متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل..

  : كلام جد

هنبطل امتى نتعامل بمبدأ انه طالما انا مش مبسوط يبقى لازم انكد على العالم؟!.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الثلاثاء 17 أكتوبر 2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

أجواء حالمة ورقيقة..يابختك يامحظوظ...ياريت متضيعش الوقت كله ف الشغل والمذاكرة عشان تفضى تنبسط وتستمتع بالاجواء الحالمة دي مع حد بتحبه ولو على الاقل ف التليفون..بلاش شات عشان متتخانقوش..بلاش

برج الحمل عملياً

( الشغل والمذاكرة والتخطيط لبكرة ):

الاجواء العملية محتاجة إهتمام وصبر طويل وكبير ورزل..معلش..مش كل حاجة للأسف بتمشي زي ماحنا عاوزينها تمشي ف الحياة دي..اوقات لازم نعدي الايام ونتقل لحد ما ناخد فرصة ننجح ونتحقق..كمان متضايقش نفسك كل شوية بالتفكير ف قلة الفلوس..مسيرها تروق وتحلى..تفاءل بشكل عام عشان الايام تعدي..

برج الحمل صحياً

( نفسيا وجسمانيا وكل مايخص طاسة المزاج ):

حاول متتعصبش عشان حاجات تافهة تلخبطلك مزاجك او تعلي ضغطك بدون داعي..كمان راعي الناس حواليك حبة وإهتم بيهم..دة مهم زي ما بتهتم بنفسك بالظبط..

إعرف توافق برج الحمل مع باقي الأبراج النهاردة:

متوافق مع الابراج الحنكوشية

إعرف حظك اليوم برج الثور الثلاثاء 17 أكتوبر 2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

الوقت مناسب لتأمل ما مضى اه.. بس مش مناسب ابدا للتقليب ف الذكريات..إشغل نفسك بحصر إنجازاتك لحد دلوقتي ف الحياة بحيث يبقى عندك سبب تحتفل على حسه بالليل..إستمتع.

برج الثور عملياً

( الشغل والمذاكرة والتخطيط لبكرة ): 

وراك حاجة مهمة ومسببالك قلق عظيم..طيب كدة انتا محتاج تفصل النهاردة عن التفكير ف الحاجة دي ولو لساعة بحيث تعرف تواصل اليوم بدون ما تفسد مزاجك وسعادتك الشخصية..كمان حاول متسلفش حد لا فلوس ولا مجهود..مالوش لازمة..

برج الثور صحياً 

( نفسيا وجسمانيا وكل مايخص طاسة المزاج ):

النفسية محتاجة زقططة ونعنشة ومحتاجة فرفشة من مصادر خارجية صافية وتكون بتحبك..كمان الاكل النهاردة ممكن جدا يكون سبب للخروج خصوصا لو في حد لطيف كدة ف حياتك يعزمك على العشا مثلا برة ولا حاجة..

إعرف توافق برج الثور مع باقي الأبراج النهاردة:

متوافق مع الابراج الهوائية والفنكوشية

إعرف حظك اليوم برج الجوزاء الثلاثاء 17 أكتوبر 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تخلي ايقاع اليوم سريع بحيث تنشغل ف تفاصيله كل الوقت وميتبقاش اي مجال لمرازية نفسك..كمان إحترس من الموتوسيكلات اليوم وإحترس برضة من الجو خصوصا بالليل

برج الجوزاء عملياً 

( الشغل والمذاكرة والتخطيط لبكرة ):

خلص كل اللي وراك بإهتمام النهاردة عشان انتا مش مركز ف اللي بتعمله خالص..واضح انك بتفكر ف حاجات غامضة وواخدة كل تركيزك بدون اي داعي..ركز ف اللي بتعمله احسن وافضل..ركز ف مصلحتك..

برج الجوزاء صحياً 

( نفسيا وجسمانيا وكل مايخص طاسة المزاج ):

إهتمامك بصحتك وبأكلك وشربك عنوان لسعادتك ف الحياة النهاردة..حاول تخلى العنوان دة مكثف وشامل كل العناصر الغذائية اللي جسمك محتاجها وحاول متقعدش لوحدك كتير النهاردة خصوصا بالليل..

تعرف على توافق برج الجوزاء مع باقي الأبراج النهاردة:

متوافق مع الابراج الترابية والنارية

إعرف حظك اليوم برج السرطان الثلاثاء 17 أكتوبر 2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متقعش ف الفخ برجليك النهاردة..بلاش..انتا اوعى من كدة.. خصوصا وانه ف الاغلب فخ ساذج من شخص برضة ساذج ومبيقدرش ذكائك كويس ولا بيقدر قدرتك على رد المرازية بمرازية اكبر منها ضعفين او تلاتة..معلش..مسيره يتعلم خصوصا لما يتلسع..

