حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

: كلام جد

اللي متنكد بجد بيعيط وبيقطع ف شعره وف هدومه..غير كدة بتعتبر محاولة فاشلة للنكد.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

برج الحمل دوت مصر
برج الحمل دوت مصر

إعرف حظك اليوم برج الحمل الخميس 14 سبتمبر 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً ( الكراش والإكس والبوي فريند والجيرل فريند والجوز والزوجة والقرايب ):

واخرة البوز دة ايه بالظبط...هتفضل شايل طاجن ستك كدة ومتنكد لحد امتى ياحزين

برج الحمل عملياً ( الشغل والمذاكرة والتخطيط لبكرة ):

حاول تفرفش ..محدش واخد منها حاجة ف انبسط احسن..

برج الحمل صحياً ( نفسيا وجسمانيا وكل مايخص طاسة المزاج ):

تقدر تبتكر مليون طريقة للإنبساط لو ركزت وصفيت نيتك كويس..يعني مثلا تقدر تسقي بقسماط ف طبق جبنة بالقوطة ومع كل قطمة تاخد شفطة شاي او ممكن تسقي مقرمشات ف طبق مسطردة او كاتشاب وممكن برضة تبطل تعمل شعرك زعارير عشان مش فال حلو عليك ولا على شعرك ولا على الكائنات الحية اللي عايشة جوة شعرك

إعرف توافق برج الحمل مع باقي الأبراج النهاردة

متوافق مع الابراج الحبشتكانية ( أي الابراج التي تهتم بالتفاصيل) زي امبارح بس بشكل اقوى

*****************************************************************************

برج الثور دوت مصر
برج الثور دوت مصر

إعرف حظك اليوم برج الثور الخميس 14 سبتمبر 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً ( الكراش والإكس والبوي فريند والجيرل فريند والجوز والزوجة والقرايب ):

مقريف حبة ومودك مش مظبوط ودة طبعا لأنك مش بتهتم تعدل طاسة دماغك كما يجب

برج الثور عملياً ( الشغل والمذاكرة والتخطيط لبكرة ):

مهم تاخد خطوة للأمام النهاردة ف مستقبلك ومهم تصحى مفرفش وناوي تعمل حاجة حلوة مش تكدر ف نفسك وتلومها على كل حاجة بتحصل

برج الثور صحياً ( نفسيا وجسمانيا وكل مايخص طاسة المزاج ):

مهم تبطل الندب الداخلي اللي داير جواك بقاله حبة دة..ابتسم تبتسم لك الحياة والكائنات الحية

ومهم تبعد عن اللون الاسود ف الهدوم سواء على المستوى الداخلي او الخارجي

إعرف توافق برج الثور مع باقي الأبراج النهاردة:

متوافق مع الابراج النارية والبرمائية

*****************************************************************************

برج الجوزاء دوت مصر
برج الجوزاء دوت مصر

إعرف حظك اليوم برج الجوزاء الخميس 14 سبتمبر 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً ( الكراش والإكس والبوي فريند والجيرل فريند والجوز والزوجة والقرايب ):

الاجواء فيها ترقب وانتظار لفرحة قادمة ف الطريق بتجري..المشكلة ان الفرحة دي مش باينة لسة بالنسبالك عشان لابسة لون غامق وبتتحرك بالليل بس..

برج الجوزاء عملياً ( الشغل والمذاكرة والتخطيط لبكرة ):

ثق ف نفسك واستعد للفرحة وانتا تعرف تفرح..غير كدة مش هتشوفها ولا هتاخد بالك منها الا اذا خبطت على كتفك وقالتلك انا الفرحة وجاية عشانك ودة مستحيل يحصل ف الحقيقة وانتا عارف كدة كويس..

برج الجوزاء صحياً ( نفسيا وجسمانيا وكل مايخص طاسة المزاج ):

الخروج بالليل مهم وهيتوقف عليه حاجات كتير ف حياتك خصوصا لو خدت بالك من شكل القمر اللي انتا متوافق معاه بقالك فترة.

تعرف على توافق برج الجوزاء مع باقي الأبراج النهاردة:

متوافق مع الابراج النارية والغازية والسنجابية والهوائية

*****************************************************************************

برج السرطان دوت مصر
برج السرطان دوت مصر

إعرف حظك اليوم برج السرطان الخميس 14 سبتمبر 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً ( الكراش والإكس والبوي فريند والجيرل فريند والجوز والزوجة والقرايب ):

حاول تروح متحف النهاردة ولا جنينة او تلعب مع عيال صغننة او اي حاجة تغير بيها من ايقاعك ونشاطك اليومي اللي اقترب من كونه روتين ممل سئيل بايخ وخنيق وبيجبرك تعامل نفسك والناس بشكل فيه زهق وعدم اهتمام وتوهان..

برج السرطان عملياً ( الشغل والمذاكرة والتخطيط لبكرة ):

مهم تنبسط بجد مش تمثل انك مبسوط عشان محدش يشمت فيك..

