متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل..

: كلام جد

ياترى مين بيفك ستاير النسيان ويغسلها؟..ياترى في حد بيهتم بالموضوع دة ولا لأا.

*******************

عشان تعرف حظك بشكل كامل .. صفي نيتك ودوس على اسم برجك بإيدك اليمين.

حظك اليوم برج الحمل دوت مصر
حظك اليوم برج الحمل دوت مصر

إعرف حظك اليوم برج الحمل الأحد 8 أكتوبر 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

إبتسامتك الخلابة هي سر نجاحك النهاردة..وهتوصلك لكل أهدافك النهاردة بالفهلوة والحنية والدهلكة..استخدمها صح وبثقة..حاول بس تبطل تثبت ف اللي بتحبه بالكلام عشان بدأ يزهق غالبا..

برج الحمل عملياً

( الشغل والمذاكرة والتخطيط لبكرة ):

محتاج تعصر دماغك النهاردة عشان توصل لحلول للمشاكل العملية اللي بتواجهك باستمرار خصوصا وانك مصدع معظم الوقت ومش عارف تركز وتايه كدة متفهمش ليه..اهدى على نفسك حبة واتغذى كويس واهتم بنفسك وانتا تبقى كويس وزي الفل

برج الحمل صحياً

( نفسيا وجسمانيا وكل مايخص طاسة المزاج ):

مبتاكلش كويس ليه؟..ايه..هتعمل بناء ضوئي زي النباتات ولا ايه..طب هتعمل كدة ازاي وانتا معندكش البتاع الاخضر اللي اسمه الكلوروفيل دة..

إعرف توافق برج الحمل مع باقي الأبراج النهاردة:

متوافق مع الابراج اللي مبتحبش الاغنية بتاعة تي ري ري ري زكى يا زكى

*****************************************************************************

حظك اليوم برج الثور دوت مصر
حظك اليوم برج الثور دوت مصر

إعرف حظك اليوم برج الثور الأحد 8 أكتوبر 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

احساسك انك متنطش من حبايبك طاغي على باقي احاسيسك ومخليك مش عارف توزن الامور كويس..رغبتك ف الشحتفة بتبوظ كل حاجة احيانا خلي بالك..

برج الثور عملياً

( الشغل والمذاكرة والتخطيط لبكرة ):

إرضى بنصيبك ف الحياة النهاردة وبلاش إعتراض وزمزئة

برج الثور صحياً

( نفسيا وجسمانيا وكل مايخص طاسة المزاج ):

ف حالة لما تحس بأي وجع يبقى تروح تكشف ومن نفسك كدة ومن سكات..انما الطناش هنتج عنه طناش اكبر واكبر وهتبتدي تحس بالذنب وبعدين تنسى..خصوصا لما الآلم يروح حبة..وترجع تاني تحس بالذنب وبالندم لما الوجع يرجع..وانتا مبتحبش تحس بالذنب..بالتالي هتعند..وهتبقى ف الاخر حقيقي حقيقي عامل زي اللي بيحاول يدي نفسه بالبوكس ف المراية..ف على ايه كل دة..تعبان تروح تكشف وتعرف ف ايه..وهو غالبا اللي بتشتكي منه هيطلع حاجة تافهة وهتزقطط جامد لما تتأكد من دة على فكرة ان شاء الله..ثق بس ف نفسك واتصرف صح وبلاش كسل وعند..

إعرف توافق برج الثور مع باقي الأبراج النهاردة:

متوافق مع الابراج الخشبية والهوائية والمعدنية

*****************************************************************************

حظك اليوم برج الجوزاء دوت مصر
حظك اليوم برج الجوزاء دوت مصر

إعرف حظك اليوم برج الجوزاء الأحد 8 أكتوبر 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً

( الكراش والإكس والبوي فريند والجيرل فريند والجوز والزوجة والقرايب ):

بتسمع حاجات كتير جدا وانتا ساكت مبتنطقش..كل واحد بيحكيلك عن حياته او عن وجهة نظره ف حياته وانتا برضة ساكت ومبتنطقش..بتتفرج ومبتشاركش..دة طبيعي..انتا مختلف عنهم تماما بس مش واخد بالك ان الاختلاف دة مش معناه ابدا انك تفضل ساكت كدة..اتكلم..قول اي حاجة..على الاقل عشان الناس متخافش من سكوتك المبالغ فيه دة..

