التوقيت الجمعة، 29 مارس 2024
التوقيت 07:39 ص , بتوقيت القاهرة

حظك اليوم مع عبدالله أحمد الخميس 22/2/2018 إحتفال للثور وتناكة للسرطان

حظك اليوم وتوقعات الأبراج مع عبدالله أحمد الخميس 22/2/2018
حظك اليوم وتوقعات الأبراج مع عبدالله أحمد الخميس 22/2/2018

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


أوقات كتير بنعمل حاجات ونندم بسبب نتايجها ونعتبرها غلط.. بس لما بيعدي وقت كافي بنكتشف انها كانت أصح غلط عملناه ف الحياة.   


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الخميس 22/2/2018 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


إبعد عن العيال الصغيرة ف كل حاجة النهاردة وخصوصا ف الحب عشان العملية مش ناقصة ناس كبيرة شكلا بس وف عقولها اصغر من اصغر عيل صغير..


برج الحمل عملياً


( الشغل والمذاكرة والتخطيط لبكرة ):


هتساعد حد النهاردة ف حاجة هتعود عليك بالنفع بشكل وقتي وخصوصا ف مودك ومزاجك ونظرتك لنفسك سواء على المدى القصير او الطويل او النص نص.. قشطة عليك يامعلم.. قشطة عليك والله وعلى جدعنتك.


برج الحمل صحياً


( نفسيا وجسمانيا وكل مايخص طاسة المزاج ):


صحيا النهاردة انتا تعبان ف الاغلب ومش شايف قصادك وعاوز تنام معظم الوقت.. متقلقش.. دي حاجة عابرة وهترجع تتألق وتنور ف الضلمة من كتر الصحة من تاني متقلقش..


إعرف توافق برج الحمل مع باقي الأبراج النهاردة:


متوافق مع الابراج الحسواكية والفرفورية والحنتوسية والبرمائية والنارية والترابية والهوائية..


حظك اليوم برج الثور دوت مصر


إعرف حظك اليوم برج الثور بالتفصيل الخميس 22/2/2018 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


خد بالك عشان الجو فيه تراب وغبار ومطر خفيف ورومانسية وشحتفة وإحتياج للحب.


برج الثور عملياً


( الشغل والمذاكرة والتخطيط لبكرة ): 


هتتفق النهاردة ف الاغلب على حاجة هتعود عليك بالمنفعة ودة شيئ جميل ويستحق الاحتفال مهما كان العائد بسيط.. اهو على الاقل مانتش قاعد مقموص من الحياة ومبتعملش اي حاجة زي ناس تانية ف ابراج تانية ملناش دعوة بيها.. إحتفل.. دة حقك


برج الثور صحياً 


( نفسيا وجسمانيا وكل مايخص طاسة المزاج ):


صحيا النهاردة انتا محتاج تقرا اي كوميكس يقع تحت ايدك وخصوصا لو كان لكاركتر انتا بتحبه من وانتا صغنن.. مش ميمز ملهاش عازة ومتسمية غلط كوميكس وهي ولا ليها علاقة بالكوميكس من قريب او من بعيد ولا بفن القصص المصورة اساسا..


إعرف توافق برج الثور مع باقي الأبراج النهاردة:


متوافق مع الابراج البسكوتية والبربوشية والكتكوتية والمائية والهوائية والترابية والبرمائية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الخميس 22/2/2018 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


مش كل اللي بنتمناه بيتحقق زي ماحنا عاوزين ولا ف التوقيتات اللي احنا عاوزينها.. بس هنقول ايه.. هكذا هي الحياة للأسف.. هكذا هي الحياة سيادتك..


برج الجوزاء عملياً 


( الشغل والمذاكرة والتخطيط لبكرة ):


يوم مميز وجميل جدا بالنسبالك خصوصا لو صحيت كدة من بدري ونزلت ترازي ف الحياة وف البشر بقلب جامد ونية صافية ووش بشوش وشفايف بتضحك وتبتسم ف المطلق.


