القاهرة 17°
دوت مصر

شخصية العام.. و كل عام

مع نهاية كل سنة تعودنا على تقليد نتبعه، وسؤال يتم طرحه فى كل الوسائل الاعلامية أو على المستوى الشخصي وبين الاصدقاء. ألا وهو: مين شخصية السنة دي؟ مين الشخص صاحب التأثير الأعلى فى حياة الناس على مدار سنة فاتت؟

وتبدأ المسابقات والبرامج فى تحديد أفضل شخص فى كل مجال سواء فن، أو أدب، أو كورة، أو سياسة. شخصية عامة كان له الدور الأبرز في تحريك مجريات الحياة في المجتمع.

والنتيجة تختلف من برنامج لآخر، ومن صحيفة لأخرى على حسب اتجاهات الجمهور المتابعين لاستفتاء شخصية العام.

وتمر احتفالات السنة وينسى المجتمع مين كان شخصية العام وننتظر العام اللى بعده وهكذا.

لكن اسمحوا لي أقولكم إن فى شخصية لا تتبدل ولاتتغير وهى المحرك الاساسى لكل مجريات الامور فى مجتمعنا المصري.

شخصية لها التأثير الأقوى و الأكثر وضوحًا.

بكل معنى الكلمة هي شخصية كل سنة الأبرز على الساحة
وبالرغم من كده إلا إنها لم يتم اختيارها أو حتى إدراجها ضمن الاستفتاءات المطروحة.

إنها ببساطة شخصية المواطن المصري.

ايوه .. المواطن المصري هو شخصية كل سنة .. هو الشخص اللى تمر عليه السنوات و صاحب التأثير الأول و الاقوى على كل مجريات الاحداث .

الانسان اللى فى عز محنته صابر ... و فى قمة غضب كلمة طيبة تهديه ... وفى المشكلة والازمة يقلبها فكاهة ويضحك على نفسه ويحول الأزمة لنكتة .

الانسان اللى يشتكى من الغلا وبرغم كده يخرج ويتفسح ويحتفل

اللى يزعل من حكومته و مسئوليه .. لكن وقت الجد والخطر يقف بكل حزم مع جيشه و ناسه يحمى أرضه بكل وسائله المتاحة ولو بالكلمة .

الانسان اللى ممكن يكون جيبه فاضى وبرغم كده لو شافك زعلان يقولك: مالك محتاج ايه أساعدك به ؟!

اللى يتخانق على ماتش أهلي وزمالك لكن لما فريق منهم يكون بيلعب مع فريق أجنبى يبقى كلنا أهلي وكلنا زمالك .

الانسان اللى يسمع الصبح أغاني شعبيات وبليل يسهر على صوت أم كلثوم و عبد المطلب.

اللى خروجة على النيل تفرحه، وترضيه و برده مايمنعش يحلم بسفرية بره أو عزومة فاخرة معتبرة.

الإنسان اللي فيه سلبيات كتير هو معترف بها وبينتقدها.. ومش بيتغير .. وبالرغم من كده عايز فعلا يتغير .

الإنسان اللى لو صحيت الصبح بدري هتشوفه فى الشوارع بيجري عايز يلحق أكل عيشه .. وبليل فى عز الليل تلاقيه قاعد على القهوة ولا على باله الدنيا ... لا تقدر تعرف صحى امتى ولا نام امتى.!!!

الإنسان اللي جواه كل الامكانيات والمهارات، والقدرة على التغيير، وناقصه بس يثق فى نفسه وينسى شوية الفهلوة.. لإن فعلا عنده اللى يقدر ينجحه من غيرها.

الانسان اللى يضحك فى عزاء ويقولك حلاوة روح.. ويبكي فى الفرح ويقولك دموع الفرحة.

المواطن المصري تركيبة مختلفة.. احتوى كل التناقضات.. احتوى كل الصبر و الغضب.. مع كل القدرة على التحمل والاستمرار .. احتوى السلبيات بأعظمها والايجابيات بأجملها..
علشان كده لازم يستحق إنه يكون شخصية العام وكل عام.

كان لازم اكتب عنه ولو إن مقال لا يكفي سرد ملامح شخصيته.. لكن على الأقل فى بداية سنة جديدة أقوله : كل سنة وإنت طيب.. كل سنة وإنت قادر على الحياة بالنكتة والطيبة .. بالجدعنة و الشهامة.

وافتكر إنك تحمل إسم أعظم أمة.. اسمها مصر.. مركز الكون، خليك على أد المسئولية و أد اللقب.. كمل سنة جديدة في عمر الأرض ومعاك مسئولية توازن الأرض والإنسانية.

كل سنة وإنت مصري .
csr