برج الجوزاء عملياً

( الشغل والمذاكرة والتخطيط لبكرة ):

اليوم مناسب للتخطيط لقدام النهاردة..المستقبل بيناديك وفاتحلك دراعاته..رد عليه

برج الجوزاء صحياً

( نفسيا وجسمانيا وكل مايخص طاسة المزاج ):

الاكل مش ف دماغك النهاردة ولا الخروج..انتا بتفكر ف حاجات تانية شاغلة بالك بشدة تقريبا..قشطة لم تخلص تفكير ياريت متنساش تاكل وكويس..اقتراح الاكل النهاردة هيكون الفراخ بالخوخ..ولو ملقتش خوخ اعمل الفراخ ببرتقان..ولو ملقتش برتقان اعمل الفراخ باللمون..ولو مبتحبش اللمون هو كمان يبقى متاكلش فراخ اساسا النهاردة..

تعرف على توافق برج الجوزاء مع باقي الأبراج النهاردة:

متوافق مع الابراج الدخانية والنارية

*****************************************************************************

حظك اليوم برج السرطان دوت مصر
حظك اليوم برج السرطان دوت مصر

إعرف حظك اليوم برج السرطان الأحد 8 أكتوبر 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول متقولش لأ للإنبساط النهاردة كتير عشان دة فال وحش ومش حلو ابدا ف الحياة..

برج السرطان عملياً

( الشغل والمذاكرة والتخطيط لبكرة ):

عمليا انتا سالك وماشي حالك وزي الفل بس انتا بتحب تخزي العين وتقول للناس العكس عشان بيحلالك كدة تنكد ع الناس عشان دة بيعزز احساسك من جواك انك كدة صح ولئيم وقوّر وسوسة محمصة..عموما انتا حر..تتلائم ولا متتلائمش ف الاخر محدش بيعرف يتلائم على الحياة..النظام الحيوي اللي احنا عايشين جواه مبيفرقش معاه لئيم ولا مش لئيم..كله بيتخرط زي الملوخية على طبلية واحدة..ف ياريت متخسرش حد عشان مصلحة..بلاش

برج السرطان صحياً

(نفسيا وجسمانيا وكل مايخص طاسة المزاج ):

مهم جدا تقف تعمل لنفسك اكل النهاردة انشاالله بيضة مسلوقة وحبة بطاطس مهروسين بالزبدة..وياسلام لو تعرف تعمل طبق كشك كدة ولا بصارة..الحاجات دي بتروق ع المزاج وبتخليه عنب فعلا مفيش كلام..والمثل بيقول" طبق البصارة يبني ف مزاجك عمارة"..إستمتع

تعرف على توافق برج السرطان مع باقي الأبراج النهاردة:

متوافق مع الابراج الهوائية والنارية والمائية

*****************************************************************************

حظك اليوم برج الأسد دوت مصر
حظك اليوم برج الأسد دوت مصر

إعرف حظك اليوم برج الأسد الأحد 8 أكتوبر 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً

( الكراش والإكس والبوي فريند والجيرل فريند والجوز والزوجة والقرايب ):

محتاج تدلع اللي بتحبهم من بداية اليوم بمورنينج تكست حلو وياحبذا لو تعزمهم على الغدا ولا العشا ولا تعمل اي منظر كدة بدل مانتا مطنشهم بقالك حبة

برج الأسد عملياً

( الشغل والمذاكرة والتخطيط لبكرة ):

مهم عندك تبان مختلف ومستقل وغيرهم كلهم..قشطة انتا كل الحاجات دي اساسا بالفطرة..ايه الجديد..الطبيعي بتاع اي بني آدم انه مختلف ببصمته الوراثية ومستقل بتفكيره وعقله وميوله وغير الناس كلها اكيد برضة بمناخيره لأنه مفيش مناخير زي التانية ع الكوكب دة ودي حاجة علمية معروفة..حاول تتماهى مع محيطك وتتماشى معاه حبة وبلاش الانعرة الكدابة اللي بتطفش الناس من حواليك دي..انتا قلبك طيب فعلا..بين دة للناس اللي تستاهل يمكن دة يساهم ولو بشكل قليل ف تقليل احساسك انك لوحدك طول الوقت حتى ف وسط الزحمة

برج الأسد صحياً

( نفسيا وجسمانيا وكل مايخص طاسة المزاج ):

السمك يبقى لطيف النهاردة وكذلك الفاصوليا البيضا ام صلصة..ايهما اقرب لمزاجك ينفع ويمشي ويبقى فل الفل..المهم متاكلش قدام التلفزيون مش أكتر..

