الشباب فين؟
قررت أكتب مقالي الاسبوع ده عن تجربتي بعد دعوتي لمؤتمر الشباب الأول بمدينة شرم الشيخ، و كان من الطبيعي اني أسمي المقال "ابدع ، انطلق" و هو شعار المؤتمر ، مع بداية المؤتمر ظهر هاشتاج ضد المؤتمر بإسم الشباب فين ؟ عجبني أوي الاسم و عجبني السؤال قلت اجاوب عليه :)
وصلت شرم الشيخ ليلة انعقاد المؤتمر ، الاستقبال في المطار من شباب كل واحد منهم معاه قائمة بأسماء المسافرين و توزيعهم علي الاتوبيسات و الفنادق .
وصلت قاعة المؤتمرات في اليوم الاول و قد بدأ اليوم من الساعة السابعة و طبعاً تأمين الدخول ممتاز ، و في كل مكان شباب منظمين للاجابة علي اي استفسار .
أجواء المؤتمر كانت كالتالي :،
قاعة رئيسية و قاعات صغيرة كلها ورش عمل و المتحدثين فيها هم الشباب مع مسئولين و اعلاميين و نواب مجلس الشعب
اليوم التاني كان زحمة وورش عمل و جلسات كتير و الاجواء كلها شباب شغال خلية نحل .. ماراثون مع الرئيس في الفجر و هما هما اللي تشوفهم للساعة 11 مساء شغالين في التنظيم و المشاركة ..
كان نازل معايا في الاوتيل مجموعة من الفنانين التشكيليين تبع الاوبرا و كلهم شباب و كانوا مشاركين بمعرض علي هامش المؤتمر .
و اليوم الاخير ( الثالث) كان سيول شديدة و برق و رعد و طرق كتير مقفولة و كهرباء مقطوعة عن الاوتيل اللي كنت نازلة فيه ، و اتصرفت و نزلت متأخر لقاعة المؤتمرات و رحت وسط الجو ده و لقيت الشباب كلهم موجودين من الصبح بكل نشاط و حيوية .
حفل الختام لو هنتكلم عن الحضور هنلاقي حوالي 20? مسئولين و نواب و باقي القاعة شباب الاحزاب ، شباب الجامعات ، شباب الاعلاميين . روح جميلة و حيوية و فريق بلاك تيما بيغني لمصر و القاعة كلها طاقة ايجابية منعشة و الختام كان باغنية سيب بصمتك يلا و هي اغنية المؤتمر مع تصفيق و تهليل و غناء في القاعة و دفعة قوية و طاقة ايجابية عالية ..
اللي عجبني في المؤتمر انه اتي بأكتر من 3000 شاب و فتاة من كل الاتجاهات و الاطياف و قابلهم بالوزراء و المسئولين و نواب مجلس الشعب و الاعلاميين و كلهم تحت سقف واحد لطرح المشاكل و مواجهتها و محاولة لحلها.
انا رجعت كلي طاقة و نشاط اني اعمل تدريب اكثر للشباب في مجال المهارات البشرية و مهارات التواصل لاني لمست الأمل في الجيل اللي شفته . و نرجع نسأل تااااني
الشباب فين ؟
الشباب الموجودين في البرنامج الرئاسي لاعداد القادة
الشباب فين ؟
الشباب كان هو المسئول عن كل تنظيم لكل ورش العمل و مشارك فيها
الشباب فين ؟
الشباب كان شغال اكتر من 14 ساعة يومياً
الشباب فين ؟
الشباب كان بيشتغل و هي دي كلمة السر
الشباب فين ؟
الشباب في حب الوطن
الشباب فين ؟
الشباب في الطموح و الطاقة
الشباب فين ؟
الشباب في شرم الشيخ
الشباب فين ؟
الشباب في كل قلب بيحب بلده و عايزها تكبر
الشباب في مصر لو بتحب مصر