برج السرطان صحياً ( نفسيا وجسمانيا وكل مايخص طاسة المزاج ):

فكك من اراء الناس وخد وضعك ف الحياة واعرف انه من حقك تنبسط وبسهولة مهما كان اللي حواليك ناس نكد..مهم تاكل ايس كريم وتسمع مزيكا جديدة الليلة

تعرف على توافق برج السرطان مع باقي الأبراج النهاردة:

متوافق مع الابراج الهوائية والترابية

*****************************************************************************

برج الأسد دوت مصر
برج الأسد دوت مصر

إعرف حظك اليوم برج الأسد الخميس 14 سبتمبر 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً ( الكراش والإكس والبوي فريند والجيرل فريند والجوز والزوجة والقرايب ):

مهم تخرج من محيطك النهاردة..مهم تغير مكان ومهم تفطر كويس.. حاول تداري قرفك من الناس والحياة حبة النهاردة..

برج الأسد عملياً ( الشغل والمذاكرة والتخطيط لبكرة ):

الاكل بالليل عاوز صحبة لطيفة ومتفهمة لانك مبتحبش وجع الدماغ خصوصا ف فترة المساء والسهرة..

برج الأسد صحياً ( نفسيا وجسمانيا وكل مايخص طاسة المزاج ):

كمان تجنب الناس اللي بتكلمك عنك كأنهم يعرفوك كويس وهما ف الحقيقة بيقولوا تكهناتهم الشخصية عنك مش اكتر كمحاولة للتقرب منك..انتا مش محتاج الموالسة دي خالص ولا الايجو بتاعك محتاج يتنفخ اكتر من كدة.. بالعكس دة ممكن يفرقع.

تعرف على توافق برج الأسد مع باقي الأبراج النهاردة:

متوافق مع الابراج الهوائية والترابية والسنجابية

*****************************************************************************

برج العذراء دوت مصر
برج العذراء دوت مصر

إعرف حظك اليوم برج العذراء الخميس 14 سبتمبر 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً ( الكراش والإكس والبوي فريند والجيرل فريند والجوز والزوجة والقرايب ):

معلش..تعالى على نفسك وقول كلام حلو للي بتحبه..معلش..

برج العذراء عملياً ( الشغل والمذاكرة والتخطيط لبكرة ):

متهملش ف شكلك او هدومك او شياكتك بشكل عام النهاردة تحت اي بند..شياكتك بتعكس اهتمامك بنفسك ودة بيعكس بالتالي مدى ثقتك بنفسك اوتوماتيك..

برج العذراء صحياً ( نفسيا وجسمانيا وكل مايخص طاسة المزاج ):

الصواني والطواجن بتناديك وانتا مش واخد بالك..لغوص براحتك النهاردة خصوصا وانك من الاسبوع الجديد هتضطر ترجع للدايت من تاني وبشدة.

تعرف على توافق برج العذراء مع باقي الأبراج النهاردة:

متوافق مع الابراج الغازية

*****************************************************************************

برج الميزان دوت مصر
برج الميزان دوت مصر

إعرف حظك اليوم برج الميزان الخميس 14 سبتمبر 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً ( الكراش والإكس والبوي فريند والجيرل فريند والجوز والزوجة والقرايب ):

متستناش الفرحة تخبط عليك الباب وانزل طاردها واقفشها بنفسك ف الحياة..قلبك جاهز للحب وهتنبسط لو سمعت كلام حلو النهاردة..

برج الميزان عملياً ( الشغل والمذاكرة والتخطيط لبكرة ):

مهم متمسكش ودان حد النهاردة وتنزل بطاقتك الجبارة ف الرغي او ف الشكوى..تفائل هتلاقي اليوم جميل ومفرح..

برج الميزان صحياً ( نفسيا وجسمانيا وكل مايخص طاسة المزاج ):

شعرك جميل النهاردة ماشاء الله.

تعرف على توافق برج الميزان مع باقي الأبراج النهاردة:

متوافق مع الابراج المائية والبرمائية

*****************************************************************************

برج العقرب دوت مصر
برج العقرب دوت مصر

إعرف حظك اليوم برج العقرب الخميس 14 سبتمبر 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً ( الكراش والإكس والبوي فريند والجيرل فريند والجوز والزوجة والقرايب ):

جميل النهاردة وحابب تبقى محبوب وعندك استعداد تنبسط جامد.. بس خد بالك..

برج العقرب عملياً ( الشغل والمذاكرة والتخطيط لبكرة ):

انتا شايف مصلحتك واللي انتا عاوزه وبس طول الوقت ومش ف دماغك اي حاجة تانية ولا هتخسر مين ف طريقك للمصلحة دي..قشطة انتا حر ف حياتك طبعا بس هتعمل ايه لما ف الاخر المصلحة دي تطلع بلاستك او سراب؟..هيبقى احساس صعب.. ومش هيعدي بالساهل..

برج العقرب صحياً ( نفسيا وجسمانيا وكل مايخص طاسة المزاج ):

مهم تهتم ببشرتك النهاردة بشكل مكثف عشان الميكروبات اشتكت من قلة اهتمامك بيها.