برج السرطان عملياً 

( الشغل والمذاكرة والتخطيط لبكرة ):

متقعش ف الفخ برجليك النهاردة..بلاش..انتا اوعى من كدة.. خصوصا وانه ف الاغلب فخ ساذج من شخص مبيقدرش ذكائك كويس..كمان خد بالك انك محتاج تخرج النهاردة وتفرفش حبة بعد الشغل..الحياة مش كلها شغل ولا مذاكرة..

برج السرطان صحياً 

(نفسيا وجسمانيا وكل مايخص طاسة المزاج ):

الانسان صوته بيتغير بتغير الشخص اللي بيكلمه وكل ماكان الشخص دة مقرب او محبوب ليك اكيد صوتك وانتا بتتكلم معاه هيبقى حنين ورهيف ويدوبك مبيطلعش..راعي الكلام دة وانتا بتحب ف التليفون النهاردة بالليل

تعرف على توافق برج السرطان مع باقي الأبراج النهاردة:

متوافق مع الابراج الكتكوتية والفنكوشية والترابية

إعرف حظك اليوم برج الأسد الثلاثاء 17 أكتوبر 2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الحب مهم ف حياتك ف حاول متنكروش لما تجيلك فرصة انك تحب وبجد ومن قلبك..متهربش من الحياة عشان هي كمان متهربش منك..

برج الأسد عملياً 

( الشغل والمذاكرة والتخطيط لبكرة ):

التكنولجيا النهاردة صاحبتك وهتساعدك ف كل حاجة انتا عاوز تعملها حتى لو حبيت تعمل مصيبة صغننة من مصايبك الخفية الغير محسوسة للأخرين برضة التكنولوجيا هتقف جنبك فيها..خد بالك بس من الكهربا وحاول تقاوم اللعب فيها عشان متتكهربش..

برج الأسد صحياً 

( نفسيا وجسمانيا وكل مايخص طاسة المزاج ):

لازم تاكل كل حاجة سواء بتحبها او مبتحبهاش النهاردة..كمان انتا محتاج تهتم بصحتك اليومين دول بجد وبشكل حقيقي وجاد ومكثف وفكك من حوار الدايت دة خالص النهاردة..استمتع بالاكل وانبسط..

تعرف على توافق برج الأسد مع باقي الأبراج النهاردة:

متوافق مع الابراج النارية والهوائية والمستحية

إعرف حظك اليوم برج العذراء الثلاثاء 17 أكتوبر 2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متعلقش أحزانك ف النجفة للكل يشوفها..اوعى تعمل كدة..احزانك شيئ شخصي خاص بيك وبس ثم انتا مش محتاج تعاطف من اي حد..انتا محتاج شوية تفهم وحنية وحد يعملك أكل حلو على مزاجك..مش اكتر..

برج العذراء عملياً 

( الشغل والمذاكرة والتخطيط لبكرة ):

إبعد عن الضلمة النهاردة سواء ف الأماكن او ف نفسيات الاشخاص..الاسود مش لون حلو النهاردة ف اي حاجة.. بلاش منه..كمان ياريت تتجه عمليا ناحية الاجتهاد والتركيز عشان مصالحك تمشي وبسهولة..مش صعب عليك تنجح وانتا عارف كدة..ركز بس وثق ف نفسك ومتركزش مع حد ميستاهلش وكل حاجة تمشي زي الحلاوة ان شاء الله..

برج العذراء صحياً 

( نفسيا وجسمانيا وكل مايخص طاسة المزاج ):

راعي قولونك حبة عشان ممكن يلاعبك خصوصا ف دخلة الشتا وقلبة الجو اللي حاصلة اليومين دول..كمان تفاحة خضرا ممكن تعدل مزاجك جدا ف بداية اليوم قبل الشاي والقهوة والسجاير والفول والبصل..حاول تبتدي بيها اليوم يمكن تنبسط..

تعرف على توافق برج العذراء مع باقي الأبراج النهاردة:

متوافق مع الابراج الطينية والمائية

إعرف حظك اليوم برج الميزان الثلاثاء 17 أكتوبر 2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاسس انك محتاج تختلي بنفسك وتقعد حبة معاها تتحاسبوا سوا وتفرفشوا برضة سوا..دة تصرف صحيح جدا لأنك ف الاساس محتاج تعرف نفسك كويس جدا قبل ماتحاول تعرف اي حد تاني..كمان انتوا محتاجين فعلا تصفوا شوية خلافات سوا لوحدكم..إستمتعوا سوا ياريت وبلاش خناق..خليك انتا الكبير واسمعلها واستوعبها..

