القاهرة 21°

قلب المؤمن دليله

أنا جاية لك من مسافات بعيدة.. أنا قلت محدش هيجيب لي حقي غيرك إنت

قالولى هيضربوكى بالنار.. قلت لهم السيسي ما بيضربش الشعب بالنار.. عمره ما يضرب أهله بالنار

عايزة حقي بالشرف عايزة أبقى بنى أدمة.. عيالي فخورين بيا.. بالشرف ياريس

إنت أول ريس حافظ على شرف المرأة المصرية

أنا قلت لو هموت برصاصة لازم أقابلك

إنت اللي شرفتنا

الناس هنا غلابة ياريس.. يقولوا زيت.. يقولوا سكر.. ملهيين.. بس بيحبوك

يمكن في اللي يجي من بره عايز يقول كلام وحش يكرهنا فيك

بس قلب المؤمن دليله

..

دى كانت كلمات سيدة بسيطة الحال .. أم طيبة عفوية الكلمات .. استوقفت الرئيس السيسى فى طريقه وقت زيارته لأسوان لحضور فعاليات المؤتمر الوطنى للشباب.

ممكن يظن البعض أنها تمثيلية مرتبة واللقاء معد مسبقا و السيدة تم تلقينها هذه الكلمات ..

وهذا الظن مش هيخرج إلا من فئتين فئة مش شايفة إلا السلبى لأنها من سنين كتيرة لم تشاهد الايجابى.. أو فئة تعرف جيدا أن اللقاء تلقائى غير مرتب لكن أخذتها العزة بالإثم ..

وإنتم بقى يا تايهين مش عارفين هل الرئيس صح ولا غلط... هل توكلتم على الله حق توكل زى الست البسيطة واتعلمتوا منها ؟..

هذه السيدة اعطتنا كلنا درس ... درس فى التوكل على الله علشان يبصرنا بالحق والخير.

طالما هى على حق .. قالته ولكن بأدب وحب وتواضع .. قالته لإنها شايفة اللى كتير مش قادر يشوفه بسبب اما طمعه أو وجوده فى وسط طماع او ناقل للاشاعات من غير تحقق ومن غير عمل .
لسه تايهيين؟؟؟

الصورة واضحة
اللى معرض حياته للخطر ..مابيضحكش على حد
اللى نازل فى وسط الناس مش خايف ..مابيضحكش على حد
اللى بيسمع للشباب وينصفهم ويكرمهم .. مابيضحكش على حد
اللى بيحاسب المسئولين أول مابيوصل له خبر فساد او اهمال .. مابيضحكش على حد
اللى بيجري على كفيف البصر يرشد طريقه .. مابيضحكش على حد
اللى بيقف جنب ذو الاحتياج يسنده .. مابيضحكش على حد
اللى ينصر المرأة ويسمع لها بابتسامة .. مابيضحكش على حد
اللى بياخد الاطفال فى حضنه ويمشوا معاه .. مابيضحكش على حد

لو عايز فعلا الحق هتفرح لما تشوف هذه المشاهد الإنسانية .. هيكون سعيك لتحقيقها ومش هتلتفت إنك تظهر فيها ..

ووقتها بس هتصدق المشهد وقلبك هيدلك للصح ..

بلدنا مش محتاجة كلمة (أنا) .. محتاجة كلمة حق وعمل جد ..

بلدنا محتاجة نشوف الخطأ ونقول عليه بروح صادقة ولسان مهذب ونية حقيقية فى التغير مش مجرد انتقاد و نفس مش بيعجبها العجب .. محتاجة نبطل نشك فى بعض وننتهى عن الشك فى رئيسنا اللى شال روحه على كفه واختار يتحمل مسئولية وطن منهك من 40 سنة وأكتر
..
فى اخطاء .. فى مشاكل .. فى فساد .. كل ده حقيقى .. وحله مش التكذيب ولا التهويل

حل مشاكلنا ..إنك تشوف صح و تضع حلك وتخلص فى شغلك وتقول رأيك كمواطن راقى عايز فعلا الحل وليس الهدم ...

نقدم جهودنا وننكر ذاتنا .. لإن الثمن هيكون المرة دى غالى .. لاقدر الله لو مصر وقعت مش هتقوم تانى .

وطالما فى مصر مثل هذه السيدة البسيطة المتوكلة على الله .. مش هتقع أبدا

نتعلم منها و نسلم قلبنا لبلدنا هيدلنا لخيرها و خيرنا

دمتم أصحاب قلوب صافية محبة لمصر.