إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

حيطة مكتوب عليها.. "طلبت الإهتمام.. سابني ونام".

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل السبت 24/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

بنات افكارك خاطفاك النهاردة ف الاغلب وبتعذبك.. متديهاش فرصة وفرفشهم احسن واضحك عليهم بأغاني حسن الاسمر.. بإختصار.. متسيبش خيالك يشتغلك.. بلاش

برج الحمل عملياً

( الشغل والمذاكرة والتخطيط لبكرة ):

محتاج تهتم حبة باللي بيحبوك زي مابتهتم بنفسك.. ومش معنى انك مقرر تهمل ف نفسك بقال كفترة انك تهمل فيهم هما كمان.. مش عشان حفاظا على المشاعر والحب والكلام اللي مالوش عازة عندك دة وبس انما كمان عشان مصلحتك العملية تقتضي انك متخسرش ناس بتحبك ببلاش وتقعد لوحدك.. إهتم حبة جايز وانتا بتهتم بيهم ترجع من تاني تفتكر ازاي كنت بتهتم بنفسك..

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة انتا صحتك بتتحسن بس بالبطئ وفي ميل للنوم والكسل كتير جدا رغم انك وراك بلاوي لازم تتعمل وتخلص.. حاول متهربش وف نفس الوقت متجيش على نفسك.. مهم توازن حبة معلش

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والترابية والنارية والهوائية..

إعرف حظك اليوم برج الثور بالتفصيل السبت 24/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

المود بيرقص النهاردة ماشاء الله والمزاج عالي وأعلى من أعلى موجة بحر ف اي تسونامي حصل ف التاريخ.. محتاج بس شوية تشجيع اول ما تبتدي اليوم وكله هيبقى فل ان شاء الله..

برج الثور عملياً

( الشغل والمذاكرة والتخطيط لبكرة ): 

متاخدش قرارات الا وانتا مسترخي وواخد وقتك ف التفكير وريلاكس كدة ومتستعجلش.. الدنيا مش هتطير..

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة حاول تهتم حبة برقبتك وضهرك وكعوب رجليك.. مساج ماشي.. تسقية ف مية سخنة ماشي برضة.. اللي يعجبك ويريحك..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والمائية والهوائية والترابية والبرمائية..

إعرف حظك اليوم برج الجوزاء بالتفصيل السبت 24/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إحذر النميمة والناس اللئيمة النهاردة خصوصا وان في فرص كبيرة لنميمة مابين عقلك وقلبك.. حاول تشغلهم ف اي حاجة مفيدة احسن بدل قعدتهم من غير شغلة ولا مشغلة كدة ليجيبولك الكلام مع معدتك وترجع تزعل ومعدتك تزعل..

برج الجوزاء عملياً 

( الشغل والمذاكرة والتخطيط لبكرة ):

اليوم جميل ومليان تفاصيل حلوة ومشاوير بسيطة وممكن تكون فاتحة خير على خيالك وحياتك بشكل عام.. اختار كويس النهاردة تبقى مع مين وتروح فين.. متضيعش الفرصة بليز..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة بشرتك محتاجة شوية اهتمام.. ماسك خيار وزبادي مثلا ولا حاجة..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والهوائية والنارية..

إعرف حظك اليوم برج السرطان بالتفصيل السبت 24/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

شوية صبر وشوية حماس وحلمك هيبقى ناجح قدام كل الناس.. شوية منطقية بس ف تعاملك مع مشاعر الاخرين وانتا تبقى زي الفل ان شاء الله ومحدش يزعل منك..

برج السرطان عملياً 

( الشغل والمذاكرة والتخطيط لبكرة ):

وحياتك هتنجح وتتألق قريب وهتشوف.. شوية مجهود منظم ومثابرة وعند ف نكد الحياة والظروف والفلوس وهتشوف انتا ممكن تكسر الدنيا ازاي.. ثق ف نفسك وف حدسك العملي لأنه بوصلة ناجحة دايما هتدلك على الطريق الصح.. شوية تفاؤل بس ولو بالكدب.. شوية تفاؤل.. مش أكتر..

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة ماشي حالها خارجيا وداخليا بس انتا محتاج تبين نفسك مهتم حبة بالحياة وباللي بيدور برة شباك اوضتك.. مش اكتر..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والهوائية والترابية والمائية..

إعرف حظك اليوم برج الأسد بالتفصيل السبت 24/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الذكي والجميل والقوي طبيعي يحس بالوحدة خصوصا وان معظم سكان الكوكب ولا اذكيا ولا ناس جميلة ولا قوية.. طبيعي متنسجمش الا مع حد من قيمتك وطبيعي برضة متتنازلش عن ذكاءك عشان ترضي مشاعر حد بشكل مؤقت.. دة طبيعي وانتا مش غلط ابدا ف الجزئية دي..

برج الأسد عملياً 

( الشغل والمذاكرة والتخطيط لبكرة ):

اوعى تخلي تميزك يتحول لعقاب ليك وسط الناس والحياة.. إوعى..

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل ودة شيئ يستحق الاحتفال بصراحة..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والنارية والهوائية..

إعرف حظك اليوم برج العذراء بالتفصيل السبت 24/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متتعبش نفسك وانتا بتحاول تفهم الناس اللي حواليك بيفكروا ازاي او عاوزين ايه من الحياة.. كل واحد دماغه مريحاه على الاخر مهما ظهرلك العكس.. اهتم بمشاعرك ومتجيش عليها عشان حد.. كفاية بقى..