تعرف على توافق برج الأسد مع باقي الأبراج النهاردة:

متوافق مع الابراج المائية والترابية والخشبية

*****************************************************************************

حظك اليوم برج العذراء دوت مصر
حظك اليوم برج العذراء دوت مصر

إعرف حظك اليوم برج العذراء الأحد 8 أكتوبر 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً

( الكراش والإكس والبوي فريند والجيرل فريند والجوز والزوجة والقرايب ):

محتاج تصمد وتستحمل مش تكابر وتعاند..اليومين دول محتاجين مرونة شديدة جدا منك عشان كل حاجة تفضل ماشية سموزلي كدة ف طريقها ومتوقفش

برج العذراء عملياً

( الشغل والمذاكرة والتخطيط لبكرة ):

الحياة هتساومك على حاجة انتا بتحبها النهاردة..اتصرف صح وخليك عاقل وبص لقدام بشكل استراتيجي وخليك لئيم كدة وحويط ومحدش يقرا انفعلاتك بسهولة او يتوقع رد فعلك..مهم تبقى غامض حبة النهاردة..بس مش قوي عشان الافورة ف الغموض بتقلب بسذاجة وانتا مبتحبش السذاجة

برج العذراء صحياً

( نفسيا وجسمانيا وكل مايخص طاسة المزاج ):

الصحة تمام بس انتا محتاج تهتم حبة بالرياضة والحركة عشان الشتا داخل ومهم تستعد لدخوله بشكل استباقي فعال..الخضار النهاردة سيد الموقف خصوصا الكرنب وورق العنب..بالتالي المزاج هيظبطه المحشي جدا الليلة..ولو مفيش إمكانية لمحشي يبقى مكرونة وبانيه وشاي..إستمتع

تعرف على توافق برج العذراء مع باقي الأبراج النهاردة:

متوافق مع الابراج الهوائية والطينية

*****************************************************************************

حظك اليوم برج الميزان دوت مصر
حظك اليوم برج الميزان دوت مصر

إعرف حظك اليوم برج الميزان الأحد 8 أكتوبر 2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً

( الكراش والإكس والبوي فريند والجيرل فريند والجوز والزوجة والقرايب ):

من جواك طفل النهاردة وعاوز تتنطط على الكنب والسراير وتلعب ف كل حاجة ف البيت وتفتح كل الادراج تشوف جواها ايه وتمشي تلم ف زلط ملون صغنن وتملى بيه جيبك وبعد كدة تنزل تلعب ف الشارع وتروح ف اخر اليوم تجيب ايس كريم تكافئ نفسك بيه على المجهود الفظيع اللي انتا عملته طول اليوم..لو اللي بيحبك يفهم الكلمتين دول كويس تأكد انه هيفهمك مدى الحياة

برج الميزان عملياً

( الشغل والمذاكرة والتخطيط لبكرة ):

مش كل حاجة بتحصل حواليك تعتبرها مرازية شخصية مستقصداك انتا بالتحديد..الحياة مبتمشيش كدة..المرازية بتبقى نازلة من فوق السحاب زي المطر..عشوائية..ف ياريت متاخدش حياتك بشكل شخصي

برج الميزان صحياً

( نفسيا وجسمانيا وكل مايخص طاسة المزاج ):

الكشري ممكن يظبط الطاسة وكمان الجبن المميزة وكذلك المانجا..اشرب مية كتير وراعي الاملاح حبة لو عندك ومتنساش تاخد الفوار

تعرف على توافق برج الميزان مع باقي الأبراج النهاردة:

