التوقيت الجمعة، 29 مارس 2024
التوقيت 04:14 ص , بتوقيت القاهرة

حظك اليوم الأحد 22/10/2017 ..الدلو..كتكوت الأبراج النهاردة..

حظك اليوم وتوقعات الأبراج مع عبدالله أحمد الأحد 22/10/2017
حظك اليوم وتوقعات الأبراج مع عبدالله أحمد الأحد 22/10/2017

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


مفيش حاجة تضمنلك بكرة..ومفيش حاجة تضمنلك هتحس ب ايه بكرة.


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل الأحد 22/10/2017 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


الانبساط زي القفة ام ودنين..محتاج دايما شخصين اتنين..بالتالي محاولاتك ف انك تنبسط لوحدك ممكن تبوء بالفشل..بس هي مش هتبوء اوي لو صفيت نيتك وحاولت فعلا تنبسط من قلبك ومن ذاتك..


برج الحمل عملياً


( الشغل والمذاكرة والتخطيط لبكرة ):


الفلوس ازمة بالنسبالك عشان احنا اخر الشهر مش اكتر..مسيرها تيجي وتتصرف وترجع تاني تأزم نفسك زينا كلنا..دي دايرة عادية جدا كلنا بنلف فيها..ف متضايقش نفسك..مسيرها تروق وتحلى يابرنس..مسيرها تروق على الاقل..


برج الحمل صحياً


( نفسيا وجسمانيا وكل مايخص طاسة المزاج ):


متركزش ف تفاصيل الناس النهاردة وحاول تاكل كوسة بالبشاميل او اي حاجة شبيهة..هتعدل مزاجك وهتروق عليه خصوصا لو اتبعتها وكبستها بكوباية شاي بالحبهان ف البلكونة..لو معندكوش بلكونة اشربها ع السطح فوق..اتصرف..


إعرف توافق برج الحمل مع باقي الأبراج النهاردة:


متوافق مع الابراج الهوائية والترابية والفنكوشية


حظك اليوم برج الثور دوت مصر


إعرف حظك اليوم برج الثور الأحد 22/10/2017 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


زقططة مفاجئة النهاردة بسبب صديق مقرب مهتم يبسطك بجد.. قدر الشخص دة كويس جدا جدا ف حياتك ياريت النهاردة وخد الموضوع دة فرصة عشان تحتفل بوجوده ف حياتك وحاول متتخانقش معاه على اي سبب تافه..بلاش النهاردة.


برج الثور عملياً


( الشغل والمذاكرة والتخطيط لبكرة ): 


محتاج تزقطط النهاردة مع حد لطيف بيقدرك وبيحبك وبيحترمك وبيفرق وجودك معاه وبيهتم برأيك..ياريت متبوظش الحالة دي بكلمة لأأ ..ياريت يعني


برج الثور صحياً 


( نفسيا وجسمانيا وكل مايخص طاسة المزاج ):


مش مهم تثبت طول الوقت بالخناق ان رأيك من دماغك وان محدش يقدر يمشي عليك كلمة..المهم تتصرف صح وبس..لأنه افرض دماغك مسوحاك ف حاجات غلط..هتمشي برضة وراها مثلا ولا ايه الكلام بالظبط...صحتك الغذائية محتاجة النهاردة حبة اهتمام ومحتاجة جبنة ريكفور او حاجة شبهها كدة متفهمش ايه هي..


إعرف توافق برج الثور مع باقي الأبراج النهاردة:


متوافق مع الابراج النارية


حظك اليوم برج الجوزاء دوت مصر


إعرف حظك اليوم برج الجوزاء الأحد 22/10/2017 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول متلعبش مع حد مش من سنك النهاردة..خصوصا لو مكانش من لونك ف الحياة.. مش هتنبسط ومش هتفهموا بعض..ف ياريت متضيعش وقت على الفاضي وتلتفت للناس اللي بتحبك بجد وهما كتير حواليك على فكرة.. انتا بس اللي مش واخد بالك..بص كويس ودور كويس وانتا تلاقيهم وتنبسط معاهم خصوصا وانهم هيبقوا من سنك ومن لونك ومقاسك.. إستمتعوا سوا.


