راندي أورتن.. "ال?ايبر" رمز القوة.. حاسب ليفنشك على سهوة

راندي أورتن مصارع أبا عن جد.. الطفل المعجزة اللي تقدر تقول إنه اتولد في حلبة.. إتمرن على إيد عظماء ومخضرمين في اللعبة زي ريك فلير وتريبل إتش وشون مايكل.. لقبه هو "الفايبر".. التعبان السريع اللي بياخد خصمه على سهوا.. وبينه وبين الفوز حركة واحدة بس.. "آر كيه أو".. الفينش الشهير بتاعه..

اسمه بالكامل راندل كيث أورتن.. عنده دلوقتي 37 سنة.. أبوه كاوبوي بوب أورتن مصارع قديم وموجود في حائط البطولات "الهول أوف فيم".. وجده وعمه كمان كان مصارعين.. انضم لاتحاد الدبليو دبليو إي وهو عنده 21 سنة.. ودخل المجال ضمن فريق "إيفولوشن" في 2002.. اللي كان فيه الأسطورة تريبل إتش والعجوز المخضرم ريك فلير والوحش باتيستا.. وكان الفريق ده مكسر الدنيا وقتها وكعبه عالي على أي حد.. وساعتها أورتن أثبت أد إيه هو لاعيب موهوب وعنده قدرات مذهلة.. من مهارة وسرعة وذكاء.. وقال فلير مرة عنه إنه أكتر مصارع موهوب شافه في خلال 10 سنين على الأقل..

كانت مشكلة راندي أورتن من بداية ظهوره لحد وقت قريب الغرور والعنجهية.. مكنش بيهمه حد ولا فارق معاه حاجة.. طريقة كلامه وحشة وتصرفاته غير مسئولة.. يطلع يضرب الأندر تيكر من غير سبب.. يتدخل في أي ماتش يعجبه.. فنش بنت من الديفا قبل كده عشان يثبت إن قلبه ميت.. ضرب أبو جون سينا في مرة لمجرد إنه خسر ماتش.. وحاجات كتير بقى يامعلم خلت الكل ياخد عنه الفكرة دي..

كان لقب راندي أورتن في فترة هو هادم الأساطير "ليجند كيلر".. لأنه كان بيضرب العظماء وبتوع حائط البطولات ويقهرهم.. زي رودي بايبر وجايك ذا سنيك روبرت وفلير.. ومن أشهر عداواته في الفترة دي كانت مع الأندر تيكر.. اللي مكنش خصم سهل خالص.. وفنشه وفنش أبوه قبل كده في ماتش.. ولعبوا مع بعض ماتش قفص مقفول "هيل إن سيل".. وماتش تابوت "كاسكيت".. والعد في أي مكان.. وكسب تيكر في ماتشات وكسب أورتن في ماتشات تانية..

زي ما قولنا راندي أورتن قعد فترة في فرقة إيفولوشن كتابع.. لحد ما قال أنا مش هعيش في جلباب أبي بقى.. قصدي كتابع.. وطمع وقتها في حزام الوورلد شامبيون اللي كان مع تريبل إتش.. وجاتله الفرصة إنه يلاعبه عليه.. لكن طبعا إتش مداهوش الفرصة ونزل عليه بضرب وتكسير.. أصل الحزام ده كان الفترة دي تخصص تريبل إتش وكان واخده 10 مرات.. وحصلت بعد كده عداوة كبيرة جدا بينه وبين أورتن.. وقدر راندي أورتن ياخد في النهاية حزام الاتحاد ويطلع لسانه لإتش وفرقته كلها.. لأنه حقق كمان رقم قياسي وهو إنه أصغر مصارع ياخد حزام بطولة العالم في تاريخ الاتحاد.. وكان عنده 24 سنة..

راندي أورتن ضد سينا.. من أشهر وأشرس العداوات في مسيرة الاتنين.. وفي تاريخ الدبليو دبليو إي كله أصلا.. استمرت لمدة سنتين على الأقل.. ماتشات سلم وترابيزات وبلا قوانين وكل حاجة تتخيلها.. وكان الفوز سجال ما بينهم.. لحد ما جه وقت أهم ماتش في تاريخ الاتنين.. لما قرر الاتحاد إنه يدمج حزامين الدبليو دبليو إي شامبيون والوورلد شامبيون في حزام واحد.. واتعلق فوق في ماتش سلم.. وبعد عاركة جامدة.. وبخباثة راندي أورتن المعهودة.. قدر إنه يشبك سينا في الحبال بكلابشات.. وفاز راندي أورتن بالحزام وحقق إنجاز كبير جدا في تاريخه اللي مليان وحافل بالبطولات..

راندي أورتن أخد حزام بطولة العالم في الدبليو دبليو إي 12 مرة.. يعني يعتبر من أكتر المصارعين فوزا باللقب ده.. آخرها كان من كام شهر لما فاز على المخيف براي وايت.. وخد شنطة الماني إن ذا بانك مرتين.. وكسب مشاهير وعظماء زي الأندرتيكر وتريبل إتش وسينا وسي إم بانك.. وخد حزام التاج تيم 5 مرات.. وشارك في فرق كتير مشهورة زي إيفولوشن والوايت فاميلي .. ولسه الفايبر بيلعب لحد النهارده وشكله مش ناوي يعتزل قريب.. والكل خايف ليفنشه على سهوا.. خلى بالك بقى ..

لو عجبك الموضوع ده وحابب تقرا زيه أو أحسن خش هنا

دوت بالبلدي

"بانكسي" اتقبض عليه يارجالة.. تعرف مين ده؟ تعالى وأنا أقولك

كريس جيركو.. غلب الروك وأوستن في ليلة واحدة.. وكله في "اللِستة" الصفرا