القاهرة 21°

مِنْ نَظِرَة عَيْنَ

أشارت بطرف العين خيفـة أهلهـا
إشـارة محـزون ٍِ ولــم تتكـلـم ِ

فأيقنت أن الطرف قد قـال مرحبـا
وأهـلا وسهـلا بالحبيـب المتيـم ِ



تصدقوا إن "العَيْنَ" ممكن تقول كل الكلام والأحاسيس دي في نظرة واحدة؟

أيوة ممكن؛ لأن العَيْنَ هي مراية الروح. طيب مش في عَيْنَ ممكن تفضحك؟.. وعين تسحرك؟.. وعيون جريئة، وغيرها بريئة؟.. عمرك مرة قلت لحد عينك في عيني؟.. سألت ليه قلت كده؟.. طبيعي علشان تعرف صدقة من كذبه.

يلا معايا نشوف إيه حكاية العيون دي.. وإزاي نفك ألغازها.

أول نظرة مهمة جدًا، من خلالها هناخد بالنا من حاجات كثيرة، أهمها لو الإنسان اللي بينظر لك نظرتة ثابتة، ده يؤكد ثقته بنفسه، وخصوصًا لو النظرة مدتها طويلة قبل ما تتقطع ويبصلك تاني.

العكس صحيح، كل ما قلت نظرات الشخص ليك أو تهربت من النظر المباشر للعين، ده معناه إنعدام أو قلة الثقة بالنفس.

تعالوا نجرب حاجة بسيطة، لو شخص معاك، و طلبت منه يتخيل نخلة تحتها عربية سوداء كبيرة، هتلاقى عينيه نظرت أعلى اليمين، بعدها طلبت منه يتذكر حدث فى الماضي، هتلاقي عينيه اتجهت أعلى الشمال.

ده بيرجح إن نصف المخ اليمينهو المسئول عن تكوين الصور، والنصف الشمال مسئول عن الذاكرة. و ده عند 95% من البشر، ماعدا الشخص الأعسر.

لو جربنا حاجة كمان وطلبت من شخص تخيل صوت عصفور أو صوت جيتار، هتلاقي عينه اتجهت لليمين، لكن في الوسط بمستوى الأذن، لو طلبت منه تذكر صوت مدرسة في مرحلة الثانوي، هتلاقي الإتجاه للشمال في مستوى الأذن بردوا.

ده معناه إن العين اتجهت ناحية الجزء المخصص في المخ مع زميلتها الأذن؛ لتكوين أو تذكر الصورة مع الصوت.

هنلاقي العين للأسفل يمين وشمال، لما يتصل الموضوع بتكوين إحساس أو تذكر إحساس معين.
...

رمش عينه اللي جارحني رمش عينه
رمش عينه اللي دابحني رمش عينه
أو
صادونا برمش العين... وقطعوا القلب شطرين


هى الرموش كمان بتجرح و تصطاد؟.. حتى الرموش لها لغة و لها تعبير و معاني كثير؟

هنتكلم الأول عن عدد الرمشات.. لو كثيرة و متتالية، معناه إما حب مما تسببه مادة الادرينالين من إثارة للمشاعر، وهي أيضا نفس المادة التي تفرز عند الخوف، الانسان اللي بيكذب بيحاول عدم الرمش عشان مينكشفش، فنلاقي الكاذب يركز و يبرق لما يتواجه بشيء. كمان الشخص بيرمش كثير لما يكون بيفكر كثير.

مدة الرمشة اذا كانت طويلة ده معناه الملل اللي بيشعر بيه، ولو كانت قصيرة جدًا تكاد تكون غير ملحوظة، فده يدل على الحب و المودة للمتكلم، و قالتها كوكب الشرق، يصعب عليا رمشة عنيا ولاحتى ثانية.
...

خلينا نغوص داخل العين للننى و نشوف حكايته ده كمان.

نني العين، ممكن نعرف منه حاجات كثيرة، أولها لو الانسان كذاب النني بيكون غير ثابت على الاطلاق. لما يكون الانسان مشوش الفكر أو غير كامل التركيز؛ فيتحرك النني حركات بسيطة غير منتظمة. أما لو ثابت فده معناه إنه كامل التركيز مع الكلام أو يحاول التركيز. لما يكبر حجم النني ده معناه الاهتمام الشديد بالشخص المتحدث والإعجاب الشديد.

الحاجب أو حارس العين هو إطار العين، ولكنه كاشف لأسرار الشخص. إذا رفع الشخص الحاجبين ، ده استغراب أو اندهاش، لما يرفع الحاجبين عند السؤال، هذا معناه إنه عارف الإجابة و مستعد ليها. أما رفع حاجب واحد لأعلى معناه التحفز أو التشكيك في الكلام، وساعات الموافقة على الكلام بعد جدل كبير.

إذا انخفض الحاجبان لأسفل، ده يعني الغضب أو التذمر من حاجة. وممكن تترجم سيطرة أو التعالي، أما إذا انخفض الحاجبين ومعاهم الراس، فده معناه الإنهزام أو الخديعة، وعدم رغبة الشخص في إظهار عينه.

كل الكلام و الأسرار دي من نظرة عين.. مهما حاولتوا تخبوا او تداروا عينيكم هتفضحكم.