دنيا فيها الفاعل مبني علي المفعول
الفرح فيها ماضي بابه صبح مقفول

مركب في بحر غريق والبحر موجه عالي
مبيفرقش ما بين عزيز ولا غالي

خلق وأخرها تراب عايشين في دنيا سراب
واللي كانوا حبايب دلوقتي بقوا أغراب

عجبي عليك يا عجب علي أيه بتستعجب
دنيا وفيها العجب هوا اللي مستعجب

بحر آسيه وناس مش هي ووشوش عماله بتتلخبط
فين الطيبة فين الحنية أصل الدنيا خلاص بتشطب

عايم في بحر الغدر شط الندالة مليان
بقلوب مليها الشر والبر ماله أمان

يجي الخسيس منه أما الأصيل غرقان
والقوي في قوته بس علي الغلبان

شيطان ضحك ع الكل والذل كان عنوان
نشر الفجور والظلم ما بين بني الإنسان

ولما قبضوا التمن الكل باع وخان
واللي عامل حبيبي علي حقيقته بان

شط الندم مليان على بر مفيش أمان

أمواج حزن وأسى والكل فيه غرقان