للكبار فقط | أكل لحوم البشر.. بين الحقيقة والتمثيل

ف فيلم "عوكل" محمد سعد كان بيهرب من طلعت زكريا وبيقول لـ "أوشة": "أخوكي بياكل صحابه".. الإفيه ده الناس لسه فاكراه لحد دلوقتي بس بطريقة كوميدية ساخرة بتبين أن طلعت زكريا اللي كان طالع ف دور "أخو أوشة" بيضرب صحابه.

بعد حوالي 10 سنين من الفيلم ده اشتهر لاعب كرة القدم الأورجواني لويس سواريز بـلقب "العضاض".. وده عشان الأخ دة كان بيعض لاعيبة الفريق اللي قدامه.. متعرفش بقى مكنش بياكل لحمة وهو صغير ولا كان بيتوحم على ايه في العضة دي.. المهم أنه اتوقف كتير بسبب "عضاته"..

نيجي لموضوعنا بقى.. من كام يوم في روسيا طلع خبر بيقول أنه اتقبض على راجل ومراته بتهمة "أكل لحوم البشر".. أيوة زي ما سمعت كده.. التهمة" أكل لحوم البشر".. يعني كانوا بياكلوا ناس حقيقيين زينا كدا وبيستمتعوا بكده كمان.. ومش بس كده دول قالوا إنهم أكلوا حوالي 30 بني آدم.. والشرطة لما دخلت عندهم البيت لقت 8 حتت لأعضاء بشرية متنوعة كانوا حاطينها في علب بلاستيك وفيها مياه بملح.. مخللينها يعني.. متخيل ممكن وأنت بتاكل مخلل جزر أو خيار في شخص في العالم بياكل مخلل عنين مثلًا أو مخلل قلب أو مخلل صوابع رجلين..

قصة الناس دي ايه بقى.. الراجل اسمه ديمتري باكشيف عنده 35 سنة من كراسنودار في جنوب روسيا.. وقال للشرطة إنه بدأ في أكل لحوم البشر من سنة 1999 "يعني بقاله حوالي 18 سنة".. ومكنش هو لوحده اللي بياكل اللحمة دي.. لازم يشارك أهل بيته طبعًا.. ف كانت مراته ناتاليا.. واللي بتشتغل ممرضة.. بتاكل معاه..

لما الشرطة جت تحقق معاهم قالت جايز مجانين عشان يعملوا كدا وياكلوا ناس تانية.. بس لما جابولهم دكاترة نفسيين عشان يكشفوا عليهم لقوا أنهم في كامل قواهم العقلية يعني بيعملوا كدا عشان هما عاوزين يعملوا كدا مش أكتر.. واعترفوا كمان بقتل 30 شخص في الـ 18 سنة اللي فاتوا.. يعني كانوا بيقتلوا شخصين تقريبًا في السنة عشان ياكلوهم.

الشرطة بقى لما فتشت البيت بتأني أكتر لقت مفاجآت وحاجات غريبة.. يعني مثلًا لقت 19 حتة جلد منزوعة عن جسم الميتين.. يعني سلخوهم بعد ما موتوهم وكانوا عاوزين يستخدموا الجلد زي جلود التماسيح والتعابين شنط وجزم وغيره.. وغير كده لقت الرفات - التراب اللي بيفضل بعد ما تحرق حد - بتاع 7 أشخاص محفوظين في برطمانات.. يعني بيحتفظوا بالميتين معاهم على هيئة تراب كمان..

تحقيقات الشرطة كشفت كمان أن ديمتري ومراته كانوا بيستخدموا مواد كيميائية مخدرة عشان يقدروا يخدروا الناس اللي هيصطادوهم عشان ياكلوهم.. لأنهم مش بياكلوهم صاحيين طبعًا يعني.. وهما دلوقتي محبوسين في السجن لحد ما الشرطة تخلص تحقيق.. ياريت بس مياكلوش السجناء اللي معاهم..

حدوتة أكل لحوم البشر دي مش أول مرة تحصل.. واتعمل عليها أفلام كتير فوق ما ممكن تتخيل.. بس من أبرز الأفلام اللي اتعملت عن الموضوع ده هو فيلم Alive من إنتاج سنة 1993.. واللي بيحكي عن فريق رجبي ركب طيارة من أوروجواي لتشيلي عشان يلعبوا ماتش.. بس لأجل حظهم النحس الطيارة وقعت بيهم فوق جبال الأنديز وخرجت طيارات بحث عشان تدور عليهم ولما ملاقتهمش اعتبروهم ماتوا.. لحد بعد شهرين لقوهم قدامهم مش كلهم طبعًا بس جزء منهم والشوية اللي عاشوا اعترفوا أن عشان يقدروا يعيشوا كانوا بيتغذوا على لحوم الناس اللي ماتت في الحادثة والناس اللي ماتت بعد كده.. وآه معلومة كمان عن الفيلم.. ده مبني على قصة حقيقية حصلت بكل تفاصيلها في الحقيقة سنة 1972.

الفيلم اللي فوق ده كان الفيلم الوحيد المبني على قصة حقيقية وناس أكلت لحوم البشر فعلًا.. بس في أفلام غيره كانت ناس بتاكل لحوم البشر بردو بس من وحي خيال المؤلفين والمخرجين.. يعني محصلتش في الحقيقة.. منها سلسلة أفلام Wrong Turn اللي بدأت من سنة 2003 لحد سنة 2014.. وأغلبها قصصها متشابهة بتحكي عن مجموعة من الشباب بيروحوا يقضوا أجازة نهاية الأسبوع في مكان منعزل عشان ياخدوا راحتهم وغالبًا بيكون في الغابة.. بس بيلاقوا في الغابة ناس بتصطاهم - أيوة بتصطادهم زي الحيوانات - عشان ياكلوهم.. وغالبًا الفريق أو المجموعة كلها بتموت ما عدا بطل واحد أو اتنين بالكتير دول اللي بيعيشوا.

طبعًا لو اتكلمنا على موضوع أكلة لحوم البشر لازم مننساش مسلسل Hannibal اللي قام ببطولته النجوم Mads Mikkelsen و Hugh Dancy.. المسلسل وعلى مدار 39 حلقة قدر يديلنا فكرة عن تلاعب دكتور هانيبال لكتر بالشرطة الأمريكية من جواها.. لما الشرطة طلبت مساعدته عشان يقدروا يقبضوا على قاتل متسلسل.. من غير ما يعرفوا أن هانيبال نفسه قاتل متسلسل.. شايفين الذكاء!

لو عاوز تقرا مواضيع تانية ويمكن احلى.. خش على اللينكات دي..

قط بلدي 

زا بانشر بتاع الأفلام vs زا بانشر بتاع المسلسلات.. مين يكسب؟

Marvel ولا DC.. مقارنة بين أشهر شركتين كوميكس