برج الجوزاء صحياً 


( نفسيا وجسمانيا وكل مايخص طاسة المزاج ):


صحيا النهاردة انتا محتاج مكرونة بالتونة بشكل عاجل..


تعرف على توافق برج الجوزاء مع باقي الأبراج النهاردة:


متوافق مع الابراج البرجماتية والحنكوشية والنباتية والسمكمكية والهوائية والترابية والمائية ..


حظك اليوم برج السرطان دوت مصر


إعرف حظك اليوم برج السرطان بالتفصيل الخميس 22/2/2018 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


بلاش تناكة وكلم اللي انتا مزعله وصالحه من نفسك كدة ومن بداية اليوم.. متكسلش ومتستكبرش..


برج السرطان عملياً 


( الشغل والمذاكرة والتخطيط لبكرة ):


وسط الدوشة والزحمة مبتلاقيش نفسك ابدا وبتحس بالخنقة.. طبيعي تحس كدة طالما انتا مقرر متندمجش مع المجتمع وواخد موقف طول الوقت وشايف نفسك صح وحيد وسط بحر من الغلط.. حاول تتكيف وتتوائم حبة عشان تعرف تنبسط او على الاقل عشان تعيش بدون صدام ومشاكل طول الوقت.. كدة هتبقى وحيد بجد ف الاخر.. خد بالك.


برج السرطان صحياً 


(نفسيا وجسمانيا وكل مايخص طاسة المزاج ):


صحتك النهاردة محتاجة شوية اهتمام بسيط وخصوصا بصدرك.. الجنزبيل والزعتر والقرفة والعسل واللمون احسن من ادوية الكحة.. ركز معاهم النهاردة..


تعرف على توافق برج السرطان مع باقي الأبراج النهاردة:


متوافق مع الابراج الحلبسية والكهربائية والبرمائية والكتكوتية والهوائية والمائية..


حظك اليوم برج الا?سد دوت مصر


إعرف حظك اليوم برج الأسد بالتفصيل الخميس 22/2/2018 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


الحب بيقتله الغرور وبيقتله برضة انك تبقى قاعد مستني ومبتعملش اي إجراء فعال لمجرد انك شايف انك مش المفروض تبتدي بأي حاجة وان دة ممكن يقلل منك.. خد بالك من الكلام دة كويس ياريت عشان متخسرش حد بيحبك.. الحب مش معناه ضعف ياباشا.. ابدا يعني.. القلب القوي هو اللي بيقدر يحب مش بيكتفي بتثبيت اللي بيحبه وخلاص..


برج الأسد عملياً 


( الشغل والمذاكرة والتخطيط لبكرة ):


بتتصرف حسب ما دماغك بتقولك وبس وبتتجاهل كل العلامات والاشارات والتحذيرات طول الوقت.. قشطة براحتك.. انتا حر بس مترجعش تشتكي ف الاخر بس.


برج الأسد صحياً 


( نفسيا وجسمانيا وكل مايخص طاسة المزاج ):


صحتك النهاردة زي الفل ومنتعشة وتمام جدا.. حاول تستغل النشاط والطاقة دي ف الخير بقى على قد ماتقدر.. خصوصا لو كان خير مشترك ليك وللعالم المحيط بيك..


تعرف على توافق برج الأسد مع باقي الأبراج النهاردة:


متوافق مع الابراج الفشكولية والباراكودية والسمكمكية والهوائية والنارية والهوائية..


حظك اليوم برج العذراء دوت مصر


إعرف حظك اليوم برج العذراء بالتفصيل الخميس 22/2/2018 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


من حقك تسرح ف خيالك النهاردة براحتك حبة.. كمان مهم تسجل افكارك وانطباعتك مهما كانت بسيطة وتافهة ف نظرك.. بالليل مهم تخرج النهاردة تتفسح ف اي حتة تعجبك.. المهم تخرج حبة تغير جو.


