التوقيت الخميس، 28 مارس 2024
التوقيت 12:17 م , بتوقيت القاهرة

حوار| غالية بن علي: أنا حرة وأموت في الحرية

مغنية تونسية تلقب بـ"سفيرة الغناء العربي"، تعيش في بلجيكا، ولها العديد من الأغاني الخاصة بها، وأخرى من زمن الفن الجميل، بعضها لكوكب الشرق أم كلثوم وآخرين، والتي تغنيها بأسلوبها المميز وصوتها القوي العذب..

من أشهر أغانيها "بنت الريح"، التي وصفت بها نفسها في برنامج "عز الشباب" على قناة روتانا في حوار سابق لها، إضافة إلى "دام دائما، لو كان لي قلبان، يا مسافر وحدك، لاموني اللي غاروا مني"، والعديد من الأغاني الرائعة الأخرى، ولها العديد من الجولات الفنية العربية والأوروبية.. إنها غالية بن علي، وكان لنا هذا الحوار معها.

- إمتى بدأتي تغني؟

كنت بغني من وأنا طفلة في البيت والمدرسة، بس مع الأصدقاء المقربين، وسنة 1987 سافرت بروكسل عشان أدرس، وهناك كانت أول مرة أغني قدام جمهور غربي، ممكن يكون مش فاهم كلمات الأغاني بس حسوها، وده إداني ثقة في نفسي، وسجلت أول ألبوم ليا في 2001، وكان أول حفل رسمي ليا سنة 1996.

لاموني اللي غاروا مني

- درستي المزيكا؟

لأ أو تقدري تقولي قليل جدا لما كنت في المدرسة الثانوية، عن طريق مدرس الموسيقى في القرية، لكن لسوء الحظ نسيت كل اللي اتعلمته وقتها.

- كان إحساسك إيه في أول مرة غنيتي قدام الجمهور؟

وقتها مكنتش واثقة قوي في الغُنا، أد ما كنت واثقة في إني أقدم رقص، يمكن لأني مكنتش دارسة مزيكا، وكنت مقررة أتواصل مع الجمهور يومها، وأكلمهم عن جمال ثقافتنا، وأحاول أمحي سوء الفهم، وأنشر طاقة جميلة على المسرح.

يا مسافر وحدك

- ليه بتغني دايما أغاني صوفية وفلكلور؟

أنا بغني اللي بحبه واللي عارفة إنه أفضل، لأني مش لاقية مزيكا وكلام الأيام دي أغنيه، واللي بحبه الأغاني اللي بتقدمها كاميليا جبران وأم كلثوم، وبحس إن أغلب اللي بغنيه له طابع صوفي وروحاني، لكن أنا مش بختار لون معين أو استايل بعينه.

- إحساسك كان إيه لما غنيتي أول مرة في مصر؟

كنت وقتها ضيفة، وكان عدد قليل اللي يعرفني، وكنت حابة جدا أغني قدام مواطنين من بلد الفنون، لأن طول عمري كنت بدرس مصر وفنها، وفجأة لقيت نفسي بغني فيها ولجمهورها فدي كانت حاجة جميلة.

الأطلال

لكن في المرة الثانية كنا خدنا على بعض أنا والجمهور، وبنتواصل مع بعض، ساعتها حسيت إني في بلدي، وكانوا بيرددوا معايا في الحفلة أغاني سمعوها على "يوتيوب"، وده حسسني إنهم فعلا متابعيني.