إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

حيطة مكتوب عليها.."عزة النفس..فيشة من غير كوبس".

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل السبت 21/10/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

في كنز حواليك وانتا مش واخد بالك..بص ودقق كويس كدة وانتا تاخد بالك..جايز تنبسط لما تكتشفه وجايز تكتشف انه مجرد حاجة بتلمع وخلاص انما ملهاش قيمة كبيرة اوي عندك..ف كل الاحوال هتنشغل عن الخناقة اللي انتا بتسن سنانك عشان تخرب بيها الدنيا من تحت لتحت..

برج الحمل عملياً

( الشغل والمذاكرة والتخطيط لبكرة ):

الصراع على الفلوس مش مهم لانها كدة كدة بتتصرف بعد ما بتقفشها ف ايدك وبقت تطير هوا متفهمش ف ايه وعلى ايه..انما الصراع على الاكل ف دة صراع يحترم بصراحة..خصوصا لو انتصرت على نفسك وفرضت رأيك عليها وأكلت كويس النهاردة وبطلت إهمال ف مزاجك الغذائي وكمان ياريت تبطل تقول "مش فارقة"..عشان الجملة دي مثيرة للعكوسات ومثيرة برضة للغثيان..

برج الحمل صحياً

( نفسيا وجسمانيا وكل مايخص طاسة المزاج ):

كل حاجة بتفرق وكل التفاصيل ممكن تكون اجمل لو اخترت دة ف حياتك..لو اخترت تحس وتقتنع انه من حقك الافضل والاحسن ف كل اتجاه وف كل حاجة..

إعرف توافق برج الحمل مع باقي الأبراج النهاردة:

متوافق مع الابراج المستحية

إعرف حظك اليوم برج الثور السبت 21/10/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

طلع الخوف من دماغك النهاردة وقول للي بتحبه انك بتحبه واخلص وانجز..مفيش وقت والكوكب دة ممكن يخلص ف اي لحظة ف متضيعش وقت واتصرف صح..ثم ايه اللي ممكن يحصل يعني تفتكر..

برج الثور عملياً

( الشغل والمذاكرة والتخطيط لبكرة ): 

متخافش من المسئولية لأنك قدها وقدود..متخافش من الالتزام لأنه مهم وبيوصل لنتايج سريعة ف اي حاجة طالما الهدف واضح وذكي ومناسب..ثم ازاي تخاف من حاجة هي المفروض اللي تبقى خايفة منك ف الاساس؟..

برج الثور صحياً 

( نفسيا وجسمانيا وكل مايخص طاسة المزاج ):

هتنجح وتوصل لكل اللي انتا عاوزه لو بطلت نكد وخناق..الخناق هو المشكلة الوحيدة اللي بتعترض طريقك اليومين دول غالبا ودة بيفسد مزاجك ومناعتك وصحتك بشكل عام..كمان العدوانية دي هتطفش الحلوين من حياتك..ف حاول تبطلها بشكل سريع وتتحكم فيها ولا هتلاقي نفسك وحيد وسط الزحمة طول الوقت..

إعرف توافق برج الثور مع باقي الأبراج النهاردة:

متوافق مع الابراج التركوازية زي امبارح

إعرف حظك اليوم برج الجوزاء السبت 21/10/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اصحابك أهم من احبابك النهاردة..اهتم بيهم واسمعلهم جايز يقولولك حاجة تبسطك او تفرفشك حبة خصوصا وانك ف مود مش لطيف بقالك حبة..

برج الجوزاء عملياً 

( الشغل والمذاكرة والتخطيط لبكرة ):

حاول تخلص اللي وراك بدري النهاردة وتخرج لوحدك او مع اصحابك..مش هتفرق..المهم تخرج..

برج الجوزاء صحياً 

( نفسيا وجسمانيا وكل مايخص طاسة المزاج ):

مزاجك محتاج اهتمام اكتر من اي حاجة تانية..راعي بس ان التفكير الكتير ف اللي فات امر مضر ومالوش لازمة..الافضل تبص لقدام خصوصا وان اللي فات مبيفكرش فيك خلاص..ف ياريت متضيعش وقتك..

تعرف على توافق برج الجوزاء مع باقي الأبراج النهاردة:

متوافق مع الابراج النارية والحنجورية

إعرف حظك اليوم برج السرطان السبت 21/10/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول متنصحش حد النهاردة لأنك مش ف المود لنصايح ولو عملت كدة غصب عنك او مضطر عشان تريحه هينتهي بيك الامر حاسس انك بتقول كلام انتا نفسك متعرفش تطبقه ف الحياة..خليك بسيط احسن وقول معرفش او ماليش فيه..مش عيب على فكرة..