برج العذراء عملياً 


( الشغل والمذاكرة والتخطيط لبكرة ):


بلاش جمعيات وأقساط النهاردة.. إحتفظ بفلوسك لنفسك من فضلك وبلاش تهور مالوش عازة..


برج العذراء صحياً 


( نفسيا وجسمانيا وكل مايخص طاسة المزاج ):


صحتك النهاردة تمام وزي الحصان.. راعي قولونك بس ف الاكل حبة وراعي جيوبك الانفية برضة بالمرة شوية عشان تعرف تتنفس كويس خصوصا وانتا نايم..


تعرف على توافق برج العذراء مع باقي الأبراج النهاردة:


متوافق مع الابراج البرطمانية والكستبانية والبرمائية والنارية والهوائية والبرمائية..


حظك اليوم برج الميزان دوت مصر


إعرف حظك اليوم برج الميزان بالتفصيل الخميس 22/2/2018 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


تحت اي بند النهاردة متبالغش ف رد فعلك ومتتهورش وتتسرع.. خد وقتك وادرس الموقف كويس بالنسبة لعقلك ولقلبك ولمصلحتك بشكل عام وبعد كدة ابقى خد الاجراء اللي يريحك ويعجبك..


برج الميزان عملياً 


( الشغل والمذاكرة والتخطيط لبكرة ):


جايز تتفاجئ النهاردة بحاجات مكنتش متوقعها بس متقلقش.. ف كل الاحوال انتا جاهز للتعامل مع اي حاجة جديدة من اي نوع.. ثق ف نفسك بس وركز ازاي تبقى منجز ومنتج ومبتاخدش وقت ف استيعاب التغيير والتجديد بشكل عام.


برج الميزان صحياً 


( نفسيا وجسمانيا وكل مايخص طاسة المزاج ):


صحتك النهاردة تمام بس لو تقدر تتغدى برة النهاردة مع اي حد لطيف هيبقى نايس ليك ولمزاجك بشكل كبير.. خصوصا لو هو اللي عازم وانتا مش هتدفع اي حاجة..


تعرف على توافق برج الميزان مع باقي الأبراج النهاردة:


متوافق مع الابراج الدرامية والبحرية والبرميلية والسمكمكية والنيلية والفضية والنارية والبرمائية والترابية والهوائية..


حظك اليوم برج العقرب دوت مصر


إعرف حظك اليوم برج العقرب بالتفصيل الخميس 22/2/2018 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متتخانقش مع اللي بتحبه النهاردة ولو بتكراش على حد ف السر متخافش وروح قوله.. اليوم مناسب جدا.. موفق ف كراشك ان شاء الله..


برج العقرب عملياً 


( الشغل والمذاكرة والتخطيط لبكرة ):


اعتمد على المجهود الجماعي النهاردة وبلاش الفردية اللي دايما واكلة دماغك دي.. كدة هتشيل كل حاجة لوحدك ودي مسئولية كبيرة جدا.. قسم وخليك ذكي كعادتك أحسن.


برج العقرب صحياً 


( نفسيا وجسمانيا وكل مايخص طاسة المزاج ):


صحتك النهاردة كويسة ومفرفشة وزي الفل.. دفي نفسك بالليل بزيادة حبة بس مش أكتر..


تعرف على توافق برج العقرب مع باقي الأبراج النهاردة:


متوافق مع الابراج الحنكوشية والكهربائية والبرطمانية والكهرمانية والبرمائية والترابية والنارية..


حظك اليوم برج القوس دوت مصر


إعرف حظك اليوم برج القوس بالتفصيل الخميس 22/2/2018 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


اليوم مناسب للحب والخروج والزقططة.. شوف مين ف حياتك بيحبك لدرجة انه ممكن يحبك ويخرج معاك ويزقطط كمان وإخرجوا سوا.. حاولوا بس متتخانقوش على اي حاجة تافهة متستاهلش.. حاولوا.. الموضوع مش إجباري اوي..


