ريفيو| Game of Thrones الحلقة التالتة..مقابلة جون ودنيريس ف حلقة سريعة

كدة دخلنا في نص الموسم السابع من Game of Thrones بعد الحلقة التالتة.. واللي عملت نقلة كبيرة في الاحداث وإن كانت برضه فيها تلميحات كتير من الموسم الأول.

أول تلميح ظهر في مشاهد سيرسي في الحلقة.. والطريقة اللي قتلت فيها إليريا ساند وبنتها.. أول ملاحظة إنها نفس الطريقة اللي إليريا قتلت فيها مارسيلا ودة معناه إن سيرسي ممكن تتعاطف معاها عشان بتنتقم لبنتها الوحيدة..

لكن من ناحية تانية كان فيه تشابه أوي مع الحوارات في الموسم الأول واللي كانت عن قتل الملك المجنون لريكارد ستارك وابنه براندون.. ودة اللي عمل ثورة وبسببه بدأ Game of Thrones أصلا.. فدة معناه إننا قربنا نشوف نهاية سيرسي..

اللقاء المنتظر.. جون سنو ودينيرس تارجارين.. للفانز اللي كانو منتظرين حاجة عظيمة من اللقاء دة نقول النتيجة المنطقية إنه محصلش اتفاق تحالف ولكن كان مجرد هدنة.. ودة الأفضل طبعا وإلا كانت القصة هتبقى كليشيه جدا ومش مربوطة ببعضها.. هنا سيناريو Game of Thrones موضح الاتنين بيفكروا ف ايه.. دنيريس مش منبهرة بجون سنو وتقريبا مش عاجبها أي حاجة فيه.. وهو نفسه شايف إنها مجرد بنت صغيرة جميلة من عيلة كبيرة لكن من غير كفاءة.. طبعا في تمهيد إن الرأي يتغير بعد كدة..

لكن في لقاء تاني كان الفانز القدامى نفسهم فيه وهو طبعا جون سنو وتيريون اللي متقابلوش من الموسم الأول.. وكان طبعا التغيير واضح وتطور الشخصيتين باين.. حتى لو كانوا فريندلي..

طبعا المفاجأة الأكبر في الحلقة كانت أولينا تيريل وازاي ماتت.. كانت بادأس.. وبصراحة المسلسل خسرها حتى ولو كانت دي النهاية المنطقية ليها.. لأنها كانت من أذكى الشخصيات في المسلسل.. كمان طريقة موتها توضح الفرق بين سيرسي اللي انتقامها متوحش.. وبين جيمي اللي ساب أولينا تيريل تشرب سم وتموت بهدوء.. حتى بعد الشماتة والاعتراف الصريح إن هي اللي قتلت ابنه..

نقطة ضعف الحلقة دي كانت سرعة الأحداث بشكل مش منطقى..ازاي يكون جيمي في أول الحلقة في كينجزلاندينج وفي أخرها وصل الجنوب لحد الريتش وحارب معركة وكسب.. وازاي يوصل جيش دنيريس للطرف التاني من ويستروس في حلقة واحدة.. احنا اتعودنا على بعد المسافات في القارة دي عشان كدة التغيير والنط بسرعة مش معتاد.