التوقيت الثلاثاء، 19 مارس 2024
التوقيت 06:16 ص , بتوقيت القاهرة

حظك اليوم الأربعاء 20 سبتمبر 2017 مع عبدالله أحمد..الأسد..متعضش حد ف قفاه

حظك اليوم الأربعاء 20 سبتمبر 2017
حظك اليوم الأربعاء 20 سبتمبر 2017

حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.


*******************


  : كلام جد


تخيل بركان اسمه بركان إنچي.



 


عشان تعرف حظك بشكل كامل .. صفي نيتك ودوس على اسم برجك بإيدك اليمين.


برج الحمل دوت مصر


إعرف حظك اليوم برج الحمل الأربعاء 20 سبتمبر 2017 مع عبدالله أحمد..


الحمل: من 21 مارس إلى 20 ابريل


برج الحمل عاطفياً ( الكراش والإكس والبوي فريند والجيرل فريند والجوز والزوجة والقرايب ):


متشتغلش حد النهاردة بذكائك ودهائك ولؤمك المفرط..بلاش


برج الحمل عملياً ( الشغل والمذاكرة والتخطيط لبكرة ):


اليوم مناسب للشغل بشكل كبير جدا..اي مجهود هتعمله النهاردة هيفيدك بعدين وبشكل كبير..ركز وركز اوي كمان


برج الحمل صحياً ( نفسيا وجسمانيا وكل مايخص طاسة المزاج ):


ضهرك محتاج يتفرد ف القعدة كويس عشان مترجعش تشتكي من وجعه البايخ..كمان انتا محتاج تبلبط ف البانيو حبة بالليل


إعرف توافق برج الحمل مع باقي الأبراج النهاردة


متوافق مع الابراج الغازية والهوائية


*****************************************************************************


برج الثور دوت مصر


إعرف حظك اليوم برج الثور الأربعاء 20 سبتمبر 2017 مع عبدالله أحمد..


الثور : من 21 ابريل إلى 20 مايو


برج الثور عاطفياً ( الكراش والإكس والبوي فريند والجيرل فريند والجوز والزوجة والقرايب ):


محدش مطنشك ولا حاجة هو بس انتا محتاج تقدر ان الناس بيبقى وراها شغل ومشاوير وحزن وإكتئاب زيك بالظبط بالتالي مش قاعدة تحت مزاجك طول الوقت عشان تسليك او تشوف مالك متضايق من ايه..عادي والله


برج الثور عملياً ( الشغل والمذاكرة والتخطيط لبكرة ): 


الهروب من المسئولية والإلتزامات حاجة والرغبة ف الحرية ورفض المفروض حاجة تانية خالص..اعتقد انتا عارف الفرق كويس


برج الثور صحياً ( نفسيا وجسمانيا وكل مايخص طاسة المزاج ):


اعزم نفسك على خروج وسينما وعشا واتمشى ودلع روحك ومفيش اي مانع تسلقلك كوزين درة وبعد..كدة تدهنهم زبدة وتوابل وتاكلهم..ايه اللي ممكن يحصل يعني لو عملت كدة..ولا حاجة وعادي خالص يعني


إعرف توافق برج الثور مع باقي الأبراج النهاردة:


متوافق مع الابراج النارية والكتكوتية


*****************************************************************************


برج الجوزاء دوت مصر


إعرف حظك اليوم برج الجوزاء الأربعاء 20 سبتمبر 2017 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً ( الكراش والإكس والبوي فريند والجيرل فريند والجوز والزوجة والقرايب ):


بدأت تدرك قد ايه انتا قوي خصوصا بحبك وقلبك اليومين دول..عشان تعرف بس انك مش ضحية للحياة ولا للظروف وللناس..انتا قوي فشخ..اثبت على كدة بقى حبة


برج الجوزاء عملياً ( الشغل والمذاكرة والتخطيط لبكرة ):


طالما ادركت قوتك ف الجانب العاطفي يبقى مهم تدرك قوتك برضة ف الجانب العملي من حياتك وتبتدي تخطط لمشروع صغير او كبير مش مهم المهم انك تبتدي وبس..ومين عارف..جايز تنجح وتنفذه ف يوم من الايام..مين يعرف