برج العذراء عملياً 

( الشغل والمذاكرة والتخطيط لبكرة ):

خليك مع نفسك النهاردة وبس.. ولا تركز مع حد ولا حد يركز معاك.. وخد بالك عشان في نشاط ابداعي كامن جواك ولو وظفته صح هتنجح وهتعمل حاجة حلوة جدا هتفرح بيها جدا الليلة..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية اهتمام غذائي عاجل..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والنارية والهوائية والبرمائية..

إعرف حظك اليوم برج الميزان بالتفصيل السبت 24/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك عشان ناس كتير بتعتبرك مصدر بهجة وإلهام وحياة.. خد بالك كويس

برج الميزان عملياً 

( الشغل والمذاكرة والتخطيط لبكرة ):

محتاج تعمل شوبينج وتصرف فلوس كتير ( مش أوي يعني) على الاكل براحتك النهاردة..

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة بتتحسن س جايز يكون في ميل للنوم كتير.. متخافش.. دي مناعتك عاوزة منك تريح انتا عشان تعرف هي تتخانقلك وتخلص على الميكروبات وانتا نايم.. مش أكتر

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والترابية والهوائية..

إعرف حظك اليوم برج العقرب بالتفصيل السبت 24/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

داري على شمعتك تقيد وداري على حبك برضة يزيد.. الموضوع بسيط خالص.. بس هو فين الحب.. مسيرك تلاقيه..

برج العقرب عملياً 

( الشغل والمذاكرة والتخطيط لبكرة ):

من حقك تنكش شعرك على العالم النهاردة وان كان عاجبه.. خليك حقاني دايما.. متنساش دة.. خليك حقاني العالم محتاج منك دة النهاردة جدا..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة تمام جدا بس نفسيا انتا محتاج زقططة وفرفشة وثقة بنفسك حقيقية مش غرور ابدا..

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والبرمائية والنارية..

إعرف حظك اليوم برج القوس بالتفصيل السبت 24/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متتخانقش مع الناس النهاردة الا لما تخلص خناق مع نفسك الاول جوة نفسك..

برج القوس عملياً 

( الشغل والمذاكرة والتخطيط لبكرة ):

بلاش تحارب على جبهتين جوة وبرة ف نفس الوقت عشان التشتيت دة مش حلو ف الحرب خالص.. ولا ف الحب حتى وحياتك..

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك تبطل تسرح ف الافكار السودة البطالة.. خيالك واسع وشغال.. استخدمه ف الخير اللي يفيدك ويفيد نفسك مش ف انك ترازي روحك طول الوقت بمخاوف عن الحياة والصحة والمرض.. انتا زي القرد اساسا وصحتك زي الفل..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والمائية والهوائية والنارية..

إعرف حظك اليوم برج الجدي بالتفصيل السبت 24/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

من حقك تختار الطريقة اللي تعامل العالم بيها ومن حق العالم برضة يختار الطريقة اللي يعاملك بيها.. المنطق بيقول كدة..

برج الجدي عملياً 

( الشغل والمذاكرة والتخطيط لبكرة ):

الازرق لون جميل والتركواز لون اجمل والسما النهاردة هيبقى لونها لبني وساعة الغروب البرتقاني هيزحف على اللبني دة وياخده ف حضنه.. حاول تبقى موجود ف بلكونة وتتفرج على المنظر دة يمكن تتعلم منه حاجة او يروق بالك على الاقل بدل التفكير الكتير المرير اللي بتقتل فيه خلايا مخك طول الوقت دة..

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة ايس كريم.. دلعها وروق عليها حبة الا لو زورك بيوجعك..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والمائية والترابية والنارية..

إعرف حظك اليوم برج الدلو بالتفصيل السبت 24/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الوقت اللي انتا زعلان عليه عشان بيضيع وبيجري دة مش مهم اساسا.. ولا أهم من كونك تبقى مبسوط ومستريح وعلى الاقل بتنام كويس وبتضحك كويس وخيالك شغال وزي الفل.. متمسكش لنفسك تايمر ساعة وتلومها انتا مش ف سباق مع اي حد الا نفسك وبس.. وإفتكر كويس ان الوقت مش مهم.. المهم بتقضيه مبسوط ولا لأ.. بس كدة..

برج الدلو عملياً 

( الشغل والمذاكرة والتخطيط لبكرة ):

من زمان وانتا خارج حدود الزمكان وقولنا الكلام دة مليون مرة قبل كدة.. فكك.. المهم تبقى مبسوط وتبقى نفسك.. مش نسخة من اي حد تاني.. تبقى نفسك وبس..

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم محتاجة منك متزهقش وتأمل ف الافضل والاحسن ومترضاش بالتحسن الطفيف المؤقت وتسعى لإنك تبقى صحيا مظبوط وتمام وكل حاجة ماشية وسالكة وشغالة..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والترابية والهوائية..

إعرف حظك اليوم برج الحوت بالتفصيل السبت 24/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

النكد مش وسيلة ناجة لفقدان الوزن.. لا ينفع رياضة ولا مفيد للصحة.. والخسسان اللي بييجي من طرفه مالوش عازة اساسا.. انما لو النكد دة مع رياضة هيبقى ميكس رائع جدا.. مش كدة ولا ايه

برج الحوت عملياً 

( الشغل والمذاكرة والتخطيط لبكرة ):

إركن النكد على جنب النهاردة وانزل اتمشى ف خيالك حافي ومتخافش.. الارضية نضيفة وزي الفل..

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا محتاج تخللي بالك من نفسيتك ومتكشرش ف وش حد بتحبه او بيحبك.. فال خير ف العموم انك تبتسم ف وشوش الناس النهاردة

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والترابية والنارية والهوائية.