التوقيت الجمعة، 29 مارس 2024
التوقيت 01:42 م , بتوقيت القاهرة

حكاية الثور المصرى ومرض السكر..قالوله انت مريض ومش هينفع تلعب رياضة عنيفة ..وبإصراره حصل على الحزام الأسود فى أشرس نظام قتالى..محمود:انا أول مصرى يحصل على لقب Thor..والسكر كان منافس ليا وانتصرت عليه وحققت حلمى

فى لحظة  واحدة قد  تضيع أحلامنا وطموحاتنا التى عشنا سنوات نسعى ونرتب لتحقيقها ولكن الشجاع والبطل فينا هو الذى يقاوم ويحاول ويصمم على تحقيق حلمه مهما كانت الظروف التى تقف أمامه، وهو ما حدث مع البطل المصرى محمود حسن الذى حقق بطولات رياضية مختلفة محلية وعالمية وأثبت للجميع أن مرض السكر ليس له علاقه بتحقيق بطولاتك الرياضية.
"مرض السكر النسبة لى كان منافس لأما هكسبه وهعيش وأحقق أحلامى لأما هيكسبنى وهموت"، هو ما قاله محمود فى بداية كلامه لـ دوت مصر حيث قال "الحمد لله قدرت اتفوق على مرض السكر بالرياضة وحققت بطولات  فى الرياضة مختلفة، اخرهم بطولة ألعاب قوى مسافة 82 كيلو فى منظمة أمريكية وانا اول مصرى يحقق فيها لقب Thor "
 
 
 
وعن بداية حكاية محمود قال " وانا صغير كنت بحب الرياضة و هى كل حياتى وكان حلم من أحلامى إنى أحقق بطولات عالمية واسافر برا، لكن مرة واحدة كل حاجة اتغيرت لما اكتشفت إصابتى بمرض السكر، كانت حالة غريبة لأن  مفيش أى تاريخ عائلى على وجود مرضى السكر ، بدأت أخس بشكل ملحوظ وضعف فى الرؤية وعدم إتزان ولما كشفت عرفت إنى مصاب بالسكر وكان عمرى 16 سنة".
 
Screen Shot 2021-01-30 at 2.26.26 PM
 
 
وتابع "أول ما عرفت إنى مصاب بمرض السكر أتدمرت نفسيا أكتر من بدنيا بدأت أروح لدكاترة عشان اتابع  وأعيش حياتى بطريقة صحية واقدر أتمرن تانى، لكن الدكاترة قالولى بلاش تلعب رياضة عنيفة وتبذل مجهود بدنى العب رياضة خفيفة وبلاش تضغط على نفسك، بس انا ملقتش شخصيتى فى ده ولا هقدر أعيش كدا، وساعتها قررت وبلغت أهلى إن البنى أدم بيعيش مرة واحدة ، لأما نعيشها صح ونجتهد وننجح لأما هنفضل طول عمرنا جمب الحيط ومش هنحقق أى نجاح".
 
 
Screen Shot 2021-01-30 at 2.28.10 PM
 
 
واستطرد حديثه قائلا "ومن هنا بدأت أقرأ اكتر عن مرض السكر وايه النظام الغذائى اللى المفروض أمشى عليه واتابعه مع ممارسة الرياضة ، والحمد لله بدأت العب أول بطولة فى الأكاديمية البحرية للياقة البدنية واخدت فيها مركز أول وبعدين جاتلى فرصة تبع منظمة عالمية اسمها Musclemania  الامريكيه وهى واحده من أكبر اتحادات كمال الأجسام و اللياقه البدنيه في العالم.
وتابع" حبيت أجرب الألعاب  القتالية بس كان كل اللى بيتقالى مينفعش لأنك مريض سكر وغلط عليك الجروح والمجهود البدنى اللى هتتعرضله ، لكنى صممت وعملت اختبارات والمدرب بتاعى اكتشف انى بستجيب وبتعلم بسرعة والحمد لله فيه منظمة عالمية كلمتنى عشان أشارك فى بطولة العالم للفنون القتالية  والحمد لله حصلت علي الشهادة العالميه و الحزام الاسود لأشرس نظام قتالي في العالم"
 
Screen Shot 2021-01-30 at 2.28.25 PM
 
 
 
وعن سبب حبه للرياضة وخصوصا بعد إصابته بمرض السكر قال " سبب انى لعبت رياضات مختلفة هى إن اثبت لنفسى وللناس إن مرض السكر ميوقفش حد عند حته معينة وبس كدا ، لا انت فى أى رياضة تقدر تلعب وتحط جسمك تحت أى ضغط عالى، مش زى الناس اللى بيقولوا مينفعش تضغط نفسك بدنيا لان ده خطر عليك انا دخلت فى كل ده ، مع العلم انى عمرى ما أعلنت إنى مصاب بالسكر ودى أول مرة بقولها بعد ما حققت بطولات عالية ومتفوق عليه "
وأنهى حديثه "انا رضيت بالموضوع واللى ربنا كاتبهولى وإن دى بدل ما تبقى منحة تبقى محنة ليا وإن شاء الله أحقق بطولات تانية وأرفع أسم مصر فى كل دول العالم".
 
Screen Shot 2021-01-30 at 2.28.37 PM