برج الجوزاء صحياً ( نفسيا وجسمانيا وكل مايخص طاسة المزاج ):


الفراخ النهاردة هيبقى تأثيرها لطيف على الصحة والمزاج خصوصا لو تبلتها بقرفة وبهارات وتوم كويس..قلل بس من السجاير اللي بتشربها ف الحمام ف السر النهاردة حبة


تعرف على توافق برج الجوزاء مع باقي الأبراج النهاردة:


متوافق مع الابراج الترابية والدخانية


*****************************************************************************


برج السرطان دوت مصر


إعرف حظك اليوم برج السرطان الأربعاء 20 سبتمبر 2017 مع عبدالله أحمد..


السرطان: من 21 يونيو إلى 20 يوليو


برج السرطان عاطفياً ( الكراش والإكس والبوي فريند والجيرل فريند والجوز والزوجة والقرايب ):


قلبك مش شغال النهاردة ليه..انتا بوظته ولا ايه؟


برج السرطان عملياً ( الشغل والمذاكرة والتخطيط لبكرة ):


اليوم كويس من الناحية العلمية والتكنولوجية..حاسب بس من أي حاجة فيها كهربا النهاردة


برج السرطان صحياً ( نفسيا وجسمانيا وكل مايخص طاسة المزاج ):


دلع نفسك حبة..دلع نفسك حبة وبلاش قمصة ونكد


تعرف على توافق برج السرطان مع باقي الأبراج النهاردة:


متوافق مع الابراج السنجابية والغازية


*****************************************************************************


برج الا?سد دوت مصر


إعرف حظك اليوم برج الأسد الأربعاء 20 سبتمبر 2017 مع عبدالله أحمد..


الأسد: من 21 يوليو إلى 20 اغسطس


برج الأسد عاطفياً ( الكراش والإكس والبوي فريند والجيرل فريند والجوز والزوجة والقرايب ):


حاول متاكلش حد النهاردة..هيبقى تصرف متوحش وعيب..بإختصار كدة متعضش حد ف قفاه


برج الأسد عملياً ( الشغل والمذاكرة والتخطيط لبكرة ):


وفر طاقة الغل اللي جواك لنشاط رياضي ولا عملي مفيد بدل مانتا داير كدة تقول يا شر إشتر..امسك نفسك بدل ماتعمل لنفسك مصيبة


برج الأسد صحياً ( نفسيا وجسمانيا وكل مايخص طاسة المزاج ):


القراية بتعمل حالة روقان انتا محتاجها النهاردة..كمان الاكل الدسم هيكبس على مراوحك ويخليك تنام..حاول تجربه النهاردة


تعرف على توافق برج الأسد مع باقي الأبراج النهاردة:


متوافق مع الابراج البرمائية


*****************************************************************************


برج العذراء دوت مصر


إعرف حظك اليوم برج العذراء الأربعاء 20 سبتمبر 2017 مع عبدالله أحمد..


العذراء: من 21 اغسطس إلى 20 سبتمبر


برج العذراء عاطفياً ( الكراش والإكس والبوي فريند والجيرل فريند والجوز والزوجة والقرايب ):


متخاطرش النهاردة خالص يامعلم ف اي اتجاه..خليك ف اللي تعرفه وبس..اللي متعرفوش اركنه على جنب..


برج العذراء عملياً ( الشغل والمذاكرة والتخطيط لبكرة ):


هرموناتك هتلاعبك النهاردة حبة مما قد يؤثر على حياتك العملية والعاطفية والروحانية تأثير قد يتراوح ما بين "شديد الخطورة" و"فكك متشغلش بالك"..


برج العذراء صحياً ( نفسيا وجسمانيا وكل مايخص طاسة المزاج ):


نظرك فيه مشاكل يبقى تكشف علاطول والا هتعاني من صداع بايخ فعلا هيفسد عليك يومك..كمان ابعد عن المسقعة النهاردة وخليك ف الكشري شوية


تعرف على توافق برج العذراء مع باقي الأبراج النهاردة:


متوافق مع الابراج الهوائية والغازية


*****************************************************************************


برج الميزان دوت مصر


إعرف حظك اليوم برج الميزان الأربعاء 20 سبتمبر 2017 مع عبدالله أحمد..


