القاهرة 20°
دوت مصر

غداء عمل

من كام يوم كان عندي غداء عمل مهم، وكان فيه صاحب الدعوة، و٣ كمان. وصلت في ميعادي أنا و صاحب الدعوة وشخص كمان ، قعدنا و بدأ الشخص في التدخين، وصاحب الدعوة سألنا تطلبوا إيه؟ أنا طلبت ميه، والشخص التاني طلب عصير، صاحب الدعوة طلب ميه زي، واكتمل الاجتماع و بدأنا نطلب الغداء.

كله طلب مشويات تقريبًا أو ستيك، وحاجات خفيفة ما عدا الشخص اللي وصل معايا طلب جمبري بصوص الكابوريا ..وماله ما يطلب اللي هو عايزه، صحيح مش هو معزوم واتحسبت عليه عزومة؟

حاجات كتير في اخلاقيات العمل أو واجباته بتفوت علينا، لكن ممكن حاجات بسيطة تخلي منظرنا مش حلو خصوصًا لو عشاء عمل أو غداء عمل، بيتعمل فيه صفقات مهمة.

أول حاجة لازم نعرف الفرق بين غداء العمل وعشاء العمل، غداء العمل بيكون للاجتماعات القصيرة أو السريعة أو الطارئة؛ لأن وقت الغداء بيكون محدد مش زي وقت العشاء للاجتماعات الموسعة الطويلة.

في غداء العمل بنطلب كل حاجة و نبتدي نتكلم في الشغل قبل ما ينزل الأكل عادي، إنما في عشاء العمل بينزل الاكل وبعدين نتكلم براحتنا لأن وقتنا معانا.

يفضل في وجبات العمل أنه يكون مكان من غير تدخين، ممكن واحد منهم يكون عنده حساسية أو بيتضايق من التدخين، الحالة الوحيدة للغداء في مكان للمدخنين أن يكون كل الموجود بيدخنوا، غير كده مش مستحب خالص.. طبعًا مينفعش نطلب أي حاجة غير الميه لحد ما يكمل عدد الحضور.

طيب نيجي بقي للأخ اللي طلب جمبري ده، أول حاجة مينفعش نطلب أغلى حاجة في المنيو خالص، إلا إذا كان صاحب الدعوة وصى بيها، أو يكون طالبها بنفسه. جمبري بصوص كمان !؟.. بنحاول في الاجتماعات نطلب أكل نواشف عشان التركيز في الاجتماع، و الصوص هيلخمنا.

طيب الملوخية أخبارها إيه في الاجتماعات؟ دي بقى الحالة اللي ممكن نطلبها فيها أنه يكون ضيف أجنبي و عايز يجرب الأكل المصري، أو يكون صاحب الدعوة هو اللي عايز النوعية دي من الأكل.

نتجنب تمامًا يكون غداء أو عشاء العمل بنظام الأوبن بوفيه، مش هنضيع الوقت رايحين جايين.. بس لو حصل وإتدبست فيه هتقوم مرة واحدة بس والطبق يتملي باقصى حاجة ٦٠٪‏ من حجمه.. (بلاش شغل الأفراح هنا.. محبكش).

نيجي بقى لحتة مهمة وهي دفع الحساب، ساعات ناس بتتحرج لما بييجي الحساب قدامهم وميكونش فيه اتفاق مين هيدفع، طيب دي حلها بسيط، اللي ناوي يدفع يسيب كارت الائتمان عند الكاشير أو يقوم يستأذن و يدفع بعيد ويقوموا مرة واحدة و خلاص.

فطار غداء أو عشاء عمل، الحاجات البسيطة دي بتفرق لو بنحضر اجتماعات كتير لازم تكون تصرفاتنا لائقة.. ومش شرط نكون ملمين بيها ١٠٠٪‏ بس لازم نكون عارفين الاساسيات.

آه صحيح.. فيه فطار عمل و ده بيكون نص ساعة ولاساعة قبل اجتماع مهم، بيكون حاجة بسيطة قهوة و كرواسون.. أكيد مش فول وطعمية.. وبألف هنا.. يارب الصفقة تتم.

csr