح ورتبت أفكارك وركزت ف الأولويات بشكل سليم.. خد بالك بس وانتا بتحارب ف الحياة ان مفيش حاجة مستاهلة.. الافضل تسترخي وتستمع بوقتك وبحياتك احسن وتسيب كل حاجة تحصل ف وقتها وبراحتها.


برج الجدي صحياً 


( نفسيا وجسمانيا وكل مايخص طاسة المزاج ):


النفسية محتاجة دلع ممكن يكون ف أكل حلو على مزاجك او ف فيلم حلو رايق ف نفسه..ياريت ميكونش حاجة فيها دراما عشان انتا مش ناقص نكد او دراما من اي نوع اساسا..


تعرف على توافق برج الجدي مع باقي الأبراج النهاردة:


متوافق مع الابراج النارية والهوائية


حظك اليوم برج الدلو دوت مصر


إعرف حظك اليوم برج الدلو الاثنين 23/10/2017 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


فيضان حنية مفاجئ هيحصل ف حياتك قريب..إستعد.


برج الدلو عملياً 


( الشغل والمذاكرة والتخطيط لبكرة ):


إطرد من دماغك اي مخاوف ومتسرحش ورا اي افكار سلبية او سودة النهاردة..الحياة بترازي اللي قاعد حاطط ايده على خده وحزين ومستنى يترازى ف المطلق او اللي مقتنع ان حظه ف الحياة وحش..خليك إيجابي وبص لقدام..الحياة مليانة حاجات حلوة كتير جدا مستنياك بس تتحرك وتصدق وتآمن انها من حقك..


برج الدلو صحياً 


( نفسيا وجسمانيا وكل مايخص طاسة المزاج ):


ركز ف المشروبات المفيدة مش اللي فيها مكسبات طعم او مواد حافظة وابعد عن الكافيين حبة وقلل الدخان وياريت لو تدلع نفسك ف ايس كريم النهاردة..كمان ياريت تبعد عن الشطة والموالح النهاردة..الاملاح زايدة ف الاغلب ومحتاجة حبة اهتمام عشان متعكرش مزاجك بدون داعي..


تعرف على توافق برج الدلو مع باقي الأبراج النهاردة:


متوافق مع الابراج المائية والمستحية


حظك اليوم برج الحوت دوت مصر


إعرف حظك اليوم برج الحوت الاثنين 23/10/2017 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتعمل النهاردة مشوار مهم غالبا مع حد.. ايا كان المكان اللي هتروحه راعي ميكونش مكان اضاءته فلورسنت بيضا او حيطانه الوانها وحشة..وياريت متتخانقوش سوا.. غير كدة كله ف القشطة..إستمتع.


برج الحوت عملياً 


( الشغل والمذاكرة والتخطيط لبكرة ):


حاول تنظم وقتك بحيث تلاقي وقت كافي تفرفش فيه النهاردة ف وسط معمعة الشغل او المذاكرة..مهم تخرج حبة برة دايرة النشاط العملي وتشارك الكوكب ف احزانه من باب المشاركة مش اكتر..


برج الحوت صحياً 


( نفسيا وجسمانيا وكل مايخص طاسة المزاج ):


محتاج تتمسك بحقك ف الفرفشة والزقططة بشكل أكبر من المعتاد الليلة..كمان ياريت تركز ف الاكل الخفيف وبلاش الحاجات المسبكة والحاجات اللي فيها بصل وتوم كتير..كمان ياريت تحاول تمارس اي نوع من انواع النشاط الرياضي يمكن حظك اليوم يزهزه مع كيرف طاقتك العالي.. ولو معرفتش او ملقتش وقت او مزاج يبقى تتمشى نصاية تفك فيها عن نفسك حبة خصوصا بعد الأكل او قبل النوم.


تعرف على توافق برج الحوت مع باقي الأبراج النهاردة:


متوافق مع الابراج الفنكوشية والترابية



اعلان حظك اليوم دوت مصر