برج الجوزاء عملياً 


( الشغل والمذاكرة والتخطيط لبكرة ):


كل حاجة ماشية تمام الا طموحاتك واحلامك هي اللي ماشية اه بس بتعرج..واضح انها كلت مقص معمولك عمولة عشان كدة مش عارفة تمشي..معلش..مسير كل حاجة ترجع تاني تظبط معاك وتعرف تروق وتدندش الاناني وتنبسط


برج الجوزاء صحياً 


( نفسيا وجسمانيا وكل مايخص طاسة المزاج ):


خد بالك من صحتك عشان مناعتك مش شغالة كويس بالتالي اي دور برد ممكن ينط بميكروباته ف مناخيرك..اهتم بصحتك وكتر من البصل والتوم ف حياتك الا لو هتتباس ولا حاجة..ساعتها لازم تضرب حزمة بقدونس بعد البصل والتوم دة متنساش


تعرف على توافق برج الجوزاء مع باقي الأبراج النهاردة:


متوافق مع الابراج المائية والبرمائية


حظك اليوم برج السرطان دوت مصر


إعرف حظك اليوم برج السرطان الأحد 22/10/2017 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


التكنولوجيا النهاردة مش صاحبتك اوي وممكن تتسبب ف نكد.. حاول متركزش مع التليفون النهاردة كتير.. ولو مضطر يبقى تقرر متاخدش حاجة على صدرك النهاردة عشان متتضايقش على الفاضي..المزاج ممكن يروق ويتعدل ويظبط لو ركزت ف انك تنبسط مش ترازي ف نفسك وخلاص.. السمك مناسب للغدا النهاردة خصوصا لو معمول بحب وإهتمام.


برج السرطان عملياً 


( الشغل والمذاكرة والتخطيط لبكرة ):


الحياة نفسها تدلعك وتهشكك بس انتا اللي قفيل وملكش نفس..حاول تلبس طاقية الانبساط ام ريش دهبي التخيلية وترقص على مزيكا جديدة النهاردة يمكن تحن عليك وتفتحلك ابواب السعادة..حاول كدة يمكن يحصل انتا خسران ايه يعني..


برج السرطان صحياً 


(نفسيا وجسمانيا وكل مايخص طاسة المزاج ):


بحثك عن الفلوس عاملك قلق معكنن عليك..حقك طبعا تدور على الفلوس خصوصا وان الفلوس هي كل حاجة..بس خد بالك انك عقبال ما توصلها هتكون ضيعت وقت كتير جدا ف النكد والشحتفة..ف على ايه..انبسط بالمتاح دلوقتي لحد ماتقفشها وتعتقلها وتصرف وتكسر الدنيا وتنبسط..


تعرف على توافق برج السرطان مع باقي الأبراج النهاردة:


متوافق مع الابراج اللي بتحب الفلوس


حظك اليوم برج الا?سد دوت مصر


إعرف حظك اليوم برج الأسد الأحد 22/10/2017 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


قلبك محتاج حبة اهتمام حلوين النهاردة.. محتاج تسمع كلام حلو والاصعب انك محتاج تسمع كلام حلو تصدقه ويكون منطقي او يكون مجرد إطراء ليك ومجاملة وخلاص حتى لو انتا عارف انه كلام معظمه مبالغ فيه بس انتا محتاج تسمعه برضة..حقك بصراحة..


برج الأسد عملياً 


( الشغل والمذاكرة والتخطيط لبكرة ):


محتاج حافز ضخم عشان تقدر تواجه أعباء الحياة ومتطلباتها..مسألة انك تنجح وتوصل بقت صعبة ورزلة وإيقاعها بطئ خصوصا وان مفيش قواعد للعب واضحة او منطقية بالتالي شطارتك او اجتهادك مبيبانوش كما يجب..طب ماجايز الموضوع محتاج شوية وقت او محتاج توظف جهودك ف مكان تاني.. ممكن برضة.


