التوقيت الجمعة، 29 مارس 2024
التوقيت 09:52 ص , بتوقيت القاهرة

حظك اليوم مع عبدالله أحمد الأحد 18/2/2018 خطر للجوزاء ومزاج للسرطان

حظك اليوم وتوقعات الأبراج مع عبدالله أحمد الأحد 18/2/2018
حظك اليوم وتوقعات الأبراج مع عبدالله أحمد الأحد 18/2/2018

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


مش لازم تغلفي للولد كارنيه الفريندزون بلاستك قدام الناس.. الحاجات دي بتتعمل ف الدرا أحسن.   


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الأحد 18/2/2018 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


واضح انك هتعمل حاجة مجنونة غالبا بالاشتراك مع حد من اصحابك النهاردة.. ياللا ع البركة.. طالما نيتكوا صافية يبقى إتس أوكيه.. موفقين إن شاء الله.


برج الحمل عملياً


( الشغل والمذاكرة والتخطيط لبكرة ):


بطل عناد من فضلك حبة عشان متبتديش تخسر بجد..


برج الحمل صحياً


( نفسيا وجسمانيا وكل مايخص طاسة المزاج ):


صحيا النهاردة انتا محتاج تهتم بعينك حبة زيادة يامعلم عشان واضح ان تقلبات الفصول مروقاها حساسية.. زى إمبارح وأول إمبارح بالظبط


إعرف توافق برج الحمل مع باقي الأبراج النهاردة:


متوافق مع الابراج الحسواكية والفرفورية والحنتوسية والبرمائية والنارية والهوائية..


حظك اليوم برج الثور دوت مصر


إعرف حظك اليوم برج الثور بالتفصيل الأحد 18/2/2018 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


حاول النهاردة متستسلمش لأي إستفزاز من اي نوع.. متتعصبش وخليك هادي كدة وكوول خالص مالص متنساش.


برج الثور عملياً


( الشغل والمذاكرة والتخطيط لبكرة ): 


بلاش تتكلم مع حد ف حياتك الشخصية النهاردة.. مالوش لازمة.. فكرة الفضفضة دي ممكن توديك ف داهية ف بلاش منها خالص..


برج الثور صحياً 


( نفسيا وجسمانيا وكل مايخص طاسة المزاج ):


صحيا النهاردة انتا محتاج مساج حلو لرقبتك وضهرك وتركن كدة ف البانيو ف مية سخنة بتاع نص ساعة وتطلع تشرب عصير لأي فاكهة بتحبها وتقف ف البلكونة تتفرج على الناس


إعرف توافق برج الثور مع باقي الأبراج النهاردة:


متوافق مع الابراج البسكوتية والبربوشية والكتكوتية والمائية والنارية والبرمائية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الأحد 18/2/2018 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتقول كلام مهم جدا وعاقل جدا النهاردة وهيبقى ف وقته الصح وللناس الصح.. الفكرة كلها بس انك بعد ماتقول الكلام دة هتستغرب نفسك جدا.. ياللا كله خير وف مصلحتك.


برج الجوزاء عملياً 


( الشغل والمذاكرة والتخطيط لبكرة ):


تايه وخايف وحاسس بالخطر.. ماهو من عمايلك اساسا هيكون دة من ايه تفتكر.. بس عموما متقلقش.. كل حاجة هترجع زي ماكانت او هتتهد وهتبتدي كل حاجة من جديد علي نضيف.. ف الحالتين انتا الكسبان على فكرة.. هي بس المسألة ف الغدر والمفاجئة وكونك اتعودت على روتين محدد.. مش أكتر


برج الجوزاء صحياً 


( نفسيا وجسمانيا وكل مايخص طاسة المزاج ):


صحيا النهاردة ماشي حالها وكويسة.. بليز بس اول ماتصحى من النوم تفطر كويس وف اول ساعة صحيان عشان تنبسط باقي اليوم..


تعرف على توافق برج الجوزاء مع باقي الأبراج النهاردة:


متوافق مع الابراج البرجماتية والحنكوشية والنباتية والنارية والترابية والهوائية..


حظك اليوم برج السرطان دوت مصر


إعرف حظك اليوم برج السرطان بالتفصيل الأحد 18/2/2018 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول لما تعجب بحد تقوله انك معجب بيه مش تحدفه كلام زي الدبش وتستنى هو يكتشف مع نفسه انك تقصد إعجاب ونيتك كلها خير.. كفاية الغاز يابيه.. كفاية..


برج السرطان عملياً 


( الشغل والمذاكرة والتخطيط لبكرة ):


حاول تستحمى النهاردة بمزاج وتغني تحت الدش براحتك ومتسمعش لأي حد يقولك صوتك وحش.. دة غالبا حد غيران منك ومن صوتك.