متوافق مع الابراج الهوائية والبرمائية

*****************************************************************************

حظك اليوم برج العقرب دوت مصر
حظك اليوم برج العقرب دوت مصر

إعرف حظك اليوم برج العقرب الأحد 8 أكتوبر 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً

( الكراش والإكس والبوي فريند والجيرل فريند والجوز والزوجة والقرايب ):

المنطق كل مابيشوفك بينط من البلكونة او بيضرب نفسه بالنار ف دماغه او ف بوءه..حرام عليك كدة..حيرت الناس معاك ومحدش عارفلك سيستم..حاول ترسى وتهدى كدة وتستقر على حاجة وتعرفنا بوضوح..انتا بتحبنا وحابب تتعامل معانا كزملاتك ف البشرية ولا مش طايقنا وعاوز تقعد لوحدك..ثم سواء بتحبنا او مبتحبناش..بتتخانق كل شوية ليه وبتتشحتف؟

برج العقرب عملياً

( الشغل والمذاكرة والتخطيط لبكرة ):

محتاج تحط نفسك مكان الناس اللي انتا بتلوم عليها انها بتبعد عنك وانتا تعرف كويس هما بيبعدوا ليه

برج العقرب صحياً

( نفسيا وجسمانيا وكل مايخص طاسة المزاج ):

المود مناسب لحفلة أكل النهاردة..تعيد فيها التأكيد على حبك وحرصك على استمرار الحياة على كوكب الارض وإعتبر انك بتحتفل بالحياة ذات نفسها الليلة لو قدرت كمان..اهم حاجة بس تبعد عن الشطة خالص

تعرف على توافق برج العقرب مع باقي الأبراج النهاردة:

متوافق مع الابراج الهوائية والنارية والفنكوشية

*****************************************************************************

حظك اليوم برج القوس دوت مصر
حظك اليوم برج القوس دوت مصر

إعرف حظك اليوم برج القوس الأحد 8 أكتوبر 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً

( الكراش والإكس والبوي فريند والجيرل فريند والجوز والزوجة والقرايب ):

في حد باصصلك ف الحب اللي بتحبه بشكل واضح وفج..واضح انك بتعرف تحب لدرجة مثيرة لغيرة الناس اللي مبتعرفش تحب..بس برضة انتا غلطان..المفروض تداري على الحب دة مش تباهي بيه..قولنا مليون مرة قبل كدة..داري على حبك يزيد..انما هتدخل الناس طرف ف العلاقة عشان انتا غاوي استعراض يبقى اكيد الناتج مش هيبقى حلو..بس مش ازمة..لسة في وقت ولسة تقدر تتصرف وتنجز المسألة صح

برج القوس عملياً

( الشغل والمذاكرة والتخطيط لبكرة ):

هتحتاج تستخدم ذكائك ودهائك النهاردة بشدة..صحصح كدة بس الاول وفوق وروق وشوف هتتعامل ازاي مع اللي هيحصل النهاردة بذكاء وهدوء وثقة ف النجاح

برج القوس صحياً

( نفسيا وجسمانيا وكل مايخص طاسة المزاج ):

خف من الدخان حبة عشان صدرك

تعرف على توافق برج القوس مع باقي الأبراج النهاردة:

متوافق مع الابراج الفاشية والمستحية

*****************************************************************************

حظك اليوم برج الجدي دوت مصر
حظك اليوم برج الجدي دوت مصر

إعرف حظك اليوم برج الجدي الأحد 8 أكتوبر 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً

( الكراش والإكس والبوي فريند والجيرل فريند والجوز والزوجة والقرايب ):

سقفك السما ومش من حق حد يقولك حدودك ايه ف الخيال او ف الحلم..انتا براحتك ف احساساتك لأنها حاجة تخصك لوحدك وميصحش حد يصب لخيالك صبة سقف وانتا قاعد تتفرج كدة وساكت..خد موقف

برج الجدي عملياً

( الشغل والمذاكرة والتخطيط لبكرة ):

من حقك تفرح بروحك طبعا بس الاهم انك تركز ف انك تبقى افضل واحسن..ركز ف انك تتطور مش تتغير بحيث تواكب متطلبات العصر الحديث واهي تبقى حاجة مفيدة ليك وللعالم تعملها بدل قعدتك دي

