قال الفنان محمد جمعة الشهير بـ "عم ضياء" وصاحب المقولة الشهيرة "كله رايح"، انا ليا واقعة تاريخية فى موضوع انا الأهلى والزمالك، لأن وانا صغير كنت زملكاوى وبعد كده بقيت أهلاوى ودى قصة طويلة

وتابع: وانا صغير كنت مع ابن عمى اللى اكبر منى وصديقى وهو زملكاوى متعصب، وكان فى مباراة للأهلى والزمالك وكنا بنتفرج عليها، ومن كتر اندماجى مع المباراة ابتديت قطعت ورقة بشكل شنيع جدا لانى وقتها كنت بشجع الزمالك وكان بيتغلب وده وقتها كان رد فعلى.

وأضاف: بعد ما تنبهت ان فى جيبى مكنش فى ورقة، فببص لقيتها ان دى كانت الـ 5 قروش مصروفى، بعدها طبعا كرهت كل شئ فى الوجود لان بسبب نادى الزمالك قضيت على مصروف كان مهم جدا بالنسبالى.

وأختتم حديثه: لان الزمالك كمان بيتغلب كتير فبقيت اهلاوى لكن انا فعلا مش اهلاوى متعصب يعنى لما بيكون فى ماتش للزمالك مع فريق من بره مصر بشجع الزمالك عادى جدا.

يذكر ان الفنان محمد جمعة، ظهر بشكل كبير فى موسم رمضان 2018، من خلال 3 أعمال درامية هم ، مسلسل "ضد مجهول" للفنانة غادة عبد الرازق، مسلسل "أبو عمرى المصرى"، وأخيرا مسلسل "الوصية" الذى أشتهر من خلال بشخصية عم ضياء صاحب مقولة "كله رايح".