برج القوس عملياً 


( الشغل والمذاكرة والتخطيط لبكرة ):


بلاش تعيش ف مود الجد كتير النهاردة عشان التكشير ف العموم هيخسرك كتير.. خليك لطيف أحسن لمصلحتك.


برج القوس صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة مساج وخصوصا لضهرك ورقبتك..


تعرف على توافق برج القوس مع باقي الأبراج النهاردة:


متوافق مع الابراج الفركتوزية والحبشتكانية والحنجورية والهوائية والمائية والترابية والنارية..


حظك اليوم برج الجدي دوت مصر


إعرف حظك اليوم برج الجدي بالتفصيل الخميس 22/2/2018 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


خليك حنين النهاردة على الناس اللي بتحبك وبتقدرك يامعلم.. وكله ف الاخر هيرجعلك حب واحترام متقلقش..


برج الجدي عملياً 


( الشغل والمذاكرة والتخطيط لبكرة ):


اليوم محتاج الكثير من العقل والحكمة والمزيكا والرقص والدندشة.


برج الجدي صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة شوية حركة ف الفراغ زيادة حبة عن كل يوم.. وياريت تهتم حبة ببشرتك عشان الجو وحش اليومين دول..


تعرف على توافق برج الجدي مع باقي الأبراج النهاردة:


متوافق مع الابراج البربئية والمونوكرومية والحنتوسية والحلبسية والكشرية والبرمائية والهوائية والترابية والنارية..


حظك اليوم برج الدلو دوت مصر


إعرف حظك اليوم برج الدلو بالتفصيل الخميس 22/2/2018 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتحتاج كل قوتك النهاردة عشان تعدي اليوم من غير ما تسيب اي حاجة او اي حد مالوش لازمة يفسد مودك ومزاجك..


برج الدلو عملياً 


( الشغل والمذاكرة والتخطيط لبكرة ):


إجمد كدة وروق وفرفش وفكك من اي قلق حواليك او دوشة.. إجمد عشان اليوم حلو فعلا بالنسبالك خصوصا بالليل.


برج الدلو صحياً 


( نفسيا وجسمانيا وكل مايخص طاسة المزاج ):


صحتك اليوم زي الفل وفي تحسن كبير بيحصل ودة راجع لإهتمامك بالموضوع.. كمل على كدة يابرنس لحد ما تبقى فل الفل ان شاء الله


تعرف على توافق برج الدلو مع باقي الأبراج النهاردة:


متوافق مع الابراج الكستبانية والدخانية والمونوكرومية والكتكوتية والبرمائية والنارية والترابية والهوائية..


حظك اليوم برج الحوت دوت مصر


إعرف حظك اليوم برج الحوت بالتفصيل الخميس 22/2/2018 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


إجتماع على مستوى القاعدة مابينك وبين باقي أطراف المؤامرة ف حياتك زي قلبك وعقلك ومعدتك.. موفقين ف خططكم ان شاء الله


برج الحوت عملياً 


( الشغل والمذاكرة والتخطيط لبكرة ):


ركز كويس اوي بقى عشان تقدر تخرج بقرارات مفيدة ليك على كل المستويات وخصوصا لقلبك مش لعقلك وبس..


برج الحوت صحياً 


( نفسيا وجسمانيا وكل مايخص طاسة المزاج ):


صحيا كل حاجة تمام بس ياريت تاكل شيكولاتة بيضا النهاردة.. هتبقى فال حلو عليك ان شاء الله.


تعرف على توافق برج الحوت مع باقي الأبراج النهاردة:


متوافق مع الابراج البسبوسية واللولبية والفهلوية والكتكوتية والمستحية والترابية والهوائية.



اعلان حظك اليوم دوت مصر