برج السرطان صحياً 


(نفسيا وجسمانيا وكل مايخص طاسة المزاج ):


صحتك النهاردة زي القرد


تعرف على توافق برج السرطان مع باقي الأبراج النهاردة:


متوافق مع الابراج الحلبسية والكهربائية والبرمائية والكتكوتية والهوائية والنارية والمائية..


حظك اليوم برج الا?سد دوت مصر


إعرف حظك اليوم برج الأسد بالتفصيل الأحد 18/2/2018 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تبقى هادي حبة ومتنجرفش ورا مشاعرك وعواطفك الجياشة النهاردة.. إمسك نفسك كدة وتماسك ومتضيعش نفسك عشان شوية أرواح تايهة مش عارفة هي عاوزة ايه.. كمان مهم تبعد عن اللون الاحمر ف كل حاجة من بداية اليوم.


برج الأسد عملياً 


( الشغل والمذاكرة والتخطيط لبكرة ):


هتنجح بشدة اليومين دول عمليا لو ركزت على فكرة.. ركز واركن نرجسيتك على جنب واقبل بالمساعدة لما حد يعرضها عليك عشان هتحتاجها فعلا.. موفق يابرنس..


برج الأسد صحياً 


( نفسيا وجسمانيا وكل مايخص طاسة المزاج ):


صحتك النهاردة تمام وزي الفل.. اهم حاجة تاكل كويس وتنام كويس ومتفكرش قبل النوم ف اي اي حاجة..


تعرف على توافق برج الأسد مع باقي الأبراج النهاردة:


متوافق مع الابراج الفشكولية والباراكودية والسمكمكية والترابية والنارية والمائية..


حظك اليوم برج العذراء دوت مصر


إعرف حظك اليوم برج العذراء بالتفصيل الأحد 18/2/2018 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


من حقك تطلب الحب على فكرة من اللي بتحبه.. من حقك ماتقضيش حياتك كدة مشاعرك مقشفة من كتر ما بتتكسف تعبر عن نفسك..


برج العذراء عملياً 


( الشغل والمذاكرة والتخطيط لبكرة ):


طاقتك النهاردة كيرفها عالي بس محتاج تخش ف المود الأول وتبتدي علي هادي مع شوية تشجيع وكل حاجة هتظبط وتبقى فل الفل باقي اليوم.


برج العذراء صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة شوية اهتمام وخصوصا جيوبك الانفية


تعرف على توافق برج العذراء مع باقي الأبراج النهاردة:


متوافق مع الابراج البرطمانية والكستبانية والبرمائية والنارية والهوائية والمائية..


حظك اليوم برج الميزان دوت مصر


إعرف حظك اليوم برج الميزان بالتفصيل الأحد 18/2/2018 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


قلبك في حاجة للكثير والكثير من الدلع المستمر ف اتجاه واحد بس واضح انك جننت كل اللي بتحبهم ف محدش فاضي يدلعك..


برج الميزان عملياً 


( الشغل والمذاكرة والتخطيط لبكرة ):


خليك مسلح النهاردة بقدرتك على الابتكار والابداع وسرعة البديهة وبعد كدة ابقى اعتمد على جمالك وجمال شخصيتك بعدين براحتك


برج الميزان صحياً 


( نفسيا وجسمانيا وكل مايخص طاسة المزاج ):


صحتك النهاردة تمام وزي الفل بس خد بالك ان الجو اليومين دول قلاب وكله تراب وعذاب..


تعرف على توافق برج الميزان مع باقي الأبراج النهاردة:


متوافق مع الابراج الدرامية والبحرية والبرميلية والسمكمكية والنيلية والفضية والهوائية والنارية والبرمائية..


حظك اليوم برج العقرب دوت مصر


إعرف حظك اليوم برج العقرب بالتفصيل الأحد 18/2/2018 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


يوم كله حماسة وحرارة ورغبة ف التغيير نحو الأفضل.. لحد العصاري كدة او المغربية وبعد كدة كل حاجة هتهدى جواك وهتحس انك عاوز يدوبك تاكل اي حاجة وتنام.


برج العقرب عملياً 


( الشغل والمذاكرة والتخطيط لبكرة ):


طنش اي حاجة ممكن تضايقك الليلة عشان انتا مش ف مود يسمح بتحمل بواخة الاخرين خصوصا لو الاخرين دول ناس بتتفنن ف التصرف بغباء وطريقة تفكيرها تفقع المرارة.. طنش تعيش وتاكل قراقيش.. او تسقيها ف الشاي.. براحتك اساسا


برج العقرب صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة شوية قراقيش متسقية ف شاي..