تعرف على توافق برج العقرب مع باقي الأبراج النهاردة:

متوافق مع الابراج اللي مش فاهماك كويس

*****************************************************************************

برج القوس دوت مصر
برج القوس دوت مصر

إعرف حظك اليوم برج القوس الخميس 14 سبتمبر 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً ( الكراش والإكس والبوي فريند والجيرل فريند والجوز والزوجة والقرايب ):

متتكلمش على حد مع اي حد عشان واضح ان كل الكلام بشكل ما غامض بيوصل لكل حد وبيعمل مشاكل وهترجع تندم وتزعل وانتا مش ناقص..

برج القوس عملياً ( الشغل والمذاكرة والتخطيط لبكرة ):

راعي ان اليوم ممكن يعدي هادي جدا وسلس ومن غير اي معوقات سواء نفسية او عصبية او جسمانية..ف متفسدش يومك بنفسك.. بلاش..

برج القوس صحياً ( نفسيا وجسمانيا وكل مايخص طاسة المزاج ):

السهر بالليل النهاردة محبب وينصح بيه طالما كانت الرفقة حلوة وبتمشي بهداوة مش بتمد وتجري منك ف الشارع..عموما حاسب وانتا بتعدي الشارع النهاردة..بس كدة

تعرف على توافق برج القوس مع باقي الأبراج النهاردة:

متوافق مع الابراج النارية والهوائية

*****************************************************************************

برج الجدي دوت مصر
برج الجدي دوت مصر

إعرف حظك اليوم برج الجدي الخميس 14 سبتمبر 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً ( الكراش والإكس والبوي فريند والجيرل فريند والجوز والزوجة والقرايب ):

انتا مش سوبر هيرو..متنفعش..خصوصا وانك من جواك متناقض ف حاجات كتير جدا..

برج الجدي عملياً ( الشغل والمذاكرة والتخطيط لبكرة ):

مش طبيعي انك تتوهم انك عادل او بتحب الخير..كمان انتا لما بتكره بتكره بجد وبتقلب بجد وبتعتمد دايما على انك بقدراتك الكلامية ممكن تبلف اللي قدامك وتطلعه هو اللي غلطان مهما كنت عاكك الدنيا على نفسك او على اللي حواليك..الطبيعي انك تتواضع وتخليك طبيعي وتدرك انك زيك زينا كلنا بتغلط والمفروض تتعود تعتذر وتصحح غلطك..

برج الجدي صحياً ( نفسيا وجسمانيا وكل مايخص طاسة المزاج ):

عموما إبعد النهاردة عن اللون الاصفر والاكل المسبك بقوطة والوقوف ف البلكونة والبحلقة ف الناس.

تعرف على توافق برج الجدي مع باقي الأبراج النهاردة:

متوافق مع احساسك انك سوبر هيرو

*****************************************************************************

برج الدلو دوت مصر
برج الدلو دوت مصر

إعرف حظك اليوم برج الدلو الخميس 14 سبتمبر 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً ( الكراش والإكس والبوي فريند والجيرل فريند والجوز والزوجة والقرايب ):

الحب على الابواب..متقولش لحد بقى عشان متتحسدش..

برج الدلو عملياً ( الشغل والمذاكرة والتخطيط لبكرة ):

يوم جامد فحت..كل المطلوب منك انك تقدّر انه يوم حلو ومتسمحش لأي كائن حي انه يضايقك او يخرب مودك الرايق بأي شكل من الاشكال مهما كان

برج الدلو صحياً ( نفسيا وجسمانيا وكل مايخص طاسة المزاج ):

مش مهم الوقت ولا مهم المكان ولا مهم الألوان..المهم تبقى من جواك صافي ونقي وبس..ومتخربش الدنيا اكل عشان مهم تبقى خفيف النهاردة عشان تعرف تطير خصوصا وانك هتتباس ياعباس

تعرف على توافق برج الدلو مع باقي الأبراج النهاردة:

متوافق مع الابراج السنجابية

*****************************************************************************

برج الحوت دوت مصر
برج الحوت دوت مصر

إعرف حظك اليوم برج الحوت الخميس 14 سبتمبر 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً ( الكراش والإكس والبوي فريند والجيرل فريند والجوز والزوجة والقرايب ):

مفيش حاجة اسمها ملكش مزاج تنبسط وملكش مزاج تضحك..امال هتكيد اعدائك ازاي ان مكنتش تتظاهر ان كل حاجة كويسة وزي الفل وانك بتعيش اجمل ايام حياتك..فكر تاني ف الموضوع..

برج الحوت عملياً ( الشغل والمذاكرة والتخطيط لبكرة ):

محتاج تركز حبة النهاردة ف اللي وراك عشان تعرف تفضي دماغك لأجازة اخر الاسبوع ولا انتا حابب تضيعها هي كمان ولا ايه..

برج الحوت صحياً ( نفسيا وجسمانيا وكل مايخص طاسة المزاج ):

مهم النهاردة حد بيحبك يعزمك على خروجة مكلفة بالنسباله عشان تتأكد انه بيحبك وانه مش بخيل عليك لا بمشاعره ولا بفلوسه ولا بوقته

تعرف على توافق برج الحوت مع باقي الأبراج النهاردة:

متوافق مع الابراج الترابية والبرمائية

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.