التوقيت الإثنين، 15 أغسطس 2022
التوقيت 08:58 ص , بتوقيت القاهرة

صِحّة أعماق البحار

<p>بحِب الأكل الصحي وما ليش في الصَلصَة والمسَبِّك والأكل العايم على جَبَل من الشحوم والدهون.. لكن بردو ما ليش في الأفورة في الأصناف المفيدة للصحة اللي مخاصمَة بحاسِّة التذوق.</p><p> يعني مثلاً مَنع الحلويات في البيت علشان كلها دقيق وسكر واستبدالها بالجزَر دي مابعتِبرهاش عيشة.. مَنع المقليات عشان الزيت بيتحول لسموم واستبدالها بتورلي وخُبّيزة ده باعتبره اعتداء على مفهوم الأكل بشكل عام.</p><p> مَنع الملح والتوابل واستبدالها بمزيد من الطماطم والبصل (عشان قال يعني ملحهُم طبيعي) ده باعتبره إعلان حَرب.. يا عم الصِحِّى إذا أردت أن تُطاع فأمُر بالمُستطااااع. </p><p>كنت معزومة على العَشا عند صديقتى المُغرَمَة بالتفَنُن في الأكلات الصحية.. واستبدال أي عُنصر ضار في الأكل بعنصر طبيعي بغَض النظر عن طَعمُه.. صديقتي تعَبِت نفسها أوي وعملت سفرة طويلة عريضة كلها أكلات مختلفة.. ومع ذلك ما قدِرتِش أتعرَّف على ولا نوع عليها عشان اختار آكل إيه.. لغاية ما شُفت طبق الشوربة اللي شكلها مألوف:</p><p>- الله ملوخية؟</p><p>- لأ دي سبانخ.</p><p>- إمممم بس دي شوربة!!</p><p>- أيوة شوربة سبانخ... ما فيش ملوخية طبيعي في السوق دلوقتي.</p><p>- فيه في السوبر ماركت على فكرة.</p><p>- لأ طبعاً أنا استحالة أدخَّل البيت خضار مجمد.. ده كله مواد حافظة.</p><p>- جديدة "شوربة سبانِخ" دي على فكرة... أنا حاخد مسقَّعة؟</p><p>- دي مش مسقعة يا ميرا.. أنا استحالة أقلي حاجة في البيت.. ده "بدنجان"  بيريه.</p><p>- بتسلقي "البدنجان"؟!!!</p><p>- أيوه طبعاً بيتسلق ويتهرس بالشوكة مع شوية لبن وطماطم وفلفل أخضر .</p><p>- طب أنا عموماً ما ليش في البدنجان أصلاً.. أنا حا جرَّب البفتيك.</p><p>- بفتيك إيه؟ أنا استحالة أدخل البيت لحمة حمرة.. إنتي عارفة دي بتتغذَّى على إيه؟</p><p>- مخدرات؟!!</p><p>- هههههه.. علَف صناعي.. تخيَّلى؟!!</p><p>- ..!!!... غريبة أوي ده شكله بفتيك خالص.</p><p>- مش بفتيك يا عبيطة.. ده "نوري".</p><p>- مين؟</p><p>- "نورى" يا بنتي.. ماتعرفيش "نوري"؟.. ده من أشهر أعشاب البحر</p><p>- أعشاب البحر؟؟؟ قولي والله!!</p><p>- والله</p><p>- أعشاب بحر أعشاب بحر؟ طحالِب يعني؟!!!</p><p>- أيوه إنتي ماتعرفيش إن الـ"نوري" ده فيه ضِعف فيتامين "أ" اللي فى الجزر وضعفين البروتين اللي في اللحوم؟</p><p>- إن شالله يكون فيه ضعف ماء الحياة.. أنا حاكُل إسباجيتى.. إنتي جايبة منين الإسباجيتي الأزرق ده؟</p><p>-  لأ ده الاسباجيتي العادي بس أنا بطبخُه مع الـ"هيجيكي"</p><p>- مش عارفة أقول لك إيه والله... هو إنتي بتاخدي دروس طبخ ياباني؟! </p><p>- ده مش ياباني يا ميرا ده من "أيسلندا".</p><p>- كمان "أيسلندا" لا حول الله يا رب!!</p><p>- إنتي عارفة إن الـ"هيجيكى" ده فيه كالسيوم 14 ضِعف الموجود فى اللبن كامل الدسم؟</p><p>- هو إحنا قاعدين في معمل تحاليل؟ إيه الأفورة اللي مالهاش أي ستوميت لازمة دي؟</p><p>- مش أحسن من الأكل اللي يِملا جسمك سموم؟</p><p>- وهو مفيش أكل صحي بعيد عن جوّ أعماق البحار والبونجور والكيكى كيكى دول؟</p><p>- فيه فراخ بال"وأكامى"...</p><p>- هي سفينة الفضاء اتأخرِّت ليه؟ مش عارفَة إن عندنا عَشا ديليفرى لكوّكَب "زُحَل"؟!! </p><p>ونزلت من المَعمَل قصدي من البيت من غير ما اتعشى.. وافتكرت بنت جارتي اللي قبل ما تطلع البيت بتفتح شنطة المدرسة وترمي كيس الساندويتشات "الصحِّية"على السلِّم.</p><p>وبصيت على الكشك اللي قدام العمارة.. لقيت ولاد صاحبتي واقفين قدامه.. بيعملوا إيه؟...بيشتروا كَّم مهول من السناكس المنقوعة فى الزيت والملح ومُكسِبات الطَعم الصناعية والمواد الحافظة.. مش قلت لك يا عَم الصِحى إذا أردت أن تُطاع فأمُر بالمُستطاااع؟!<br /> </p>