الميزان : من 21 سبتمبر إلى 20 اكتوبر


برج الميزان عاطفياً ( الكراش والإكس والبوي فريند والجيرل فريند والجوز والزوجة والقرايب ):


فكك من الانجازات..الحياة فيها مليون حاجة تانية اهم والله واولهم انك تبقى مبسوط من جواك بنفسك..مش عاوز تبقى ناجح عشان الناس تحبك وتحترمك..كدة بتفحت ف البحر حضرتك


برج الميزان عملياً ( الشغل والمذاكرة والتخطيط لبكرة ):


اللي يحبك هيحبك لشخصك وبس..غير كدة كلها مصالح وبتتصالح


برج الميزان صحياً ( نفسيا وجسمانيا وكل مايخص طاسة المزاج ):


بيتزا وماله..مش عيب


تعرف على توافق برج الميزان مع باقي الأبراج النهاردة:


متوافق مع الابراج اللي تعزمك على بيتزا بالليل


*****************************************************************************


برج العقرب دوت مصر


إعرف حظك اليوم برج العقرب الأربعاء 20 سبتمبر 2017 مع عبدالله أحمد..


العقرب: من 21 اكتوبر إلى 20 نوفمبر


برج العقرب عاطفياً ( الكراش والإكس والبوي فريند والجيرل فريند والجوز والزوجة والقرايب ):


متضيعش وقتك ف الانتقام من حد جرحك..دة تضييع حقيقي للوقت


برج العقرب عملياً ( الشغل والمذاكرة والتخطيط لبكرة ):


انتا مش هتربي حد..الحياة كفيلة بالناس الركش كمان متلعبش ف دماغ حد..الناس دماغها مش ناقصة الله يخليك..وخد بالك انك بتقلب الهزار لجد ف لحظة وبمنتهى الرعونة ودة هيخسرك ناس ياما ف حياتك على فكرة


برج العقرب صحياً ( نفسيا وجسمانيا وكل مايخص طاسة المزاج ):


ابعد عن النكد..ابعد عن النكد


تعرف على توافق برج العقرب مع باقي الأبراج النهاردة:


متوافق مع الابراج النارية


*****************************************************************************برج القوس دوت مصر


إعرف حظك اليوم برج القوس الأربعاء 20 سبتمبر 2017 مع عبدالله أحمد..


القوس: من 21 نوفمبر إلى 20 ديسمبر


برج القوس عاطفياً ( الكراش والإكس والبوي فريند والجيرل فريند والجوز والزوجة والقرايب ):


احترس من المشاوير الطويلة النهاردة خصوصا بالنهار..سواء جوة نفسك او براها ف الشارع


برج القوس عملياً ( الشغل والمذاكرة والتخطيط لبكرة ):


لكل فعل رد فعل..المنطق بيقول كدة..ف متستغربش اوي النهاردة من اللي هتشوفه


برج القوس صحياً ( نفسيا وجسمانيا وكل مايخص طاسة المزاج ):


محتاج تهتم حبة براحتك الجسمانية لأنه مينفعش تبقى طول الوقت مركز ف اهدافك وطموحك ومطنش صحتك..كدة هييجي وقت صحتك هي كمان هتطنشك وساعتها هتزعل


تعرف على توافق برج القوس مع باقي الأبراج النهاردة:


متوافق مع الابراج الهوائية والسنجابية


*****************************************************************************برج الجدي دوت مصر


إعرف حظك اليوم برج الجدي الأربعاء 20 سبتمبر 2017 مع عبدالله أحمد..


