إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

معظم الناس بتفهم الصبر قصاد العِند..عِند اكبر.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الثلاثاء 27/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

في ندالة بتحصل حواليك خد بالك.. متشاركش فيها.. اوعى

برج الحمل عملياً

( الشغل والمذاكرة والتخطيط لبكرة ):

إحترس من الكلب النهاردة ف احلامك عشان دة رمز اكس من اكساتك ف الاغالب بيفكر يرجع يرازيك وينتقم.. خليك مسلح طول الوقت بزلطة صغننة شكلها حلو ف جيبك..

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة انتا زي القمر بالصلاة ع النبي.. واضح انك مبسوط وبتتغذى كويس.. بلاش كسل بس

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والمائية والهوائية..

إعرف حظك اليوم برج الثور بالتفصيل الثلاثاء 27/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

من كتر ما تدفن ف عواطفك لما بتحتاجها بتدور عليها ومبتلاقيهاش.. ماهو من عمايلك السودة ف قلبك هيكون من ايه يعني تفتكر.. بتشتكي ليه دلوقتي بقى من الموضوع دة..

برج الثور عملياً

( الشغل والمذاكرة والتخطيط لبكرة ): 

مشغول ليه بزيادة بتأكيد وجودك طول الوقت.. انتا خايف من ايه بالظبط؟..

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا متألق.. وجايز دة اللي مخليك ولا على حامي ولا على بارد من فترة اساسا.. شايف نفسك علينا عشان عندك شوية طاقة زيادة غالبا..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والبرمائية والهوائية والترابية والنارية..

إعرف حظك اليوم برج الجوزاء بالتفصيل الثلاثاء 27/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتفكر ف النكد ليه بس النهاردة.. ايه فايدته بالظبط ف حياتك.. بيحسسك انك انسان مثلا ولا انتا بتحب اجواء الشحتفة دي وبتستمتع بيها.. روق كدة مفيش حاجة مستاهلة اساسا.. روق وفرج الحياة ضحكتك احسن..

برج الجوزاء عملياً 

( الشغل والمذاكرة والتخطيط لبكرة ):

عادي على فكرة لما يبقى جواك ميل للحزن او للسكوت.. كل الناس بيحصلها كدة.. حاول تستفيد من المود دة ف عمل فني ولا حاجة.. جايز يطلع منك حاجة حلوة انتا مكنتش تعرف بوجودها اساسا.. جرب كدة..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة انتا زي الفل وزي الغزال.. حاول تركز ف انك تبقى افضل وافضل بحبة رياضة برضة ميضرش..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والترابية والنارية..

إعرف حظك اليوم برج السرطان بالتفصيل الثلاثاء 27/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عامل اللي بيحبك حلو عشان متقعدش لوحدك زي قرد قطع.. اتصرف صح من فضلك..

برج السرطان عملياً 

( الشغل والمذاكرة والتخطيط لبكرة ):

مش كل حاجة هتعوزها هتحصل ف التوقيت اللي انتا عاوزه.. في حاجات بتاخد حبة وقت.. اصبر والصبر اخرته كويسة وخير ان شاء الله..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة منك شوية اهتمام بسيط بمزاجك ومودك.. خصوصا بالليل..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والنارية والهوائية والمائية

إعرف حظك اليوم برج الأسد بالتفصيل الثلاثاء 27/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خليك حنين حبة انتا مش اوبريتور ف كول سنتر عشان تتعامل بالرسمية والرصانة دي كلها مع الناس اللي بتحبك.. بلاش كدة.. بلاش

برج الأسد عملياً 

( الشغل والمذاكرة والتخطيط لبكرة ):

هتعمل حاجة ناجحة جدا النهاردة ف الاغلب لو ركزت وصفيت نيتك وفكيتك من الناس وكلامهم وعملت اللي انتا مقتنع بيه وبس..

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل.. شوية اهتمام بس بسنانك عشان منرجعش نصوت ونشتكي..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والكرِيبّية والنارية والهوائية..

إعرف حظك اليوم برج العذراء بالتفصيل الثلاثاء 27/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

في حد هيقولك حاجة مهمة غالبا.. جايز معجب وجايز عنده ملحوظة عليك.. ف كل الاحوال اسمع ومتعلقش.. ابتسم وخلاص..

برج العذراء عملياً 

( الشغل والمذاكرة والتخطيط لبكرة ):

مستني كل حاجة تجي لحد عندك ولا ايه.. ماتقوم تشوف اللي وراك مستني ايه..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة مراعية حبة.. اهتم شوية وبلاش اهمال من فضلك وخصوصا بوجع ضهرك ورقبتك وودانك..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والهوائية والترابية والبرمائية..

إعرف حظك اليوم برج الميزان بالتفصيل الثلاثاء 27/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فكك بقى م الشحتفة حبة ياجدع انتا.. مانتا اللي بتعمل ف نفسك كل دة اساسا كل مرة وترجع تعيط وتشتكي.. مش اختياراتك دي ولا في حد بيغصبك عليها..

