التوقيت الأحد، 20 سبتمبر 2020
التوقيت 07:46 ص , بتوقيت القاهرة

وليد صلاح عبد اللطيف: "ساسى" سبب تراجع الزمالك ولازم يمشى (فيديو)

نجم الزمالك السابق وليد صلاح عبد اللطيف
نجم الزمالك السابق وليد صلاح عبد اللطيف

قال وليد صلاح عبد اللطيف، نجم الزمالك السابق، إنه يرى إن رحيل الدولي التونسي فرجاني ساسي لاعب وسط الفريق عن الأبيض في فترة الانتقالات الشتوية المقبلة خلال شهر يناير، سيكون نقطة تحول لصالح الفريق، حيث يرى إن الدولي التونسي أحد الأسباب الرئيسية لتراجع نتائج أبناء ميت عقبة على مختلف المستويات في الفترة الأخيرة.

وقال وليد صلاح عبد اللطيف: "ساسي يمشي ومحمود علاء وطارق حامد لازم يتعمل جلسات معاهم ويتعدلهم عقودهم ونادي الزمالك هيبقى كويس، ساسى دلوقتي مع احترامي الشديد له وجمهور الزمالك تغنى به ولكنه وصل لدرجة إنه بيلعب على "الواقف"، والكرة مش كده".

كما وجه نجم الزمالك السابق رسالة إلى ساسي قائلاً:"فلوسك إتأخرت متأخرتش لكن تنزل الملعب يبقى كل همك المكسب ولكن فكرة توجيه الأمور النهاردة إحنا عاوزين نكسب واليوم التانى عاوزين فلوسنا.. دا مش نادى الزمالك".

وتابع وليد صلاح عبد اللطيف قائلا:"إنتاج ساسى في الملعب مش موجود ولولا تواجد طارق حامد بجواره الزمالك هيتكشف أكتر من كده، وبنصح إن يحصل جلسات مع طارق حامد ومحمود علاء وعبد الله جمعة ويتعملهم اللى هما عاوزين، وساسى لو له فلوس يطلع يطالب بيها وهو بيكلف النادي الكثير على إنتاج قليل".

واختتم عبد اللطيف رأيه فى هذا الأمر قائلاً: "فرجاني ساسي هو محور أداء نادي الزمالك وهو حاسس بكده واللى عاوز يعمله بيعمله ومصدر قوة في الفريق زي ما قولت له فلوس يطلع يطالب بيها ولو مخدتهاش امشي وإنت بتبوظ في الفريق، وعلى العكس طارق حامد لو مش فايق بيموت نفسه ولكن ساسى بالشوكة والسكينة والكعوب مينفعش الكلام دا؟ اللى بيحصل منه استفزاز للزملكاوية بالكعوب وطارق حامد قعد يزعقله فى إحدى المباريات وفي بعض الناس مش هتدي الزمالك ولازم يتقعد مع بعضهم وآخرين مينفعش يتقعد معاهم ومن الأساسيين هو ساسى والناس اللى بتبحث عن الشعر والكعوب تمشى".