القاهرة 21°

أنت في حضرة الكتاب

من أجمل المناسبات اللى بتمر على مدار العام فى مصر.. هي مناسبة معرض القاهرة الدولي للكتاب.

ممكن يشوف البعض إنها مش ذات أهمية قوي.. والبعض الأخر لايلاحظ وجودها.. أم الأغلبية بيهتموا بها وينتظروها من العام للعام.. على أمل امكانية زيارته والحصول ولو على القدر الأدنى من أمنياتهم في الكتب.

معارض الكتب تندرج ضمن السياحة الثقافية، واللي لها بالغ التأثير الاقتصادي، والاجتماعي، والثقافي في بناء مصر.. وصناعة أتمنى إنها تنال مزيد من الاهتمام والاستثمار.

لو الدولة متمثلة في الوزارات المعنية بجانب الشركات، ودور النشر والطباعة المتخصصين اهتموا جميعا بصناعة الكتاب بداية من صناعة الورق وحتى تسويقه وتصديره للخارج، والانتشار في الاسواق العالمية؛ هنكون قدرنا نضيف إلى الدخل القومي مصدر إضافي في أمس الحاجة إليه.

نرجع لموضوع مقالنا الأساسي.. إزاي تختار كتابك وإنت في معرض الكتاب؟

المعرض قرب خلال أيام ، واللي ناوي يزوره، مع زيادة الأسعار ممكن يكون هناك تخوف من الزيارة أو محتار هل هيقدر يشتري كتب ولا.. لأ؟

وعلشان ماتفوتش الفرصة عليكم وتقدروا تستمتعوا به.. اسمحوا لي أدلكم على خطوات أو نصائح ممكن تفيدكم في زيارته لمعرض الكتاب؛ لأن فيه كتير بيبقى مش عارف يشتري إيه ولا منين و لا بكام.

1- قبل ماتروح حدد ميزانيتك اللي مخصصها لشراء الكتب.. ضروري قبل ما تروح لأن لو تركتها مفتوحة ممكن تصرف أكتر ما أنت متوقع وفى كتب ممكن ماتكنش محتاجها .

2- المعرض محتاج على الأقل 3 أيام علشان تقدر تستفيد منه .. أما لو كنت في محافظة بعيدة عن القاهرة يبقى خصص لك يوم وتبدأ الزيارة من الساعات الأولى له.

3- يكون معاك خريطة للمعرض.. وهتلاقيها متواجدة على الانترنت.. اطبعها أو احفظها على الموبيل علشان تعرف تدخل من أي بوابة وتبدأ من أى مكتبة.. ومايضيعش وقتك في البحث.

4- يكون معاك زجاجة مياه علشان هتحتاج تلف كتير في مساحة المعرض الواسعة.. ومحتاج تركيز في اختيار الكتب، وممكن كمان أكل خفيف علشان انتظار الأكل هناك بياخد من وقتك وخصوصا لو هي مرة واحدة هتزور فيها المعرض ده غير تقليل التكاليف.

5- اذا كنت من مكان بعيد وناوي تشتري كتب كتير.. يكون معاك شنطة سفر سهلة التحرك تحط فيها كل اللي اشتريته.

6- اذا كنت من الناس اللي هتنزل كذا مرة.. يبقى خصص زيارتك الأولى للإطلاع على المكتبات والتعرف على الكتب.. الجديد منها وأماكنها وأسعارها باختلاف وجودها في المكتبات.. وكمان تعرف دور النشر المميزة والجديدة.

7- تكتب قائمة بالكتب اللي قررت تشتريها فى الزيارة الأولى وحساب سعرها وهل مناسبة لميزانيتك ولا لأ.. وايه اللى ممكن تستغنى عنه وتشتريه من اى مكتبة فى اى وقت تانى و ايه اللى مش ممكن تستغنى عنه.

8- وإنت بتطلع على الكتب.. ماتخليش قرار الشراء واقف على نصيحة شخص قالك الكتاب ده حلو أو لأ .. قرار الشراء متوقف عليك إنت وعلى تفكيرك واحتياجك وكمان ممكن تاخد رأى كُتاب محترفين اذا كنت على صلة بهم.

9- عجبك اسم كتاب ومتردد تشتريه ولا لأ.. علشان تعرف الكتاب المفيد لك عليك إنك تقرأ نبذة التعريف بالكتاب اللي فى نهايته على الغلاف الخلفي.. تقرأ مقدمتها جزء منها.. وتقرأ صفحة أو اتنين من منتصفه.

10- لا تعتمد في اختيارك على شكل غلاف ولا كثرة تكرار اسم كاتب وخاصة لو مش معروف.. الاعتماد على المحتوى اللى يناسبك ومدى مصداقيته واحترامه لعقلك.

11- أكثر الأماكن اللى بتبيع كتب سعرها مناسب هي: هيئة الكتاب / مكتبة الأسرة / و سور الازبكية طبعًا.

12- اشترى الكتب الجديدة في الموضوعات العلمية لأن في العلم كل يوم في جديد.

13- ما تشتريش في الأول.. لأنك فى الاخر هتلاقى حاجات تانية عجباك وممكن ميزانيتك تكون خلصت.

14- لو هتنزل كذا مرة.. خلي مرة منهم لأولادك أو مع اطفال أو سن صغير في عائلتك؛ علشان يتعلموا حب الكتب والثقافة.

15- المعرض أرض ثقافة.. والكتب خلاصة أفكار وتجارب حياة.. حافظ على نظامه ونظافته و تحضره.

افتكر: (إنت فى حضرة الكتاب)