الجدى: من 21 ديسمبر إلى 20 يناير


برج الجدي عاطفياً ( الكراش والإكس والبوي فريند والجيرل فريند والجوز والزوجة والقرايب ):


ايه فايدة الحب لو تأثيره ضار عليك على المدى الطويل تفتكر؟..ثم ان محدش بيتغير..دة كله وهم وفطش اسود مالوش عازة


برج الجدي عملياً ( الشغل والمذاكرة والتخطيط لبكرة ):


إبعد عن رفقاء السوء يابني الله يباركلك وشوف اللي وراك وخلص مصالحك كدة عشان تفلح ف حياتك


برج الجدي صحياً ( نفسيا وجسمانيا وكل مايخص طاسة المزاج ):


رنجة ايه اللي بتفكر فيها..بذمتك دة وقت رنجة اساسا..اليوم مش مناسب للرنجة خالص..دة مناسب لتورتة ايس كريم وبس


تعرف على توافق برج الجدي مع باقي الأبراج النهاردة:


متوافق مع الأبراج الدخانية والمائية


*****************************************************************************


برج الدلو دوت مصر


إعرف حظك اليوم برج الدلو الأربعاء 20 سبتمبر 2017 مع عبدالله أحمد..


الدلو: من 21 يناير إلى 20 فبراير


برج الدلو عاطفياً ( الكراش والإكس والبوي فريند والجيرل فريند والجوز والزوجة والقرايب ):


متتخانقش النهاردة مع حد بتحبه ولا حد مبتحبوش..الخناق ملوش معنى وهيبوظ مودك على الفاضي..الافضل تواجه بهدوء وتواجه الحب بالحب والكره والمرازية ببوسة ف الهوا تحرق دم اي حد قاعد بس متفرغ للشر الرخيص المجاني


برج الدلو عملياً ( الشغل والمذاكرة والتخطيط لبكرة ):


خليك كبير ف نفسك ومتنزلش لمستوى الصراع على حاجات انتا عارف كويس انها متستاهلش الصراع اصلا


برج الدلو صحياً ( نفسيا وجسمانيا وكل مايخص طاسة المزاج ):


الفراخ ف التوابل والقرفة والبطاطس الشرايح والبصل والتوم والصلصة لما تتغلي ع النار حبة بتبقى تحفة وبتعدل المزاج جدا خصوصا خصوصا لو عرفت تظبط التوابل صح الصح وإهتميت يكون في قرن فلفل اخضر حامي جنب الاكل وكوباية لبن عشان تهدي نار الشطة وانتا بتاكل


تعرف على توافق برج الدلو مع باقي الأبراج النهاردة:


متوافق مع الابراج الترابية والبرمائية


*****************************************************************************


برج الحوت دوت مصر


إعرف حظك اليوم برج الحوت الأربعاء 20 سبتمبر 2017 مع عبدالله أحمد..


الحوت: من 21 فبراير إلى 20 مارس


برج الحوت عاطفياً ( الكراش والإكس والبوي فريند والجيرل فريند والجوز والزوجة والقرايب ):


محتاج تثق ف نفسك حبة ومحتاج تبطل تمثل انك بتثق ف نفسك حبة برضة..كمان ياريت تتأكد ان اللي بيقول انه بيحبك..بيحبك فعلا..عشان انتا شكلك بيتنصب عليك عاطفيا بقالك فترة كبيرة ومش حاسس او مفهم نفسك انه قشطة بمزاجي وعادي وكدة..إتأكد أحسن بدل ماتتفاجئ


برج الحوت عملياً ( الشغل والمذاكرة والتخطيط لبكرة ):


حب نفسك قبل ماتطلب من الاخرين يحبوها..متنساش


برج الحوت صحياً ( نفسيا وجسمانيا وكل مايخص طاسة المزاج ):


خد بالك من اي حد لابس ابيض او اخضر النهاردة..خلي بالك جدا..


تعرف على توافق برج الحوت مع باقي الأبراج النهاردة:


متوافق مع الابراج المائية والبرمائية


*****************************************************************************



حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.


ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..


إفتكر الكلام دا وانت بتقرا حظك اليوم النهاردة وبكرة وكل يوم ياريت .. 


وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..


الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..


 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..


تحياتنا الدائمة.


 


اعلان حظك اليوم دوت مصر


بلاي ليست دوت بالبلدي