برج السرطان عملياً 

( الشغل والمذاكرة والتخطيط لبكرة ):

متتخانقش مع حد مش من قيمتك ف الحياة..ثم لو هتتخانق يب تتخانق مع اكل حلو..على الاقل دي حاجة ممتعة ومفيدة فعلا ليك ولمزاجك ولصحتك ولوقتك

برج السرطان صحياً 

(نفسيا وجسمانيا وكل مايخص طاسة المزاج ):

صحتك كويسة بس محتاج تهتم حبة بمزاجك لأنه بعافية حبتين خصوصا وانه مفيش حواليك حاجة مفرحة او لطيفة..حاول تدور على اسباب للإنبساط والبهجة..ومفيش اي مانع تتعشى برة ولا تخش سينما ولا تلم اصحابك وتعملوا حفلة ايس كريم..براحتكوا تماما..

تعرف على توافق برج السرطان مع باقي الأبراج النهاردة:

متوافق مع الابراج اللي بتحب الايس كريم

إعرف حظك اليوم برج الأسد الجمعة السبت 21/10/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

لسة ف مرحلة المشاعر الحارة والرغبة ف الحب بس الحياة مش مطاوعاك زي مانتا عاوز..حاول تتصرف صح وبذكاء ومتلجأش للقمصة وللضغط لا على حد ولا على نفسك عشان توصل للي انتا عاوزه..خليك ذكي واصبر واتقل وكل حاجة هتحصل زي مانتا عاوز وف توقيت مناسب..بلاش قمصة بس..مش اكتر..

برج الأسد عملياً 

( الشغل والمذاكرة والتخطيط لبكرة ):

حاول متغرقش حد النهاردة..بلاش..العنف مش حل ابدا ف مواجهة الاختلاف مع البشر كمان متستغلش ذكائك غلط وتخش ف صراعات مش من قيمتك..في حاجات كدة وناس اخرهم تبصلهم وتضحك وتسيبهم وتمشي..مش لازم تعلق على كلامهم ولا لازم تتخانق معاهم..سيبهم وركز ف انجازاتك الشخصية ف حياتك وبس..

برج الأسد صحياً 

( نفسيا وجسمانيا وكل مايخص طاسة المزاج ):

النفسية محتاجة اهتمام كبير والصحة محتاجة برضة اهتمام كبير جدا..حاول توازن بين الاتنين بأكل كويس وتواجد ف اماكن تستاهل التواجد دة وياريت تبعد عن الناس المتشائمة السوداوية عشان الحياة مش ناقصة نكد اصلا اليومين دول بالنسبالك..

تعرف على توافق برج الأسد مع باقي الأبراج النهاردة:

متوافق مع الابراج الفنكوشية والمائية

إعرف حظك اليوم برج العذراء السبت 21/10/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

العواطف والرومانسيات النهاردة بعافية وتحسها كدة مش حاضرة ف تفكيرك..واضح انك مشغول بحاجة تانية او انك مقريف حبة..ف كل الاحوال حاول متزعلش حد بيحبك منك النهاردة بالقريفة دي..جايز المود دة ميستمرش كتير وترجع تفرفش وتحتاج تتحب..

برج العذراء عملياً 

( الشغل والمذاكرة والتخطيط لبكرة ):

هتعمل مشوار مهم النهاردة وبعد ما تخلصه هتميل لإنك تكن ف البيت قدام المروحة والتلفزيون ومتعملش اي حاجة من اي نوع عشان انتا حاسس بالكسل وبتوفر طاقتك للحاجات اللي تستاهله وبس ودة جميل..خد بالك بس انك مش محتاج المروحة عشان تهوي لأن الجو كويس..انتا ف الاغلب بتتونس بصوتها مش أكتر..

برج العذراء صحياً 

( نفسيا وجسمانيا وكل مايخص طاسة المزاج ):

لو حسيت بأي خروشة ف زورك ياريت تهتم لأنه ممكن يكون بداية لدور برد رزل محتاج يتلحق ف الاول ويتقاوم وبشدة..كمان ابتدي دور على شوربة العدس ف حياتك..

تعرف على توافق برج العذراء مع باقي الأبراج النهاردة:

متوافق مع الابراج النباتية

إعرف حظك اليوم برج الميزان السبت 21/10/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

البيت والناس الي ف البيت مهمين ليك النهاردة ورضاهم عنك برضة مهم..قشطة طبعا يستاهلوا اهتمامك مفيش كلام بس مسألة الرضا دي ممكن يكون ف باطنها سيطرة او تحكم ف حاجات المفروض انتا بس اللي تاخد فيها قرار ف حياتك مش ف البيت..عموما..نتمنى تنبسطوا ومتتخانقوش..

