التوقيت الثلاثاء، 16 أكتوبر 2018
التوقيت 07:49 ص , بتوقيت القاهرة

برج الحوت حظك اليوم الأحد 20 أغسطس 2017..متوافق مع ميكروب البرد

برج الحوت
برج الحوت

تعرف على حظك اليوم ل برج الحوت مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم


برج الحوت


حظك اليوم برج الحوت عاطفياً:


بتميل للسواد النهاردة بشكل كبير وزيادة عن المألوف..واضح ان أغسطس مروقك على الاخر..ماعلينا..حاول متفكرش زيادة عن اللزوم


حظك اليوم برج الحوت عملياً:


انزل واخرج وشوف ناس كويسة بدل ما تقعد ف الضلمة تهري وتنكت ف روحك ع الفاضي قال يعني مبتغلطش ومعاك طفاشة مفاتيح حلول مشاكل الكون..انزل معانا على الارض لو سمحت حبة وخليك واقعي وخد بالك انك بتعك زيك زي اي حد عادي جدا ودة مش عيب..العيب انك تنكره وتستخبى ورا مثالية ممنهاش فايدة


حظك اليوم برج الحوت صحياً:


مهم تقعد مع ناس افكارها لطيفة عشان تبقى انتا كمان افكارك لطيفة..المود اللطيف معدي زي اي دور برد..وخلي بالك من ميكروب البرد عشان منتشر اليومين دول والناس بقت تعطس ف وش بعض متفهمش ليه


إعرف توافق برج الحوت مع باقي الأبراج النهاردة


متوافق مع ميكروب البرد


 



 


الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.


الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.


ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..


إفتكر الكلام دا وانت بتقرا حظك النهاردة وبكرة وكل يوم ياريت .. 


وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..


الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..


 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..


تحياتنا الدائمة.


اعلان حظك برج الحوت