برج الأسد صحياً 


( نفسيا وجسمانيا وكل مايخص طاسة المزاج ):


السعي المستمر الحثيث نحو تحقيق أحلامك هيسفر عن نجاح على المستوى العملي..دة مفيش فيه كلام..انما الجانب العاطفي والنفسي محتاج شوية شغل سمكرة وقلم بويا حنين وبألوان حلوة..بالنسبة لصحتك الغذائية ف خد بالك انك بتهمل ف أكلك وفاكر انك كدة بتعمل دايت..الدايت لازم يكون متوازن وبيشمل كل عناصر الاكل عشان الجسم لما هيتحرم من عنصر ما مش هيسكت وهيتعب ويعيا او ببساطة هيقلبلك مزاجك..زي ماهو حاصل معاك كدة بالظبط..


تعرف على توافق برج الأسد مع باقي الأبراج النهاردة:


متوافق مع الابراج الحنجورية والمستحية


حظك اليوم برج العذراء دوت مصر


إعرف حظك اليوم برج العذراء الأحد 22/10/2017 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


ردود افعالك ف المجمل تجاه اي حد شريك ليك ف علاقة بتحسسه بالحيرة عشان انتا مبتهتمش توضح بالظبط انتا معترض على ايه او مبتحبش ايه وبتحب ايه..حاول تبقى ابسط من كدة حبة وبلاش غموض عشان حالة الحيرة دي ممكن تخلث مسافات شاسعة مابينك وبين الطرف التاني بدون داعي..


برج العذراء عملياً 


( الشغل والمذاكرة والتخطيط لبكرة ):


محتاج تبطل تحاول تغوص جوة اعماق نفسك بحثا عن انتا عاوز ايه من الحياة..كبر دماغك وروق عليها احسن وبلاش تجري ورا اوهام..خلص اللي وراك وبعد كدة ابقى اقعد فكر ف كل الامور الفلسفية اللي محتاجة اجوبة بعدين براحتك.. كمان خلي بالك من اي حد لابس بنطلون محزق او ضيق نمرتين عليه ورغم كدة برضة لابسه وماشي يتمخطر بيه.


برج العذراء صحياً 


( نفسيا وجسمانيا وكل مايخص طاسة المزاج ):


الطواجن والمحاشي النهاردة هيعملولك احلى دماغ ولو معاهم بسبوسة او كنافة هيبقى احلى كلام..حاول بس متضربش الصينية لوحدك..وحاول تاكل على اقل من مهلك..محدش بيجري وراك..براحتك واحدة واحدة..


تعرف على توافق برج العذراء مع باقي الأبراج النهاردة:


متوافق مع الابراج الطينية والهوائية


حظك اليوم برج الميزان دوت مصر


إعرف حظك اليوم برج الميزان الأحد 22/10/2017 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


عقلك ف السحاب النهاردة ومش مع حد خالص..إستمتع بالحالة دي قبل ما تخلص ومتحسش تجاهها بالذنب..إوعى.. إستسلم وإنبسط..محدش لاقي خيال وتوهان اليومين دول..متضيعش الفرصة..


برج الميزان عملياً 


( الشغل والمذاكرة والتخطيط لبكرة ):


فترة شحن ومهمة جدا عشان تعرف تواصل الفترة اللي جاية بنشاط وألمعية وذكاء وذهن حاضر غير قابل للمرازية من اي حد..استغل الفترة دي صح ومتحسسش نفسك بالقلق او بالذنب عشان ملكش مزاج تعمل اي حاجة معتادة او روتينية النهاردة..اشحن عشان تعرف تنبسط بعدين..اشحن في صمت..


برج الميزان صحياً 


( نفسيا وجسمانيا وكل مايخص طاسة المزاج ):


حاول متعملش قلق كبير النهاردة حوالين الاكل بدون داعي..الاكل المتاح يتاكل ومن سكات..غير كدة لو الاكل فعلا مش عاجبك يبقى تقف تعمل لنفسك الاكل اللي يعجبك..بالليل الجو هيبقى مناسب عشان تعمل بيضة على حتة جبنة رومي جوة رغيف عيش يحبذ انه يكون طازة..وإستمتع..اشرب مية كتير جدا وابعد عن الطرشي عشان الاملاح متضايقكش..


تعرف على توافق برج الميزان مع باقي الأبراج النهاردة:


متوافق مع الابراج الحنكوشية والنارية


حظك اليوم برج العقرب دوت مصر


إعرف حظك اليوم برج العقرب الأحد 22/10/2017 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


في حد حاطك ف دماغه وناوي ينكد عليك النهاردة..تجنبه ومتخشش معاه ف صراع خصوصا لو بيقول كلام كتير عن المسئولية والحب والحياة..سيبه لنظرياته واوهامه عنك وعن نفسه وعن الحياة واخرج شوف اللي وراك ولا انبسط مع اصحابك احسن بلاش وجع دماغ..


