التوقيت الإثنين، 21 مايو 2018
التوقيت 05:03 ص , بتوقيت القاهرة
رئيس التحرير: هاني رفعـت
رئيس التحرير: هاني رفعـت
|

تابعونا على

|

فن ومنوعات

حظك اليوم وتوقعات الأبراج مع عبدالله أحمد الاثنين 22/1/2018

حظك اليوم مع عبدالله أحمد الاثنين 22/1/2018 فراشة للدلو رومانسية للحمل

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


طب إزاي في غزل بنات ومفيش غزل ولاد؟.. ليه التفرقة دي؟.


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الاثنين 22/1/2018 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


إحتمال كبير تحس النهاردة ف نص اليوم بمشاعر متذبذبة ومتأرجحة مابين الهفهفة والرومانسية ومابين الحزن الازرق البسيط..


برج الحمل عملياً


( الشغل والمذاكرة والتخطيط لبكرة ):


مبتعترفش ليه انك غلطان.. مستكبر على ايه بالظبط؟..


برج الحمل صحياً


( نفسيا وجسمانيا وكل مايخص طاسة المزاج ):


صحتك كويسة النهاردة ومنتعشة بس انتا بردان بزيادة بس عشان مش قادر تقتنع انك لازم وحتما تتقل ف الهدوم قبل ماتخرج مش اكتر


إعرف توافق برج الحمل مع باقي الأبراج النهاردة:


متوافق مع الابراج البسبوسية والمرمرية والبلاستيكية والمائية


حظك اليوم برج الثور دوت مصر


إعرف حظك اليوم برج الثور بالتفصيل الاثنين 22/1/2018 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


حاول متتفرجش النهاردة على اي حاجة درامية او رومانتيك كوميدي.. خليك ف الكوميديا والوثائقيات وبس أحسن وأضمن


برج الثور عملياً


( الشغل والمذاكرة والتخطيط لبكرة ): 


الثقة ف النفس مش معناها انك تعاند ف كل حاجة بتتقالك عشان انتا وبس اللي عارف الصح فين او يتعمل ازاي.. خليك ذكي واستفيد من اي نصيحة تتحدف ف طريقك النهاردة.. على الاقل اسمع وإعقل الكلام وبعد كدة قرر اذا كنت تعمله او متعملوش.. براحتك


برج الثور صحياً 


( نفسيا وجسمانيا وكل مايخص طاسة المزاج ):


إخرج ودور على الشمس النهاردة عشان عاوزة تديك حضن حلو


إعرف توافق برج الثور مع باقي الأبراج النهاردة:


متوافق مع الابراج البسكوتية والبربوشية والنارية والترابية والمائية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الاثنين 22/1/2018 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


راقب العالم من شباكك النهاردة ساعة وسجل ملاحظاتك براحتك..


برج الجوزاء عملياً 


( الشغل والمذاكرة والتخطيط لبكرة ):


نجاحات على المستوى العملي مع هدوء واستقرار ف الجانب المادي.. يارب دايما ياخويا والله


برج الجوزاء صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة تاخد بالك من جيوبك الانفية كويس ومتهملش خالص ف الموضوع دة


تعرف على توافق برج الجوزاء مع باقي الأبراج النهاردة:


متوافق مع الابراج البرجماتية والحنكوشية والمائية والنباتية


حظك اليوم برج السرطان دوت مصر


إعرف حظك اليوم برج السرطان بالتفصيل الاثنين 22/1/2018 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


فرحة مفاجئة جاية ف الطريق إليك بتتمخطر.. إستعد كويس وإتشيك النهاردة وخليك هادي وجميل عشان تعرف تنبسط بيها لما تيجي..


برج السرطان عملياً 


( الشغل والمذاكرة والتخطيط لبكرة ):


طول مانتا مركز ومخلص اللي وراك أول بأول محدش هيبقاله حاجة عندك ولا من حقه يحاسبك او يتهمك بأي تقصير..


برج السرطان صحياً 


(نفسيا وجسمانيا وكل مايخص طاسة المزاج ):


صحتك محتاجة مساج ودلع النهاردة.. شوف هتعمل الموضوع دة إزاي


تعرف على توافق برج السرطان مع باقي الأبراج النهاردة:


متوافق مع الابراج الحلبسية والكهربائية والكتكوتية والنارية والهوائية ..


حظك اليوم برج الا?سد دوت مصر


إعرف حظك اليوم برج الأسد بالتفصيل الاثنين 22/1/2018 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


عاطفيا انتا محتاج أمان وحب ومستكبر تعترف بالموضوع دة عشان مكسوف او خايف تترفض ف الاغلب..


