التوقيت الثلاثاء، 29 نوفمبر 2022
التوقيت 12:18 م , بتوقيت القاهرة

مغامرات في عيادة دكتور "دايت"

أنا بقالي 6 سنين نفسي أخس..


"وزنك المثالي 60 كيلو".. سمعت الكلمة دي كتيييير، وخصوصًا في السنوات الأخيرة من دكاترة مختلفين، وكانت أكبر كدبة في الحياة "دكتور الدايت".


سؤال بيطرح نفسه، هو أنا لما أوصل للوزن المثالي هاكل تاني براحتي؟


دايمًا بيتقال "بعد لما توصلي للوزن المثالي في فترة تثبيت ما تقلش عن 3 أو 4 شهور هنقسم فيهم الأسبوع 3 أيام FREE و4 أيام أمشي عالدايت"!! وده برضو كلام، ما أنا بعد ما أثبت كلو هيبقى FREE وبرجع "أضرب" تاني ولا كأن حصل حاجة.


ومن وجهة نظري دكتور الدايت هو شخص وسيط بينك وبين جهاز الميزان.. بتروح كل أسبوع لعيادة دكتور وبتدفع دم قلبك في الكشف، اللي بيبدأ من 20 جنيه وبيوصل 150 جنيه، وممكن أكثر، بس أنا شخصيُا ماكنش عندي استعداد أدفع أكثر من 150 جنيه في الأسبوع.. و"الفيزيتا" بتتحدد حسب مكان وديكور العيادة والزبون طيب وبيدفع.. والدكتور مبيعملش حاجة غير أنه بيوزنك وبيديك ورقة الرجيم..وفي العيادة أٌم 150 جنيه تقوم الممرضة توزنك توفيرًا للوقت ولمجهود الدكتور.


أول مرة قمت بزيارة لدكتور كان من أبو 20 جنيه في مستشفى جامع في شارع أحمد عرابي، كانت واحدة من عاملات النظافة في عمارتي نصحتني بيه، بعد خسارة وزنها حوالي 30 كيلو معاه، أخدت ورقة الدكتور والتزمت بيها ووصلت للوزن المثالي وثبت الوزن، ومن كتر فرحتي بالرٌفع أصابني نوع من الغرور، فرجعت آكل أكثر من قبل كدا، وضربت تاني، ونصحوني الناس بدكتور مشهور بيجي كل أسبوع في التلفزيون.


فعلًا روحت ودفعت 150 جنيه.. ولا أي اندهاش مفرقش كتير عن اللي قبله، كان أكبر فرق شوفته بين الاثنين، أن الأول كانت ورقة الدايت بخط يده والثاني مطبوعة على الكمبيوتر!! ومتعلمتش من التجربتين.. وكررت تجارب تانية كتيرة وكانت برضو فاشلة مُحبطة.


كانت آخر مرة روحت لدكتور مع صاحبتي، وفي تاني أسبوع كتبلي 5 ملاعق أرز على الغذاء ومكرر ثلاث مرات في الأسبوع!! أنا لو حيوان هتعامل أحسن من كده.. أنا دايمًا بروح للدكتور وأنا مش متغدية عشان مبقاش زايدة عالميزان..فأول حاجة جت في بالي بعد صدمة 5 ملاعق الأرز إني جعانة وعايزة أروح أتغدى في "بيكين"، مطعمي المفضل، وبلا دايت بلا قرف.


روحت البيت وأنا حاسة إني مفجوعة.. وبعد ما فكرت في حلم الوزن المثالي، حبي للأكل والمحاولات الفاشلة الكثيرة عشان أوصل للوزن المثالي مع دكاترة كثيرة.


وبعد ما قعدت في مستشفى الجامع مع زبائنها البسطاء، وفي عيادة دكتور التليفزيون مع اللي بيستخدموا برفانات الكيلفن كلاين وكريستين ديور وبياكلو سوشي..اكتشفت أني مش هوصل لوزني المثالي وللمنظر اللائق بورقة دكتور فيها 3 بقسمات سن في الإفطار وببيضة مسلوقة في الغذاء.. بس ممكن أوصل له بأسلوب غذائي صحي مركز على الفاكهة والخضراوات مع رياضة وإرادة قوية.


ممكن محرمش نفسي من كل الأكل الحلو عشان أخس بس برضو مش لازم أبقى طفسة، ومش لازم أوصل للوزن المثالي في شهر عشان أبقى جامدة، ممكن أوصل له في سنة بس أوصله صح، وبعد كده الأكل الصحي هيبقى أسلوب حياة.. وإن مشوار الـ 60 كيلو يبدأ بفاكهة.