برج الميزان عملياً 

( الشغل والمذاكرة والتخطيط لبكرة ):

اليوم عمليا فيه اجواء إيجابية كبيرة عشان تتحقق وتبان وتظهر وتعرف تستفاد منها هتبقى محتاجة منك انك متخافش تعبر عن رأيك بصراحة ومحتاجة منك برضة انك تواجه وبلطف ومتحاولش ترضي كل الاطراف على حسابك..انبساطك مهم ورأيك مهم وراحتك اهم من اي حاجة..دافع عن حقك...

برج الميزان صحياً 

( نفسيا وجسمانيا وكل مايخص طاسة المزاج ):

محتاج تهتم حبة بأكلك وخصوصا ف وجبة الفطار والعشا..ف الغدا تقدر تدوس ف اي اكل يعجبك مهما كان بسيط مش ازمة اوي..انما الفطار مهم يكون متنوع وسهل ف الهضم..

تعرف على توافق برج الميزان مع باقي الأبراج النهاردة:

متوافق مع الابراج الترابية والحنكوشية

إعرف حظك اليوم برج العقرب السبت 21/10/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متقعدش لوحدك النهاردة عشان هتبقى فريسة سهلة للأوفر ثينكينج بدون اي داعي..كمان حاول تنقي الوان هدوم مبهجة حبة برضة عشان تعكس تفاؤل ودندشة ف وش العالم..اهم حاجة تبعد عن النكد او الشحتفة تماما عشان هتبقى عواقبهم النهاردة جسيمة على غير العادة..ف بلاش منهم احسن..

برج العقرب عملياً 

( الشغل والمذاكرة والتخطيط لبكرة ):

حاول تحضر حفلة او ماتش او اي حاجة فيها ناس كتير وجماهير النهاردة..هيفرق ف مودك جدا الموضوع دة..المهم متقعدش لوحدك خالص..بلاش..دوب ف وسط الزحمة احسن واشغل بالك بالمفيد وبس..بلاش افكار سودة الليلة..بلاش

برج العقرب صحياً 

( نفسيا وجسمانيا وكل مايخص طاسة المزاج ):

صحيا انتا زي الفل ومفيش قلق غير من السقعة بالليل وإحتمالية انتشار دور البرد اليومين دول..تجنب دور البرد سهل وبسيط خصوصا لو المناعة شغالة عندك بشكل كويس..لاحظ ان النفسية كل ماكانت عالية ومزقططة كل ما المناعة هتشتغل وبقوة..كمان حاول تزود حبة ف الاكل المفيد وتفكك من العك النهاردة خصوصا عك اكل الشارع..

تعرف على توافق برج العقرب مع باقي الأبراج النهاردة:

متوافق مع الابراج البرمائية والهوائية

إعرف حظك اليوم برج القوس السبت 21/10/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تقعد مع نفسك حبة النهاردة تصفوا خلافتكوا سوا بعيد عن الناس وبالتالي مش هيبقى ف وقت للعواطف اوي خصوصا وانك مش هتحب تبان اوي وفكرك مشغول بحاجات متقدرش تناقشها مع الطرف الاخر..على الاقل مش دلوقتي..

برج القوس عملياً 

( الشغل والمذاكرة والتخطيط لبكرة ):

محتاج تروق دماغك وتصفيها من كل الهسس والتفاصيل اللي بتتفسح فيها رايحة جاية بدون داعي..خلوة موفقة وكل القرارات اللي هتوصلها النهاردة هتفيدك مستقبلا جدا مهما كانت بسيطة..بتفرق وهتفرق..ثق ف نفسك بس وخليك ف حالك..

برج القوس صحياً 

( نفسيا وجسمانيا وكل مايخص طاسة المزاج ):

فترة النهار فترة نشيطة جدا وبزيادة..حاول تستفيد منها كويس وتخلص اللي وراك عشان فترة المساء والسهرة هتبقى مهمة ومختلفة النهاردة بشكل كبير..خصوصا لو اخترت تنبسط الليلة مش تنكد على نفسك وعلى اللي حواليك..