برج الأسد عملياً 


( الشغل والمذاكرة والتخطيط لبكرة ):


حاول تتفاءل النهاردة حتى لو مفيش مايدعو للتفاؤل بشدة.. إبتدي انتا بس وإعمل اللي عليك وسيب الباقي للحياة..


برج الأسد صحياً 


( نفسيا وجسمانيا وكل مايخص طاسة المزاج ):


صحتك النهاردة هتحتاج التفاؤل والفرفشة وهتحتاج برضة حبة اكل حلوين على مزاجك


تعرف على توافق برج الأسد مع باقي الأبراج النهاردة:


متوافق مع الابراج الفشكولية والباراكودية والنارية والترابية


حظك اليوم برج العذراء دوت مصر


إعرف حظك اليوم برج العذراء بالتفصيل الاثنين 22/1/2018 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


في حد بيكراش عليك ف السر وبيراقبك باين ولا حاجة.. إعمل نفسك مش واخد بالك لحد مانشوف الجدع دة عاوز منك ايه بالظبط..


برج العذراء عملياً 


( الشغل والمذاكرة والتخطيط لبكرة ):


حاسس بحاجات كتير النهاردة. حيرة وإحساس بعدم التقدير والظلم.. اتقل وقاوم الاحساس دة على قد ماتقدر.. انتا مش ضحية ولا تنفع ضحية لا لحد ولا للحياة نفسها.. إجمد كدة وقاوم وبلاش دلع


برج العذراء صحياً 


( نفسيا وجسمانيا وكل مايخص طاسة المزاج ):


صحتك النهاردة كويسة وماشي حالها بس نفسيا انتا شايل ف قلبك كتير وساكت ودي حالة معروفة اسمها القلب الكتاكت.. المزيكا والاكل الحلو والكتب الجميلة تعتبر حل معقول ف مواجهة الحالة دي.. هو بصراحة اي حاجة هتعملها النهاردة هتعتبر حل مناسب المهم متقعدش كدة راكن وساكت..


تعرف على توافق برج العذراء مع باقي الأبراج النهاردة:


متوافق مع الابراج البرطمانية والكستبانية والترابية.


حظك اليوم برج الميزان دوت مصر


إعرف حظك اليوم برج الميزان بالتفصيل الاثنين 22/1/2018 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


خد بالك ان الشتا دايما بييجي وف ايده حبة حزن وإكتئاب.. دي حاجة عادية ومعظم الناس عارفاها كويس.. حاول تقاوم الاحساس دة النهاردة لو حسيته بزيادة الليلة..


برج الميزان عملياً 


( الشغل والمذاكرة والتخطيط لبكرة ):


خد إحتياطاتك وإتدفى كويس النهاردة ومتنزلش من البيت من غير چاكيت نفسي مناسب ومزقطط ومبسوط


برج الميزان صحياً 


( نفسيا وجسمانيا وكل مايخص طاسة المزاج ):


صحتك النهاردة ممكن تبقى افضل او أسوأ.. الاختيار يرجعلك انتا مش لأي حد تاني على فكرة.. لو فرفشت وقاومت الاحزان هتبقى كويس نفسيا وصحتك هتنتعش ومناعتك هتشتغل.. اما لو لا قدر الله نكدت على روحك وقعدت تصطاد ف المشاكل وتفكر ف اللي فات وإنقضى ف متلومش الا نفسك ع اللي هيحصل.. انتا حر..


تعرف على توافق برج الميزان مع باقي الأبراج النهاردة:


متوافق مع الابراج الدرامية والفضية والمائية والترابية والنارية


حظك اليوم برج العقرب دوت مصر


إعرف حظك اليوم برج العقرب بالتفصيل الاثنين 22/1/2018 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


قلبك متشحتف الليلة.. خد بالك وحاول تطمنه ولا تطبطب عليه ولا ترشيه بأي أكل ولا أي حاجة حلوة.. متسيبوش زعلان كدة


برج العقرب عملياً 


( الشغل والمذاكرة والتخطيط لبكرة ):


تقدر تستخبى ف المزيكا النهاردة براحتك من كل الناس ومن كل حاجة.. عادي على فكرة..


برج العقرب صحياً 


( نفسيا وجسمانيا وكل مايخص طاسة المزاج ):


صحتك النهاردة بتقولك حاول تتدفى كويس ومتستسلمش لإكتئاب الشتا..


تعرف على توافق برج العقرب مع باقي الأبراج النهاردة:


متوافق مع الابراج الحنكوشية والبرطمانية والترابية والنارية.


