التوقيت الجمعة، 29 مارس 2024
التوقيت 12:22 م , بتوقيت القاهرة

فيديو .. ربة منزل تروى تفاصيل ساعة من الرعب بواقعة إطلاق عاطل "كلب" عليها وأسرتها بالزاوية الحمراء

أمل سيد إمام
أمل سيد إمام

قالت أمل سيد إمام، من سكان الزاوية الحمراء، والتي تعرضت لواقعة قيام عاطل بإطلاق كلب عليها وعلى أسرتها، إن سبب الواقعة وجود خلافات سابقة مع مرتكب الواقعة ويدعى أحمد عبد الحليم وانه رغم اننا أصحاب حق انتهت الخلافات بالتصالح.

وأضافت المجنى عليها في تصريحات لـ"اليوم السابع" وعلامات الألم مرسومة على وجهها: الواقعة حدثت يوم الخميس اللى فات بسبب خلافات بينا وبين الجيران مع جارنا أحمد عبد الحليم الخلافات انتهت بصلح واخلصنا من الموضوع ده، بعدها الولد مسكتش ومسبناش في حالنا وفضل يشترى في كلاب ويسلطها علينا إحنا وطالعين ويرهبنا بيها والشارع كله عارف بده وكان يسمعنا أنا وبنتى ألفاظ مش كويسة وبقيت اخبى على جوزى وعلى ولادى، وكنت بشتكى للجيران.

واستكملت: جايين من بره يوم الخميس انا وولادى وجوزى وكنا بنتفرج على الماتش عند نسايب أبنى، وبعد ما دخلنا الشارع يدوب سبقت بنتى وسمعتها بتصرخ جامد، وانا طالعة شقتى براحة واحده واحد لأنى عندى تعب في الفقرات وحطيت في دماغى ان الواد اذاهم وجريت لقيت جاكت بنتى مرمى في قلب المسكن وعماله تصرخ والكلب بالكمامة عمال يخبط فيها فجأة أبنى دخل البيت فالكلب جرى على الشارع من مدخل البيت، وابنى قله انت عايز تنتقم منى تنتقم من الحريم ليه، الولد شال الكمامة من على الكلب وسابه انطلق عليهم، الكلب مسك في جوزى والكلب عضه، والكلب ساب جوزى وقفش في رجلى وقعت ربع ساعة، وواحد من شباب الشارع ربنا يباركله حط ايده وطلع رجلى من بق الكلب

ودخلت المجنى عليها في حالة بكاء وتابعت : طلبت من ابنى ميكلمش الواد علشان ميضيعش حقى وسمع كلامى، رحت مستشفى سيد جلال و ومستشفى الدمرداش قالوا روحى مستشفى العباسية وأعطونى المصل وعملولى تقرير طبى للجرح وبعد المصل رحت القسم قام ضابط المباحث اأمد بيه بدر راح بنفسه جاب الواد والكلب، ورحت عملت تقرير طبى، وسلمته للقسم.

واستطردت : في الواقعة القديمة كان الولد نازل لينا في الشارع وقالع هدومه، والجيران قالوا محدش ينزل الولد جايب سنج وبلطجية، والجيران شاهده، ووالدة الولد رمت أبنها بره باب بيتهم وقالت سبيوه هو ونصيبه، والولد وجه لى ألفاظ جارحة، ابنى مستحملش ولا وجوزي لقيتهم نزلوا تحت ونزلوا بعفويه الولد في وسط الجيران جه جرى على ابنى وكان ماسك مطواة، لسه هيضرب أبنى راح ابنى اتحرك والمطواه خربشته راح أبنى لقى ماسورة وضربه الواد، والواد كان شارب ومدهول والولد وقع على الأرض.

تداول رواد مواقع التواصل الاجتماعى فيديو يظهر قيام مراهق باصطحاب كلب للتشاجر مع أسرة، وأثناء المشاجرة لم يتمكن المتهم من السيطرة على الكلب وهاجم الكلب سيدة من الأسرة، وقام بإحداث إصابات بأنحاء متفرقة بحسدها.

وأكدت ابنة المجنى عليها من خلال حسابها على الفيس بوك، أن الواقعة في منطقة الزاوية الحمراء، وظهر في الفيديو الذى وصلت مدته لدقيقة و28 ثانية بعض الأشخاص يقوم بمحاولة إبعاد الكلب، عن الأسرة، ولكن المتهم لم يتمكن من السيطرة عليه وقام بعقر المجنى عليها وأحدث إصابات بالغة في أماكن متفرقة من جسدها.