تعرف على توافق برج القوس مع باقي الأبراج النهاردة:

متوافق مع الابراج الهوائية

إعرف حظك اليوم برج الجدي السبت 21/10/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الجو بالنسبالك مثير للإكتئاب عشان الشتا داخل مش اكتر..كمان انتا معندكش صبر اليومين دول فيما يخص التعامل مع الطرف الاخر ف اي علاقة..انتا محتاج تهدى كدة وتدي للي قدامك فرصة يفهمك وتفهمه..واحدة واحدة ومتستعجلش ومتطلقش احكام جاهزة على حد انتا لسة متعرفوش كويس..بلاش

برج الجدي عملياً 

( الشغل والمذاكرة والتخطيط لبكرة ):

خليك واقعي النهاردة حبة وراعي ان في حاجات طموحك ميقدرش يطولها او يحققها على الاقل دلوقتي..كمان ياريت ميبقاش دة سبب للنكد او للحزن..كدة انتا حكمت على نفسك بالفشل من قبل ماتبتدي..بكرة محدش يعرف مخبي ايه..جايز كل اللي بتحلم بيه يتحقق بعدين وبسهولة وجايز ميكونش اساسا فيه مصلحة زي مانتا متخيل..إتقل حبة وهدي من ايقاعك..

برج الجدي صحياً 

( نفسيا وجسمانيا وكل مايخص طاسة المزاج ):

بالنسبالك النهاردة الرغي والقعاد ع القهوة والشات مجرد تضييع وقت بس انتا بتحتاجه من وقت للتاني عشان تحس بالألفة مع الناس المحيطة بيك..دي حاجة جميلة وحافظ عليها..مهم تنبسط النهاردة مع اصحابك خصوصا لو بيعرفوا يزقططوا بشكل برئ..بالنسبة للأكل ف اليوم مناسب لمكافأة النفس بأكل بتحبه مش مجرد اللي موجود وخلاص..

تعرف على توافق برج الجدي مع باقي الأبراج النهاردة:

متوافق مع الابراج الخشبية

إعرف حظك اليوم برج الدلو السبت 21/10/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم هادي وعادي وممكن يمر بشكل لطيف ورايق لو فكيت من الوساوس اللي بتنخرب ف افكارك ومزاجك بدون داعي..

برج الدلو عملياً 

( الشغل والمذاكرة والتخطيط لبكرة ):

ابعد عن الناس اللي بتحب تعمل قلق على الفاضي وخليك مع نفسك النهاردة..ارجع لأحضان الطبيعة الام وحاول متتنرفذش او تتعصب قصاد اي استفزاز رخيص..كبر دماغك..الاجواء ملائمة للنجاح وللإستمرارية بشكل كبير..ياريت متنساقش ورا صناع النكد..دي ناس مش عارفة تنبسط وبتحلم ازاي تنكد على العالم كله وخلاص..

برج الدلو صحياً 

( نفسيا وجسمانيا وكل مايخص طاسة المزاج ):

اهتم بصدرك حبة عشان احتمال يكون في بدايات كحة او برد النهاردة كمان بالليل ياريت تتقل ف الهدوم احتياطي وتبعد عن التوم والبصل لأنك احتمال تتباس

تعرف على توافق برج الدلو مع باقي الأبراج النهاردة:

متوافق مع الابراج النارية

إعرف حظك اليوم برج الحوت السبت 21/10/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم جميل ومنعش ومناسب جدا للخروج والفسح والترويق على المشاعر والقلب بشكل عام..حاول تستفيد من الجو المناسب دة وتبطل شكوى حبة وتنطلق ف الحياة كعصفور حر مش حداية قاعدة للساقطة واللاقطة وبس..اختار الانبساط..اختار البساطة..

برج الحوت عملياً 

( الشغل والمذاكرة والتخطيط لبكرة ):

الحكمة هي الحل ف مواجهة اي مشاكل معلقة او كعبلة ف طريقك..تقدر تستخدم العقل والهدوء وتقدر تتخانق وتعمل زعابيب وتقدر برضة تستنى وكل حاجة هتعدي لوحدها من نفسها..تاخد وقتها بس..مش اكتر وهتعدي..زي اي حاجة تانية..

برج الحوت صحياً 

( نفسيا وجسمانيا وكل مايخص طاسة المزاج ):

طنش وكبر دماغك وحاول متتخانقش عشان ضغطك ميعلاش بدون داعي..خليك كوول وفريش النهاردة واتجه غذائيا للحاجات اللي بتحبها مش الحاجات اللي انتا مفهم نفسك انك بتحبها بالعافية..دلع نفسك احسن..

تعرف على توافق برج الحوت مع باقي الأبراج النهاردة:

متوافق مع الابراج الترابية