برج الميزان عملياً 

( الشغل والمذاكرة والتخطيط لبكرة ):

شوية منطق ف حياتك عشان ربنا يكرمك كدة وتنجح وتحقق كل اللي انتا عاوزه ومحدش من اللي حواليك يتخنق منك اكتر من كدة.. وخليك نشيط زي السمك الليلة.. متكسلش ومتقعدش ف ركن تعد ف مصايبك.. بلاش

برج الميزان صحياً 

( نفسيا وجسمانيا وكل مايخص طاسة المزاج ):

صحتك كويسة بس انتا نفسيا محتاجة شوية دلع بجدية وتخلى عن دور الضحية ف حياتك بشكل اكبر حبة..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والبربئية والنارية والترابية والمائية والهوائية..

إعرف حظك اليوم برج العقرب بالتفصيل الثلاثاء 27/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتعمل دعاية لنفسك ليه.. هو انتا منتج تجاري مثلا ولا عامل مزاد ولا حاجة واحنا مش عارفين؟.. ماتهمد كدة حبة..

برج العقرب عملياً 

( الشغل والمذاكرة والتخطيط لبكرة ):

اقدر على نفسك النهاردة ومتقولش لحد هو المفروض يعمل ايه وميعملش ايه.. سيب الناس ف حالها حبة عشان لما يترازوا ميرجعوش يشاوروا عليك ويقولوا هو السبب.. ثم متشبطش ف حاجة انتا عاوزها كدة.. عيب والله..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها وكويسة.. تقدر تعمل اي نشاط انتا بتفكر فيه من فترة براحتك

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والبرمائية والترابية والهوائية والنارية..

إعرف حظك اليوم برج القوس بالتفصيل الثلاثاء 27/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قلبك ف امان طول مانتا ظابط ايقاعك العاطفي داخل حدود الزمكان.. دي حاجة مش محتاجة اي كلام بصراحة وأكد انتا عارفها كويس..

برج القوس عملياً 

( الشغل والمذاكرة والتخطيط لبكرة ):

معلش هنعمل ايه.. قدرك كدة تقف تتفرج على الناس اللي بتستجدع معاها وتساعدها بتقلب عليك بعدين.. اما نشوف الفتاكة اللي بيدعوها دي هتوديهم لحد فين بالظبط.. كبر انتا دماغك بس من ناحيتهم وركز ف مستقبلك وبس..

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية راحة ف نص اليوم.. ومهم تاكل كويس برضة جدا..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والنارية..

إعرف حظك اليوم برج الجدي بالتفصيل الثلاثاء 27/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متوقعش الناس ف بعض.. بلاش كدة عشان عيب.. الكوكب مش ناقص هزار من النوع دة خالص.. هترجع تزعل كدة بعدين..

برج الجدي عملياً 

( الشغل والمذاكرة والتخطيط لبكرة ):

خليك ف النور النهاردة حبة وركز كدة عشان تفلح وتنجح وتعمل اي تقدم ولو بسيط ف حياتك.. انتا ذكي وهتعرف تتصرف النهاردة كويس.. بطل فتحة صدر مبالغ فيها بس نفسيا عشان محدش يتربّك ف مشاكل زيادة لمجرد الفضول والكيد.. بلاش

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة تمام وماشي حالها.. خد بالك من مناخيرك بس حبة وخصوصا جيوبك الانفية

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والترابية والمائية والنارية..

إعرف حظك اليوم برج الدلو بالتفصيل الثلاثاء 27/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ايقاعك البهلواني العجيب هيفيدك النهردة خصوصا وانك محاط بسخافات كتير محتاجة اللي بيعرف ينط على الحواجز والصعاب ويديها احلى امل كداب

برج الدلو عملياً 

( الشغل والمذاكرة والتخطيط لبكرة ):

الكل عارفين قيمتك بس بينكروا مش اكتر احسن تاخد مكانهم فوق كريزة التورتة ولا حاجة تقريبا.. خليهالهم يتهنوا بيها وتتاكل بيهم.. او تترمي.. متشغلش بالك..

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم فيها كلام حبة.. واضح انك بتخف من حاجات وبترجع تعيا بحاجات تانية.. كدة لازم تكشف ولازم تبعد عن اي توتر واي شخصيات مسببة للتوتر..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والجنية والمائية..

إعرف حظك اليوم برج الحوت بالتفصيل الثلاثاء 27/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إسمع كويس النهاردة قبل ما تتكلم وادي فرصة للناس تقولك حاجة حلوة عنك

برج الحوت عملياً 

( الشغل والمذاكرة والتخطيط لبكرة ):

طموحك النهاردة محتاج ياخد راحة وبريك حبة عشان انتا تعبت وعشان الكوكب النهاردة مش ف المود انه يدي اي حد حقه

برج الحوت صحياً 

( نفسيا وجسمانيا وكل مايخص طاسة المزاج ):

صحيا كل حاجة ماشية تمام.. في بس شخللة ف العفشة ناحية اليمين ف الاغلب.. هتحتاج مساج وتربيط وكل حاجة هتبقى زي الفل

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والنارية والهوائية