مجتمع السوشيال ميديا و عمايله هيجننا خلاص، ممكن يحركك ينرفزك تتفاعل معاه و تدمنه كمان، قصص حب، قصص نصب، وقصص إنسانية لناس بتموت مكنش ليها وجود أساسًا . 

عالم افتراضي، بس للأسف دايرة الافتراضي اخترقت دايرة الواقع، وده عمل خلل، خلى في التواصل الحقيقي، التواصل الواقعي، والتواصل العائلي كمان، تلاقي عيلة كاملة قاعدة في البيت تواصلهم عبارة عن صورة، و لايك، و كومنت ، على رأي محمد محي صورة و دمعة.

و بما إني أكثر تفاعلًا على تويتر من فيس بوك، و يعتبر تويتر ديمقراطي أكثر من الفيس بوك، (لعدم وجود العيلة على تويتر )، فأنا هحكيلكم شوية عن تويتر و عمايله من خلال تواجدي عليه لوقت كبير، ومن خلال مهنتي، وإني طول الوقت بحلل وامنطق، وأربط بين التويتات و المغردين . 

هحكيلكم قصة "يا حبي"، أشهر ميينستريم حصل في تويتر  الفترة اللي فاتت، واشرح لكم في الإخر مصطلح "ميينستريم ".

كان فيه مجموعة محترمة من الأصدقاء على تويتر، و كالعادة بيحصل موضوع أو حد بيقول كلمة حلوة أو مصطلح، والكل يتكلم عنه زي هاشتاج و كده، و بدأوا يخاطبوا بعض بكلمة يا حبي، و بدأ الموضوع ينتشر بصورة غريبة، هزار وضع كلمة "يا حبي" في اسم فيلم . و إيه يا حبي؟.

المهم كنوع من الهزار كلمت إحدى مؤسسي الموضوع ده، و كانوا بدأوه من يومين، و كنا بنتكلم على الموبيل، و قلت لها انا هقلب عليكم التايم لاين دلوقتي في ثواني و كتبت تويتة قلت فيها : ‏"من دلوقتي خلوا بالكم مجموعة "يا حبي" مخابرات، و أدينا حذرناكم من الأول أهو".

و حدثت الهوجة، وكان الوضع كالآتي : مجموعة صدقت فعلاً اني بتكلم جد ، و بدأت تشتم و تشكك، مجموعة فهمت الهزار و كملت معايا، مجموعة حللت إني سبايدر ومجنونة بنظرية المؤامرة، ونزلت عليا التريقة.. و الموضوع بقى تريند يوم كامل، تخيلوا !! تويتة واحدة تعمل فوق الـ 5000 تفاعل، وفوق الـ 250 ريتويت!!، ثم إن أنا طالع عليا إشاعة إني أمنجية معقولة هبلغ عن صحابي كده؟؟

 ده مقياس مخيف لحاجة تهريج على فكرة، ويعكس تأثير مواقع التواصل الإجتماعي، تخيلوا لو نزلت  إشاعة زي دي ممكن تعلي سعر الدولار، أساسًا وتخسر البورصة :) 

ملحقات مجموعة "ياحبي" كوميكس اتعملت، هاشتاج، شتايم، بلوك.. إلخ.

نتكلم بقى عن موضة تويتر وحركاته ومصطلحاته، ومنها مصطلحات في المواقع كلها أولها:

الميينستريم Main Stream: وده بيكون التيار السائد أو الموضة اللي الكل بيتكلم فيها وأخرهم مثلا: هيبتا وألبوم عمرو دياب... والأساسي والعميق والمستمر عبر الأزمان في المواقع:  فنجان القهوة، وأغاني فيروز، وده المفروض عمق وكده.  

غير بقي اللي بيكتب إنه بيسمع أغاني محدش عمره سمع عنها عشان يبقى الشخص المميز والعميق بردو. 

الصب تويت: وده مصطلح من الآخر تلقيح كلام، يعني واحد يكتب تويتة لشخص تاني موجود على تويتر من غير ما يوجه له كلام أو يعمله mention .. وده منتشر في قصص الحب التويترية أو النفسنة التويترية. 

الريتويت سبراي: وده بقي زي السبراي اللي بيترش عالتايم لاين، شخص يعمل تلاتين ريتويت لشخص تاني ورا بعض ويعمي التايم لاين بكلامه. ساعات بيكون كلام كويس، بس إنت عاجبك كلام شخص معين مش ذنب متابعينك يتعملهم سبراي عالتايم لاين . 

عندنا بقى قصص الحسابات الوهمية كتير ، منها حب أفلاطوني عبر الـ DM وهو الرسائل الخاصة، وممكن يطلع واحد يكون بيكلم ابن خالته سنة مثلا ويتفاعل ويسأل عليه لما يغيب على إنه واحدة، وفي الآخر بياخد الصدمة. 

اللعب عالمشاعر: حسابات بتتعمل وتلم فولورز كتير وبعد فترة من تكوين صداقات كتير شوية تويتات عن الحياة و ظُلمتها، وبعد يومين يختفي الشخص ويطلع له أصدقاء على تويتر يقولوا إنه مات أو إنها ماتت، والمأسويات تشتغل  والمناحة.

أنماط وأشكال كتيرة بنقابلها وندمن تعاملنا  معاها وتؤثر في حياتنا ونتفاعل معاها، بس أهم حاجة إن اختراق دايرة الافتراضي بالواقعي ممكن يجعل الافتراضي يطغي وتفقد كتير من مهاراتك في التواصل وتحبس نفسك ورا الشاشة وتصبح أسير لموقع هو في الآخر  افتراضي.

"إيه يا حبي !!؟" هو حالة ممكن نسميها حالة ارتباط أو حالة  حب بين شخص وجهاز ، علاقة مشروعة وفي باطنها عالم كبير يا تغرق فيه ويسيطر عليك  يا تعلي نفسك فوقه وتستمتع بحكاياته وحركاته وإنت على حافة دايرته.. ده اختيارك إنت وبس...