برج الميزان عملياً 

( الشغل والمذاكرة والتخطيط لبكرة ):

محتاج تقضي يوم ف الصحرا لوحدك تتأمل ف حياتك براحتك وبهدوء وتروي..الاختلاء بالنفس مهم النهاردة..إبعد عن الزحمة.. سواء ف الناس أو ف أفكارك..وإحترس من الصداع.

برج الميزان صحياً 

( نفسيا وجسمانيا وكل مايخص طاسة المزاج ):

متجيش على نفسك النهاردة اوي عشان يتبقالك طاقة ومزاج ونفس تنبسط بيهم مع نفسك بالليل..اشرب مية كتير جدا طول اليوم وركز ف الاكل الحلو اللي بتحبه ودلع نفسك ف علبة كومبوت اناناس او خوخ..اللي يعجبك..

تعرف على توافق برج الميزان مع باقي الأبراج النهاردة:

متوافق مع الابراج النارية

إعرف حظك اليوم برج العقرب  الثلاثاء 17 أكتوبر 2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

نفسك تتحب وبجد مش مجرد حب عابر ويعدي وخلاص..المشكلة كلها ف الوقت وف ان مفيش فرصة عشان حد يعرفك بجد ويشوف اللي جواك برضة بجد..جايز انتا بتطفش الناس وجايز بتسيب انطباع انك عدواني..وجايز مش فاضي..ف كل الاحوال متيأسش لأنك هتتحب وبقوة قريب ان شاء الله..اتمنهالك

برج العقرب عملياً 

( الشغل والمذاكرة والتخطيط لبكرة ):

يوم إيجابي جدا وجميل..خد بالك بس عشان في حد زعطوط ف نفسه النهاردة ف الناس اللي حواليك..الانسان دة حاطك ف دماغه بدون سبب واضح..حاول تطنشه ومتسعاش لأي صدام معاه.. متبوظش اليوم بالخناق..إوعى..الليلة ممكن تبقى حلوة جدا لو روقت دماغك ووقتك صح.

برج العقرب صحياً 

( نفسيا وجسمانيا وكل مايخص طاسة المزاج ):

صحتك كويسة خصوصا وانك مهتم بالدايت من تحت لتحت رغم انك اوقات بتعك ف الاكل خصوصا بالليل..الكويس ان رحلاتك المكوكية للباب التلاجة كيرفها بيقل ودة ف حد ذاته انجاز..ابعد عن الدسم وانتا تبقى زي الفل..كمان الموز النهاردة فاكهة حظ بشكل كبير..صباعين ولا تلاتة كافيين يطلعوا مزاجك جنب القرود المبسوطة على الشجرة..إستمتعوا سوا ياريت..

تعرف على توافق برج العقرب مع باقي الأبراج النهاردة:

متوافق مع الابراج المائية والهوائية

إعرف حظك اليوم برج القوس الثلاثاء 17 أكتوبر 2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حظك ف الحب لسة ماشي وبيزحلق كمان وحقك تزقطط وتفرح وتملى الكون ضحك وانبساط..متروحش بقى سايب كل الجمال دة وراكنه على جنب ورايح تضيع ف وقتك ف مراقبة الناس بدون اي داعي..متركزش مع حد عشان محدش يركز معاك..بلاش..انبسط باللي انتا فيه احسن يامعلم..انبسط...دة حقك..

برج القوس عملياً 

( الشغل والمذاكرة والتخطيط لبكرة ):

تركيزك كله منصب على الحاجات المهمة ودة جميل ف حد ذاته خصوصا وانك عارف مصلحتك كويس..كمل على كدة بقى على قد ما تقدر..

برج القوس صحياً 

( نفسيا وجسمانيا وكل مايخص طاسة المزاج ):

خف ف الدخان حبة عشان صدرك بدأ يزيق..خلي بالك من مزاجك برضة جدا خصوصا ف فترة المساء والسهرة..وياريت تدلع نفسك ف بيتزا او فطيرة شرقي..ميضرش ابدا..

تعرف على توافق برج القوس مع باقي الأبراج النهاردة:

متوافق مع الابراج الحلزونية زي امبارح

إعرف حظك اليوم برج الجدي الثلاثاء 17 أكتوبر 2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

القراية النهاردة هي الحل والمهرب من كل الاوجاع الكامنة ف عينين البشر المحيطين بيك واللي مابيصدقوا يشوفوك مبسوط ورايق وبيبقوا عاوزين يشتكوا من الحياة والظروف والهم واللي راح واللي جه متفهمش ليه..عموما اللي ميحترمش فرحتك متحترمش حزنه..ميستاهلش.