حظك اليوم برج القوس دوت مصر


إعرف حظك اليوم برج القوس بالتفصيل الاثنين 22/1/2018 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


عاطفيا انتا بتحب حد ومش مهتم بيك كفاية ودة غالبا مضايقك لأنك اتعودت تاخد كل الاهتمام الممكن ف اي علاقة حب بتخشها وبيفرق معاك جدا سواء ف مودك او ف لمعان خدودك.. حاول تلفت نظره بهدوء ومتخافش..


برج القوس عملياً 


( الشغل والمذاكرة والتخطيط لبكرة ):


عقبات بسيطة ف الطريق العملي.. متشغلش بالك بيها ومتقفش عندها اصلا.. متستاهلش..


برج القوس صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة تشرب ينسون وكركديه كتير عشان تهدي أعصابك المتوترة..


تعرف على توافق برج القوس مع باقي الأبراج النهاردة:


متوافق مع الابراج الفركتوزية والحبشتكانية والحنجورية والمائية والترابية..


حظك اليوم برج الجدي دوت مصر


إعرف حظك اليوم برج الجدي بالتفصيل الاثنين 22/1/2018 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


ركز ف اللي وراك وفكك من النصب سواء على مشاعر نفسك او على مشاعر غيرك.. عيب كدة..


برج الجدي عملياً 


( الشغل والمذاكرة والتخطيط لبكرة ):


كفاية حجج وأعذار.. إعمل اللي وراك بإخلاص وتركيز وبطل العناد والمماطلة عشان مصلحتك الشخصية مش اكتر


برج الجدي صحياً 


( نفسيا وجسمانيا وكل مايخص طاسة المزاج ):


صحيا انتا محتاج النهاردة تجري حبة ف الشقة وانتا لابس زعبوط ف دماغك..


تعرف على توافق برج الجدي مع باقي الأبراج النهاردة:


متوافق مع الابراج المرمرية والحنكوشية والترابية والهوائية..


حظك اليوم برج الدلو دوت مصر


إعرف حظك اليوم برج الدلو بالتفصيل الاثنين 22/1/2018 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


سواد كتير بيحيط بيك ببطء.. ظنون وتهيؤات وهلاوس ف خيال ناس كتير عنك عشان مش فاهمينك.. مبيسألوش نفسهم ليه مبتشرحش حياتك ببساطة.. كأنه من حقهم يعرفوا.. طنش كل الكلام دة وإنبسط ومتجاوبش حد.. متجاوبش حد ميستاهلش


برج الدلو عملياً 


( الشغل والمذاكرة والتخطيط لبكرة ):


خليك زي الفراشة.. خليك خفيف وهفهاف زي الهوا.. خليك ماشي ورا النور وبس.. خصوصا النور اللي جواك..


برج الدلو صحياً 


( نفسيا وجسمانيا وكل مايخص طاسة المزاج ):


صحتك محتاجة تثق ف حدسك وذكائك النهاردة ومتقلقش نفسك من اي حاجة بدون سبب منطقي قوي.. وحتى لو إتوجد السبب دة متقلقش نفسك برضة.. مش مستاهلة ومفيش حاجة ممكن تحصل انتا مش هتعرف تتعامل معاها.. متقلقش


تعرف على توافق برج الدلو مع باقي الأبراج النهاردة:


متوافق مع الابراج الكستبانية والدخانية والمونوكرومية والهوائية والمائية


حظك اليوم برج الحوت دوت مصر


إعرف حظك اليوم برج الحوت بالتفصيل الاثنين 22/1/2018 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متزعلش نفسك.. مسيرك تتحب بالشكل اللي بتحلم بيه.. إدي الحياة فرصتها بس وهتنبسط ان شاء الله


برج الحوت عملياً 


( الشغل والمذاكرة والتخطيط لبكرة ):


مهم تقف تطبخ لنفسك أي نوع من أنواع الاكل النهاردة مهما كان بسيط.. هتنبسط وهتفرفش وهتنتعش وانتا محتاج الانتعاش دة الليلة بشدة اساسا


برج الحوت صحياً 


( نفسيا وجسمانيا وكل مايخص طاسة المزاج ):


صحيا النهاردة حاول تدفي مناخيرك من سقعة الشتا بأي شكل يريحك المهم متسيبهاش حمرا زي الطماطماية المفعصة كدة حرام عليك


تعرف على توافق برج الحوت مع باقي الأبراج النهاردة:


متوافق مع الابراج البسبوسية واللولبية والفهلوية والترابية والهوائية



اعلان حظك اليوم دوت مصر


 

تابعونا على

الأكثر مشاهدة

ما وراء الخبر
أخبار
دوت تي في
بيزنس
خليج
فن ومنوعات
دوت كورة
مقالات