برج الجدي صحياً

( نفسيا وجسمانيا وكل مايخص طاسة المزاج ):

الخروج بالليل قشطة عليه النهاردة..الخروج بالنهار قشطة عليه برضة بس خلي بالك من الشمس ومن الزحمة ومتتكلمش كتير مع حد متعرفوش..الفضول هيخنقك النهاردة كمان انتا معندكش طاقة تعرف حد جديد

تعرف على توافق برج الجدي مع باقي الأبراج النهاردة:

متوافق مع الابراج الترابية

*****************************************************************************

حظك اليوم برج الدلو دوت مصر
حظك اليوم برج الدلو دوت مصر

إعرف حظك اليوم برج الدلو الأحد 8 أكتوبر 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً

( الكراش والإكس والبوي فريند والجيرل فريند والجوز والزوجة والقرايب ):

مهم تعرف قيمة الحاجات اللي عندك كويس قبل ماتحلم تخاويها بحاجات تانية..مهم المخزن يبقى فاضي ونضيف عشان الحاجات متتكربسشي جنب بعض ولا فوق بعض وينتج عن الجشع دة انك تبقى عندك كل حاجة بس مش عارف تستمتع بأي حاجة..ودة غلط..ف بلاش منه لو سمحت

برج الدلو عملياً

( الشغل والمذاكرة والتخطيط لبكرة ):

في حاجات كتير هتبانلك النهاردة وخصوصا الاهداف المزيفة البلاستك اللي الحياة بتشاغلك بيها كل فترة عشان تخليك تحيد عن الخط اللي انتا راسمه لنفسك ف الحياة وماشي عليه..واضح ان الحياة بتلاعبك اليومين دول..انبسطوا سوا ومتتخانقوش ياريت..

برج الدلو صحياً

( نفسيا وجسمانيا وكل مايخص طاسة المزاج ):

تكشف وتاخد الدوا وتهتم وتبطل دلع خالص لحد ما تخف وإلا هتحصل عكوسات مأندلة وكاسحة وممكن تأثر على دورة الحياة على كوكب الارض ف من نفسك كدة تخلي بالك من نفسك كويس

تعرف على توافق برج الدلو مع باقي الأبراج النهاردة:

متوافق مع الابراج الخشبية والغازية والدخانية

*****************************************************************************

حظك اليوم برج الحوت دوت مصر
حظك اليوم برج الحوت دوت مصر

إعرف حظك اليوم برج الحوت الأحد 8 أكتوبر 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً

( الكراش والإكس والبوي فريند والجيرل فريند والجوز والزوجة والقرايب ):

الطمع سيد الموقف النهاردة سواء ف العواطف او ف الحياة العملية..واضح ان نفسك اتفتحت ع الحياة..هاف فان وايل إيت لاستس..حقك محدش يقدر ينكر

برج الحوت عملياً

( الشغل والمذاكرة والتخطيط لبكرة ):

من حقك تحلم طبعا بامتلاك اي حاجة وكل حاجة..المشكلة بس ف الناس اللي هتخسرها وانتا ف طريقك للكل حاجة دة..هل هتهتم ولا هتكمل كأن مفيش حاجة حصلت..والأهم هل كدة هتبقى فعلا أخدت كل حاجة ولا خسرت كل حاجة..معضلة صعبة محتاجة منك تفكير عميق ومطول وانتا قاعد النهاردة ع القهوة بتشيش ولا بتشرب ف شاي

برج الحوت صحياً

( نفسيا وجسمانيا وكل مايخص طاسة المزاج ):

جسمك محتاج اهتمام والا هيبتدي يعلن عصيانه عليك وهيقرفك..خد بالك من الجو بالليل عشان متاخدش برد وحاول تنوع ف اكلك حبة..ودلع نفسك ف حبة بطاطس بالليل لو حسيت بأي نوبة قلق ولا حاجة

تعرف على توافق برج الحوت مع باقي الأبراج النهاردة:

متوافق مع الابراج المائية والبرمائية

*****************************************************************************

حظك اليوم وكل يوم
حظك اليوم وكل يوم