برج العقرب عملياً 


( الشغل والمذاكرة والتخطيط لبكرة ):


جميل ومنتعش النهاردة ماشاء الله.. واضح ان في اخبار حلوة جتلك عشان كدة انتا مبسوط ومزقطط.. عموما لو لسة دة محصلش متزعلش.. هتجيلك اخبار حلوة النهاردة..صفي نيتك بس وخلي رادارك شغال وان شاء الله هيحصل.. اهم حاجة تبعد عن المبالغة والمبالغين تماما النهاردة..حوالين العالم دي عكوسات مش لطيفة..إبعد عنهم احسن.


برج العقرب صحياً 


( نفسيا وجسمانيا وكل مايخص طاسة المزاج ):


خد بالك من الدايت حبة بسيطة خالص مش اكتر..تاكل وبراحتك بس قلل الكميات ونوع حبة مابين الخضار والمكرونة والبطاطس والفراخ..دة طبعا لو في عندك فراخ..لو معندكش يبقى مشروم وأمرك لله..


تعرف على توافق برج العقرب مع باقي الأبراج النهاردة:


متوافق مع الابراج الترابية والهوائية


حظك اليوم برج القوس دوت مصر


إعرف حظك اليوم برج القوس الأحد 22/10/2017 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتجيلك مكالمة حلوة جدا النهاردة هتسمع فيها احلى كلام لدرجة انك ممكن تحس انه مش كلام دي انغام.. إستمتع..


حاول بس متلومش الطرف الاخر ف العلاقة لوم مالوش اساس من الصحة عشان تحسسه بالذنب أملاً ف تعويض ما عن اللي عمله واللي معملوش ف صورة حب ولهفة وشوق وحاجات من دي..الاسلوب دة مكشوف وبلاستك وممكن يقلب بخناقة او سوء تفاهم خنيق مالوش اي عازة ف التوقيت دة خالص..بلاش منه احسن..


برج القوس عملياً 


( الشغل والمذاكرة والتخطيط لبكرة ):


هتعمل انجاز بسيط النهاردة على المستوى العملي بس هيبقى كافي انه يبسطك ويحسسك انك برنس ف نفسك..إستمتع..


برج القوس صحياً 


( نفسيا وجسمانيا وكل مايخص طاسة المزاج ):


من حقك تخرج وتنبسط ومن حقك برضة تقعد ف البيت وتنبسط.. ف الحالتين الانبساط ف الامكان خصوصا لو تماهيت بروحك مع المكان ولو ادركت ان المشكلة مش ف المكان اساسا دي جواك انتا وبس..حاول تاخد قرار واضح ف المسألة دي وتصدق انك من حقك تنبسط من غير ماترازي ف اي حد..بإختصار..مش لازم تعمل اعلانات انك مبسوط..الكيد دة اخرته وحشة..


تعرف على توافق برج القوس مع باقي الأبراج النهاردة:


متوافق مع الابراج النارية والمائية


حظك اليوم برج الجدي دوت مصر


إعرف حظك اليوم برج الجدي الأحد 22/10/2017 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


ابعد عن المأساة وعن الناس اللي بتحب تقعد تندب وتعدد ف الفاضية والمليانة..النكد لما يعدي عليك غفله وعرقبه ف كعوب رجليه..مش تروح واخده بالحضن ومطلع الطبلة ومرقصه.. مش اسلوب اساسا دة.. حد يرقص الحزن برضة ياجدع؟.


برج الجدي عملياً 


( الشغل والمذاكرة والتخطيط لبكرة ):


محتاج تركز جدا اليومين دول وبشكل كبير جدا ف حياتك العملية عشان الأجواء مليانة مرازية ومليانة ناس مركزة معاك..ف متديهمش فرصة وإعمل اللي وراك على اكمل وجه ومتديش فرصة لحد لا يعلق ولا يقولك اي ملحوظة..انتا عارف انتا بتعمل ايه كويس اوي..اهم حاجة متسمعش لحد وتمشي ورا السنس بتاعك وبس..مش هيضللك ولا هيغشك..ثق فيه بس مش اكتر..