تعرف على توافق برج العقرب مع باقي الأبراج النهاردة:


متوافق مع الابراج الحنكوشية والكهربائية والبرطمانية والكهرمانية والهوائية والبرمائية والنارية..


حظك اليوم برج القوس دوت مصر


إعرف حظك اليوم برج القوس بالتفصيل الأحد 18/2/2018 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


تجنب التكنولوجيا النهاردة خالص ومتعتمدش عليها إلا ف الشديد القوي وبس.


برج القوس عملياً 


( الشغل والمذاكرة والتخطيط لبكرة ):


نجاح ف الطريق اليك واحتمال تيجي معاه فلوس كمان.. يامسهل..


برج القوس صحياً 


( نفسيا وجسمانيا وكل مايخص طاسة المزاج ):


صحتك النهاردة ماشي حالها جدا بس خد بالك من ضهرك حبة معلش..


تعرف على توافق برج القوس مع باقي الأبراج النهاردة:


متوافق مع الابراج الفركتوزية والحبشتكانية والحنجورية والمائية والهوائية والنارية..


حظك اليوم برج الجدي دوت مصر


إعرف حظك اليوم برج الجدي بالتفصيل الأحد 18/2/2018 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متنعزلش عن الناس النهاردة ياريت وتعالى على نفسك معلش واقعد معاهم يمكن يقولوا حاجة تضحكك او تفرفشك ولا حاجة وتخرجك من المود البلاستك اللي مسيطر عليك دة.


برج الجدي عملياً 


( الشغل والمذاكرة والتخطيط لبكرة ):


فكك من اجواء اللوم خالص النهاردة.. سواء لوم لنفسك او لغيرك وشوف اللي وراك النهاردة وخلصه من سكات باقتدار وتمكن وحماسة يامعلم..


برج الجدي صحياً 


( نفسيا وجسمانيا وكل مايخص طاسة المزاج ):


صحتك النهاردة زي الفل وتقدر تعمل اي حاجة تحط دماغك فيها وتخططلها كويس.. بطل خوف وثق ف نفسك حبة بس مش اكتر ..


تعرف على توافق برج الجدي مع باقي الأبراج النهاردة:


متوافق مع الابراج البربئية والمونوكرومية والحنتوسية والحلبسية والكشرية والبرمائية والترابية والنارية..


حظك اليوم برج الدلو دوت مصر


إعرف حظك اليوم برج الدلو بالتفصيل الأحد 18/2/2018 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


الطريق للنجاح بسيط وسهل وسلس بالنسبالك النهاردة.. روق انتا بس ومتضايقش نفسك بأي حاجة متستاهلش وركز ف الحاجات اللي بتحلم بيها وبس.. مش أكتر.


برج الدلو عملياً 


( الشغل والمذاكرة والتخطيط لبكرة ):


مش كل حاجة تسمعها النهاردة تصدقها.. شغل دماغك شوية معلش..


برج الدلو صحياً 


( نفسيا وجسمانيا وكل مايخص طاسة المزاج ):


صحتك اليوم احسن من امبارح ولو كملت اهتمام بيها هتبقى بكرة احسن من النهاردة..


تعرف على توافق برج الدلو مع باقي الأبراج النهاردة:


متوافق مع الابراج الكستبانية والدخانية والمونوكرومية والكتكوتية والبرمائية والمائية والنارية والترابية..


حظك اليوم برج الحوت دوت مصر


إعرف حظك اليوم برج الحوت بالتفصيل الأحد 18/2/2018 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


واضح انك النهاردة هتجيلك زيارة من قرايبك او حد معرفة.. إهرب أحسن وبلاش وجع دماغ


برج الحوت عملياً 


( الشغل والمذاكرة والتخطيط لبكرة ):


اللون الاصفر النهاردة هيبقى فال خير ف كل حاجة ان شاء الله.. حاول بس تقف على ايديك من خمس لعشر دقايق النهاردة عشان تنشط الدورة الدموية.. مش أكتر


برج الحوت صحياً 


( نفسيا وجسمانيا وكل مايخص طاسة المزاج ):


صحيا انتا لازم ترقص النهاردة حبة بينك وبين نفسك على انغام اي مزيكا مفرفشة ومنعشة بتحبها..


تعرف على توافق برج الحوت مع باقي الأبراج النهاردة:


متوافق مع الابراج البسبوسية واللولبية والفهلوية والكتكوتية والمستحية والنارية والترابية.




اعلان حظك اليوم دوت مصر