برج الجدي عملياً 

( الشغل والمذاكرة والتخطيط لبكرة ):

عمليا انتا محتاج تركز وتركز كويس جدا كمان عشان تعرف توازن مابين احتياجاتك المادية واحتياجاتك النفسية والعاطفية خصوصا وان كل حاجة بقت غالية ودة بيخلي الانسان بدون مايشعر بيبتدي يطنش اي حاجة عشان يعرف يسعى ف الحياة ويجيب ف فلوس يشتري بيها كل حاجة محتاجها..بالتالي انتا محتاج تكثف جهودك وتبطل شكوى وسلبية تماما..ابواب الرزق كتير ف الحياة..صعوبتها بس انها عاوزة وقت ومجهود كبير وعاوزة كمان منك تبطل تستكبر على اي فرصة جاية ف اتجاهك الفترة دي..اي شغل يعتبر مصلحة ف الكوكب دة..اي شغل

برج الجدي صحياً 

( نفسيا وجسمانيا وكل مايخص طاسة المزاج ):

فترة الليل هتبقى هادية خصوصا وان الجو بالليل بيبقى تحفة ومناسب جدا للروقان والقراية والحب..خد بالك بس من سنانك ومن البرد اللي ميكروبه بيلف دلوقتي ف الهوا بيدور على ضحايا جدد ف كل لحظة ف اليوم..

تعرف على توافق برج الجدي مع باقي الأبراج النهاردة:

متوافق مع الابراج الفنكوشية

إعرف حظك اليوم برج الدلو الثلاثاء 17 أكتوبر 2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

أجواء رومانسية مفاجئة وكتكوتة ف نفسها جدا مابينك ومابين بنات أفكارك.. إستمتع.

برج الدلو عملياً 

( الشغل والمذاكرة والتخطيط لبكرة ):

الاجواء العملية ماشي حالها وكله تمام بس انتا محتاج متهمدش ابدا النهاردة ولا تتركن على موهبتك او قدراتك الفردية..مهم تتعاون مع الشاطر وتعترف بشطارته..ف الاخر محدش عارف كل حاجة ولا في حد يقدر يعمل كل حاجة ف الكون لوحده..دة وهم وانتا عارف كدة كويس..بلاش فردية وانعزال وابتدي ثق ف نفسك وتعاون للمصلحة العامة..مش لمصلحتك انتا وبس

برج الدلو صحياً 

( نفسيا وجسمانيا وكل مايخص طاسة المزاج ):

قلل كميات الاكل النهاردة حبة واشرب مية كتير جدا وبلاش اي حاجة فيها شبهة املاح او دهون..اهتم بصحتك عشان تعرف تنبسط لما ييجي وقت الانبساط ووفر طاقتك للحاجات اللي تستاهلها وبس..بلاش افراط ف الجدعنة مع اي حد ميستاهلش..وقتك كنز..متدرهوش لأي حد معدي كدة وخلاص..إوعى..كمان حاول تعود نفسك تحب اللبن الرايب الفترة دي لانك هتحتاجه كتير ف حياتك..إستمتع

تعرف على توافق برج الدلو مع باقي الأبراج النهاردة:

متوافق مع الابراج البرمائية

إعرف حظك اليوم برج الحوت الثلاثاء 17 أكتوبر 2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

واضح ان في حد هيجيبلك هدية النهاردة وواضح انها مش هتعجبك.. عموما معلش.

برج الحوت عملياً 

( الشغل والمذاكرة والتخطيط لبكرة ):

حاول النهاردة يبقى رد فعلك كويس تجاه اي حد بيحاول يبقى نايس معاك بدل ما تعامل الناس بجفاء وغشومية وترجع تشتكي انك قاعد لوحدك ومحدش بيحبك..كمان اهدى حبة ف طموحاتك عشان متنكدش على نفسك بزيادة لما تكتشف ان قدراتك مش ف مستوى أحلامك..واحدة واحدة يابرنس على نفسك عشان تعرف تعيش وتنبسط بكل حاجة بتعملها..دة حقك

برج الحوت صحياً 

( نفسيا وجسمانيا وكل مايخص طاسة المزاج ):

صحتك محتاجة اهتمام منك وف نفس الوقت انتا محتاج تتحب وبشدة..دة الحل الوحيد اللي ممكن يساعد ف رفع معنوياتك بشكل إيجابي اليومين دول كمان اتجه غذائية نحو الهمبورجر اللي بالبيض والجبنة..هتنبسط جامد..

تعرف على توافق برج الحوت مع باقي الأبراج النهاردة:

متوافق مع الابراج الهوائية