برج الجدي صحياً 


( نفسيا وجسمانيا وكل مايخص طاسة المزاج ):


غذائيا انتا محتاج تاكل كويس بس بكميات اقل من المعتاد حبة عشان تعرف تهضم ف السريع وتجوع وترجع تاكل تاني..


تعرف على توافق برج الجدي مع باقي الأبراج النهاردة:


متوافق مع الابراج الفنكوشية


حظك اليوم برج الدلو دوت مصر


إعرف حظك اليوم برج الدلو الأحد 22/10/2017 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


كتكوت الأبراج النهاردة وزغلول ف نفسك.. هتخش مرحلة جديدة ف حياتك النهاردة..إستعد وحط برفان عشان إحتمال كبير جدا تتباس النهاردة.


برج الدلو عملياً 


( الشغل والمذاكرة والتخطيط لبكرة ):


برنس الحاضر وزغلول المستقبل..بص لقدام ومتسيبش اي هلاوس او افكار سوداوية مفشكلة ف نفسها تضايق خيالك او تخنق تفاؤلك أو تفسد روقانك ..متسمحلهاش ابدا..وراك حاجات لازم تُنجز وتخلص وبتركيز ومزاج ومخمخة..إبدع وخد وقتك عشان تعمل حاجة حلوة تليق بيك وبقيمتك..


برج الدلو صحياً 


( نفسيا وجسمانيا وكل مايخص طاسة المزاج ):


جنزبيل وقرفة وينسون وشاي بنعناع كتير..صدرك محتاج يسلك حبة ومحتاج تهدى عليه سِنة بسيطة ف الدخان..واضح انك ظبطت اكلك وحسنت من نوعيته وبدأت تهتم بيه بشكل نايس وكويس وماشي حاله..كدة ناقصط تظبط نومك وكل حاجة تبقى فل وف الألسطة يامعلم..إبعد عن مروجي الإشاعات والناس اللي بتحب ترازي المخاليق بأخبار كالحة ونكد وممنهاش رجا..تيك كير..


تعرف على توافق برج الدلو مع باقي الأبراج النهاردة:


متوافق مع الابراج الهوائية


حظك اليوم برج الحوت دوت مصر


إعرف حظك اليوم برج الحوت الأحد 22/10/2017 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


في حد هيحاول يحاصرك النهاردة ويقلبك ف معلومات عن حاجة انتا متعرفش عنها حاجة اصلا..مش مهم..تحت اي بند برضة متعترفش انك مش عارف حاجة.. إنكر كل حاجة..إنكر كل حاجة..


برج الحوت عملياً 


( الشغل والمذاكرة والتخطيط لبكرة ):


مش عيب ابدا انك تكتشف انك مش عارف اي حاجة عن اي حاجة بس قشطة لأن دي حاجة كويسة جدا وممكن تبتدي تعتبرها تمهيد عشان تبتدي تحاول تعرف اي حاجة عن اي حاجة بجد..كمان المعرفة شيء نسبي وفي حواليك ناس كتير متهيألها انها عارفة كل حاجة عن كل حاجة بس هي ف الحقيقة متعرفش اي حاجة عن اي حاجة ف متزعلش نفسك..كلنا تايهين زيك بس بنحاول نبان عارفين وفاهمين ومتنورين مهما حسسنا ف الضلمة ومهما توهنا فيها بالسنين..


برج الحوت صحياً 


( نفسيا وجسمانيا وكل مايخص طاسة المزاج ):


بلاش حلويات النهاردة عشان هتعملك عكوسات كتير..خليك ف الحاجات الحادقة ف الاكل وف السمك وعلى الاخص التونة والسالمون..إعصر لمون كتير بس وجهز طبق الطحينة بنفسك وحاول تجيب عيش صابح فريش وبلاش الرغيفين اللي بتطلعهم من الفريزر تسخنهم دول..بيقلوا المزاج جامد خلي بالك..


تعرف على توافق برج الحوت مع باقي الأبراج النهاردة:


متوافق مع الابراج البرمائية والسحلابية



اعلان حظك اليوم دوت مصر